Фәсил 82

Иса јенә Јерусәлимә ҝедир

ГЫСА бир мүддәтдән сонра Иса Мәсиһ јенә дә јолдадыр. О, шәһәрләрдән, кәндләрдән кечә-кечә халга тәлим верир. Ҝөрүнүр, Иса Јәһудејадан бахдыгда Иордан чајынын о тајында јерләшән Переја бөлҝәсиндәдир вә орадан Јерусәлимә ҝедир.

Јәһуди фәлсәфәсинә ҝөрә, мәһдуд сајда адам хилас олаҹагдыр. Јәгин, бу сәбәбдән бир адам Исадан сорушур: «Аға, доғрудан да, аз адам хилас олаҹаг?» Исанын вердији ҹаваб инсанлары хилас олмаг үчүн нәјин ваҹиб олдуғу үзәриндә дүшүнмәјә вадар едир. О дејир: «Дар гапыдан ҝирмәк үчүн вар ҝүҹүнүзлә чалышын».

Бу ҹүр сәјләр ваҹибдир, Исанын сөзүндән мәлум олур ки, «чохлары ҝирмәјә чалышаҹаг, лакин баҹармајаҹаглар». Нә үчүн баҹармајаҹаглар? Иса изаһ едир ки, ев јијәси дуруб гапыны бағлајанда адамлар бајырда галаҹаглар, онлар гапыны дөјүб дејәҹәкләр: «Аға, бизә гапыны ач». О исә ҹаваб верәҹәк: «Мән сизи танымырам. Мәндән әл чәкин, бәдәмәлләр!»

Бајырда галмыш адамлар, ҝөрүнүр, кефләри истәдији вахт ҝәлирләр. Лакин гуртулуш гапысы артыг бағланмыш вә килидләнмишдир. Ичәри ҝирмәк үчүн вахтында (һәтта бу онлар үчүн намүнасиб вахт олса да) ҝәлмәк лазым иди. Доғрудан да, вахты узадыб Јеһова Аллаһа ибадәти һәјатында биринҹи јерә гојмајанларын агибәти аҹы олаҹаг.

Иса јәһудиләрә хидмәт етмәк үчүн ҝөндәрилмишдир. Әфсуслар олсун ки, онларын чоху хилас үчүн Аллаһын ҝөрдүјү тәдбирдән имтина етмәклә ҝөзәл имканы әлдән бурахырлар. Буна ҝөрә дә Иса дејир ки, онлар бајыра атылдыгда һөнкүр-һөнкүр ағлајыб дишләрини гыҹајаҹаглар. Бунлардан фәргли олараг, «шәргдән вә гәрбдән, шималдан вә ҹәнубдан», јәни бүтүн милләтләрдән олан инсанлар «ҝәлиб Аллаһын падшаһлығында сүфрәјә әјләшәҹәкләр».

Иса сөзүнә давам едир: «Ахырынҹылардан [нифрәт һәдәфи олан гејри-јәһудиләр вә тапданыб әзилән јәһудиләр] кимиси биринҹи, биринҹиләрдән [варлы вә дини ҹәһәтдән нүфузлу јәһудиләр] кимиси ахырынҹы олаҹаг». Онларын ахырынҹы олмалары ҝөстәрир ки, бу лагејд вә нанкор адамлар Аллаһын Падшаһлығына ҝирмәјәҹәкләр.

Бу дәм фәрисејләр Исанын јанына ҝәлиб дејирләр: «Бурадан чых ҝет, Һирод [Антипа] сәни өлдүрмәк истәјир». Бәлкә дә бу шајиәни Һирод өзү јајыб ки, Иса бу бөлҝәдән гачыб ҝетсин. Ола билсин, Һирод Вәфтизчи Јәһјанын һадисәсиндә олдуғу кими, икинҹи дәфә Аллаһын пејғәмбәринин өлүмүндә ҝүнаһлы олмагдан горхур. Амма Иса онлара дејир: «Ҝедин, о түлкүјә дејин ки, бу ҝүн вә сабаһ ҹинләри говуб инсанлара шәфа верәҹәјәм вә үчүнҹү ҝүн ишими битирәҹәјәм».

Иса орада ишини битирдикдән сонра Јерусәлимә јолуну давам едир, чүнки о дејир: «Ола билмәз ки, пејғәмбәр Јерусәлимдән кәнарда гәтлә јетирилсин». Ахы нәјә ҝөрә Иса мүтләг Јерусәлимдә өлдүрүлмәли иди? Јерусәлим пајтахтдыр, јәһудиләрин али мәһкәмәси, 71 үзвдән ибарәт олан Синедрион орада јерләшир вә гурбанлары да Јерусәлимдә ҝәтирирләр. Буна ҝөрә дә «Аллаһын Гузусу» мәһз Јерусәлимдә гәтлә јетирилмәли иди.

«Еһ, Јерусәлим, Јерусәлим! — дејә Иса һејфсиләнир. — Пејғәмбәрләри гәтлә јетирән вә сәнә ҝөндәриләнләри даша басан Јерусәлим! Тојуг ҹүҹәләрини ганадынын алтына топладығы кими, мән дә сәнин өвладларыны нечә дәфә бу ҹүр јығмаг истәдим. Һејф, истәмәдиниз! Бу Ев тәрк едилиб сизә бош галаҹаг». Халг Аллаһын Оғлуну рәдд етдијиндән өзүнү мәһвә дүчар едир.

Иса Јерусәлимә ҝедәркән јолда ону фәрисејләрин рәһбәрләриндән биринин евинә дәвәт едирләр. Шәнбә ҝүнү олдуғундан адамлар диггәтлә Исаја ҝөз гојурлар. Орада бәдәнинә, ола билсин, голларына, ајагларына су јығылан бир хәстә вар. Иса орадакы фәрисејләрә вә гануншүнаслара суал верир: «Неҹә билирсиниз, гануна ҝөрә шәнбә ҝүнү адам сағалтмаг олар, ја јох?»

Һамы сусур. Онда Иса хәстәјә тохунуб сағалдыр вә ону јола салыр. Сонра сорушур: «Һансынызын оғлу вә ја өкүзү шәнбә ҝүнү гујуја дүшсә, дәрһал ону орадан дартыб чыхармаз?» Јенә дә һеч кәсдән сәс чыхмыр. Лука 13:22—14:6; Јәһја 1:29.

▪ Иса хилас олмаг үчүн нәјин ваҹиб олдуғуну ҝөстәрир вә нә үчүн чохлары чөлдә галыр?

▪ Биринҹи олаҹаг «ахырынҹылар» вә ахырынҹы олаҹаг «биринҹиләр» кимләрдир?

▪ Һиродун Исаны өлдүрмәк истәји һаггындакы шајиә нәдән доға биләр?

▪ Нәјә ҝөрә пејғәмбәр мәһз Јерусәлимдә гәтлә јетирилмәли иди?