«Нәјә инаным?»
«Шүбһә јохдур ки, Каинат өз-өзүнә, һечликдән јараныб» (Физикачы Стивен Һокинг вә Леонард Млодинов).
«Аллаһ ҝөјү вә јери јаратды» (Төврат, Јарадылыш 1:1)
Каинат, һәјат кор тәсадүф нәтиҹәсиндә јараныб, јохса ону Аллаһ јарадыб? Мәгаләнин әввәлиндә ики физикачынын сөзләриндән ҝәтирилән ситат бу суала бир ҹүр ҹаваб верир, Мүгәддәс Китабын илк ајәси исә башга ҹүр. Һәр ики фикрин гызғын тәрәфдарлары вар. Мәшһур китабларда вә иҹтимаи дебатларда бу ики тәрәф арасында мүбаһисәләр сәнҝимәк билмир. Бунунла белә, чох адамын бу мөвзу илә бағлы конкрет мөвгеји јохдур.
Ола билсин, мүәллимләриниз әминликлә дејирләр ки, Каинат вә һәјат һечликдән јараныб, ону Аллаһ јаратмајыб. Бәс мүәллимләриниз Јараданын мөвҹуд олмадығына даир сүбутлар ҝәтирирләр? Диҝәр тәрәфдән, јәгин, дин рәһбәрләриндән ешитмисиниз ки, Јарадан вар. Бәс онлар буну неҹәсә сүбут едирләр? Јохса дејирләр ки, Јараданын варлығына шәкк етмәк олмаз, буна садәҹә инанмаг лазымдыр?
Јәгин, сиз дә бу суал барәдә фикирләшмисиниз. Бәлкә дә дүшүнмүсүнүз ки, Јараданын мөвҹуд олуб-олмадығыны һеч ким дәгиг дејә билмәз. Һәмчинин, ола билсин, фикирләшмисиниз: Бу суалын ҹавабыны билмәк нә дәрәҹәдә ваҹибдир?
«Ојанын!» журналынын бу сајында әввәлҹә бәзи фактлар ҝәтириләҹәк. Бу фактлар бир чох инсаны Јараданын вар олдуғуна әмин едиб. Сонра исә изаһ олунаҹаг ки, Каинатын вә јер үзүндә һәјатын неҹә јарандығы илә бағлы суала ҹаваб тапмаг нәјә ҝөрә ваҹибдир.