Фәсил 93

Инсан Оғлу зүһур едәндә

ИСА МӘСИҺ шималда (Самаријада, јахуд Галилејада) олдуғу вахт фәрисејләр Аллаһын Падшаһлығынын нә вахт ҝәләҹәји барәдә она суал верирләр. Онлар елә билирләр ки, Падшаһлыг бөјүк тәмтәраг вә тәнтәнә илә ҝәләҹәк. Лакин Иса дејир: «Аллаһын падшаһлығы ачыг-ашкар тәрздә ҝәлмәјәҹәк. Онун барәсиндә: “Бахын, бурададыр” вә ја: “Орададыр”, — демәјәҹәкләр. Чүнки Аллаһын падшаһлығы араныздадыр».

Исанын дедији «араныздадыр» сөзүнү бәзән «ичиниздәдир» кими тәрҹүмә едирләр, бу сәбәбдән бәзиләри елә дүшүнүр ки, Падшаһлыг Аллаһын хидмәтчиләринин үрәјиндәдир. Лакин Аллаһын Падшаһлығы Исанын һәмин вахт сөһбәт етдији бу имансыз фәрисејләрин үрәјиндә һеч ҹүр ола билмәзди. Әслиндә, Падшаһлығын тәјин едилмиш падшаһы Иса Мәсиһ онларла олдуғу үчүн Аллаһын Падшаһлығы онларын арасындадыр.

Еһтимал ки, фәрисејләр ҝедәндән сонра Иса Падшаһлығын ҝәлиши һаггында шаҝирдләринә данышыр. О, ҝәләҹәкдә падшаһ кими иштиракыны вурғулајараг онлары хәбәрдар едир: «Сизә: “Орададыр!”, јахуд: “Бурададыр!” — дејәҹәкләр. Онларын далынҹа дүшүб ҝетмәјин. Чүнки шимшәк чаханда ҝөјүн бир уҹундан о бири уҹуна гәдәр неҹә парлајырса, инсан Оғлунун зүһур ҝүнүндә дә белә олаҹаг». Беләҹә, Исанын сөзләриндән мәлум олур ки, шимшәк бүтүн ҝөј үзүндә ҝөрүндүјү кими, онун падшаһлыг тахтына чыхмасы да ону ҝөзләјәнләр үчүн ајдын ҝөрүнәҹәк.

Сонра Иса ҝәләҹәк һадисәләри гәдимдә олмуш һадисәләрлә мүгајисә едәрәк өзүнүн иштиракы заманы инсанларда һансы әһвали-руһијјә олаҹағыны ҝөстәрир: «Нуһун ҝүнләриндә олдуғу кими, инсан Оғлунун ҝүнләриндә дә елә олаҹаг... Лутун ҝүнләриндә дә белә иди: инсанлар јејир-ичир, алыр-сатыр, әкир, ев тикирдиләр. Амма Лут Содомдан чыхдығы ҝүн ҝөјдән атәш вә күкүрд јағыб һамыны мәһв етди. Инсан Оғлунун зүһур ҝүнүндә дә белә олаҹаг».

Иса һеч дә демир ки, Нуһун вә Лутун мүасирләри сырф јемәк-ичмәк, алгы-сатгы, әкмәк вә тикмәк кими нормал ишләрә ҝөрә мәһв едилдиләр. Нуһ вә Лут да өз аиләләри илә бирҝә бу ишләри ҝөрүрдүләр. Башгалары исә бу ишләри ҝөрүр, лакин Аллаһын нијјәтинә мәһәл гојмурдулар. Онлар мәһз буна ҝөрә мәһв едилдиләр. Бу дүнјанын үзәринә бөјүк мүсибәт ҝәлән заман Иса зүһур едәндә дә инсанлар бу сәбәбдән мәһвә уғрајаҹаглар.

Иса өзүнүн ҝәләҹәкдә падшаһлыг тахтында отурдуғуна ишарә едәҹәк әламәти ҝөрәркән јубанмадан һәрәкәтә кечмәјин ваҹиблијини вурғулајыр: «О ҝүн ким дамда оларса, әшјаларынын далынҹа евә дүшмәсин; тарлада олан да ҝери гајытмасын. Лутун арвадыны һеч вахт јадыныздан чыхармајын».

Инсанлар Мәсиһин иштиракынын ачыг-ајдын әламәтини ҝөрәндә јол вермәмәлидирләр ки, вар-дөвләтә олан бағлылыг онлары јубандырсын. Содомдан чыханда Лутун арвады, ҝөрүнүр, шәһәрдә гојдуғу шејләринә ҝөрә һејфсиләниб ҝеријә бахды вә дуз сүтунуна чеврилди.

Иса сөһбәтинә давам едир: «Һәмин ҝеҹә ики нәфәр бир јатагда олаҹаг. Бири ҝөтүрүләҹәк, о бириси галаҹаг. Бир дәјирманда ики гадын дән үјүдәҹәк. Бири ҝөтүрүләҹәк, о бириси галаҹаг».

Бир нәфәрин ҝөтүрүләҹәји фикри Нуһун өз аиләси илә ҝәмијә ҝирмәсинә вә мәләкләрин Луту аиләси илә Содомдан чыхартмасына ујғун ҝәлир. Бу, хилас демәкдир! «О бириси галаҹаг» ифадәси исә мәһви билдирир.

Бу вахт шаҝирдләр сорушурлар: «Аға, һара?»

Иса ҹаваб верир: «Ҹәсәд һарададырса, гарталлар да ора јығышаҹаг». Хилас үчүн «ҝөтүрүләнләр» ити ҝөзлү гартала бәнзәјирләр, чүнки «ҹәсәдин» үстүнә топлашырлар. «Ҹәсәд» һәгиги Мәсиһин сәмави Падшаһлыгда падшаһ кими иштиракыны вә Јеһова Аллаһын вердији руһани зијафәти билдирир. Лука 17:20—37; Јарадылыш 19:26.

▪ Падшаһлыг һансы мәнада фәрисејләрин арасында иди?

▪ Мәсиһин иштиракы һансы мәнада шимшәјә бәнзәјир?

▪ Нә үчүн инсанлар Мәсиһин иштиракы заманындакы ишләринә ҝөрә мәһв едиләҹәкләр?

▪ «Ҝөтүрүлмәк» вә «галмаг» нә демәкдир?