Фәсил 16

Ибадәт уғрунда гејрәт

МӘРЈӘМИН Исадан савајы да оғуллары вар: Јагуб, Јусиф, Шимон вә Јәһуда. Чох ҝүман ки, онлар Иса Мәсиһ вә онун шаҝирдләри илә бирликдә Капернаһума гајыдан баш зәрури шејләри ҝөтүрмәк үчүн әввәл Назарет шәһәриндәки евләринә ҝәлирләр.

Ҝөрәсән, Иса нә үчүн хидмәтинә Кана, Назарет вә ја Галилејанын јухары һиссәсинин башга бир јериндә давам етмәјиб, Капернаһума ҝедир? Биринҹиси, она ҝөрә ки, Капернаһум бөјүк шәһәрдир вә әлверишли мөвгедә јерләшиб. Икинҹиси дә, Исанын шаҝирдләринин әксәријјәти Капернаһумда вә онун әтрафында јашајыр. Белә олдугда онлар өз евләриндәҹә галыб Иса Мәсиһдән тәлим ала биләрләр.

Бир нечә ај сонра Иса өзү данышаҹаг ки, Капернаһумда оланда чохлу мөҹүзә ҝөстәриб. Инди исә ерамызын 30-ҹу илинин баһарыдыр. О, јолдашлары илә бирҝә јенидән сәфәрә чыхыр. Онлар Јерусәлимә Пасха бајрамына ҝедирләр. Јерусәлимдә шаҝирдләри ону башга бир јөндән таныјаҹаглар.

Аллаһын Ганунуна әсасән, исраиллиләр бајрамда һејван гурбанлары ҝәтирмәлидирләр. Буна ҝөрә дә алверчиләр ҹамаатын раһатлығы үчүн Јерусәлимдә һејван вә гуш базары ачыблар. Амма онлар алыш-вериши Аллаһа ибадәт едилән јердә, бирбаша мәбәдин ичиндә едир, үстәлик, гијмәтләри галдырыб адамлары сојурлар.

Иса Мәсиһ буну ҝөрәндә бәрк һиддәтләнир. О, кәндирдән бир гамчы дүзәлдиб алверчиләри мәбәддән говур. Сәррафларын масаларыны чевириб пулларыны дағыдыр. Ҝөјәрчин сатанларын үстүнә гышгырыр: «Бунлары јығышдырын бурадан! Бәсдир! Атамын евини базара чевирмисиниз!»

Шаҝирдләр буну ҝөрәндә Аллаһын Оғлу барәсиндәки: «Сәнин евин үчүн чәкдијим гејрәт мәни јандырыб-јахаҹаг» пејғәмбәрлији онларын јадына дүшүр. Јәһудиләр исә Исадан сорушурлар: «Һансы әламәтлә бизә сүбут едә биләрсән ки, бунлары етмәјә ихтијарын вар?» Иса белә ҹаваб верир: «Бу мәбәди дағыдын, мән ону үч ҝүнә бәрпа едәрәм».

Јәһудиләр елә билирләр ки, Иса мәбәдин бинасындан данышыр, буна ҝөрә дә сорушурлар: «Бу мәбәд гырх алты илә тикилиб, сән ону үч ҝүнә неҹә бәрпа едәҹәксән?» Анҹаг Иса мәбәд дејәркән өз бәдәнини нәзәрдә тутурду. Үч ил сонра о өләҹәк вә дириләҹәк. Һәмин вахт шаҝирдләри бу сөзләри хатырлајаҹаглар. Јәһја 2:12—22; Матта 13:55; Лука 4:23.

▪ Кана шәһәриндәки тојдан сонра Иса һаралара ҝедир?

▪ Иса нә үчүн һиддәтләнир вә нә едир?

▪ Онун бу һәрәкәтини ҝөрәндә шаҝирдләрин јадына нә дүшүр?

▪ «Бу мәбәд»лә бағлы Иса нә дејир вә бунун мәнасы нәдир?