Теократик Хидмәт Мәктәбинә хош ҝәлмисиниз
БҮТҮН дүнјада, 200-дән чох өлкәдә јашајан милјонларла инсан һәр һәфтә Теократик Хидмәт Мәктәбиндә тәлим алыр. Бәзиләри бу мәктәбә тәзәликҹә, диҝәрләри исә артыг узун илләрдир јазылыблар. Мәктәб он минләрлә јердә кечирилир. Һарада јашамағыныздан асылы олмајараг, сиз дә ејни програм үзрә тәлим ала биләрсиниз. Һәр јашдан, етник групдан олан мүхтәлиф тәһсилли инсанлар пулсуз олараг бу теократик тәлими алырлар.
Бу мәктәб 1943-ҹү илдә Јеһованын Шаһидләринин јығынҹагларында тәсис едиләндә онун мәгсәдинин «Аллаһын Кәламыны ешидиб, она иман ҝәтирдијини сүбут едән бүтүн ‘садиг инсанлары’ ‘башгаларыны өјрәтмәк үчүн’ һазырламаг... беләликлә дә, һәр бирини... малик олдуглары үмиди ачыгҹа бәјан етмәк үчүн даһа јахшы тәҹһиз етмәк» олдуғу билдирилмишди («Теократик Хидмәт курсу», с. 4). Мәктәб бу ҝүн дә ејни мәгсәдә хидмәт едир.
Аллаһын бизә бәхш етдији нитг габилијјәтиндән ән јахшы шәкилдә неҹә истифадә едә биләрик? Мүгәддәс Китаб ҹаваб верир: «Еј бүтүн ҹанлы варлыглар, Рәббә һәмд един!» (Мәз. 150:6) Белә едәндә сәмави Атамызын гәлбини севиндиририк. Үрәјимизин Онун јахшылыг вә мәһәббәтинә ҹаваб олараг миннәтдарлыгла долу олдуғуну ҝөстәририк. Тәәҹҹүблү дејил ки, мәсиһчиләр ‘һәмишә Аллаһа һәмд гурбаныны, јәни Онун адыны играр едән додагларын бәһрәсини тәгдим етмәјә’ тәшвиг олунурлар (Ибр. 13:15). Јеһованын бәхш етдији габилијјәтләрдән Она һәмд етмәк үчүн даһа јахшы истифадә етмәјә көмәк етмәк мәгсәди илә сизи Теократик Хидмәт Мәктәбиндә саламлајырыг.
Мәктәбдә аудиторија гаршысында охумаға, натиглик вә өјрәтмәк мәһарәтинә даһа чох диггәт јетирилсә дә, Теократик Хидмәт Мәктәбиндәки тәлимин фајдалары тәкҹә бундан ибарәт дејил. Мәктәбдә охудугҹа сизә охумаг, динләмәк, јадда сахламаг, өјрәнмәк, арашдырмаг, тәһлил етмәк вә груплашдырмаг, сөһбәт етмәк, суаллара ҹаваб вермәк вә фикирләри јазылы ифадә етмәк кими баҹарыглара јијәләнмәјә көмәк едиләҹәк. Мәктәбдәки тәдрис програмынын, шәрһләрин вә тәгдимәләрин әсасыны Мүгәддәс Китаб вә она әсасланан нәшрләр тәшкил едәҹәк. Зеһнинизи Аллаһын Кәламында олан дәјәрли һәгигәтләрлә долдурдугҹа, Јеһова кими дүшүнмәји өјрәнәҹәксиниз. Бу, һәјатын һәр бир саһәсиндә мүтләг фајда ҝәтирәҹәк! Аллаһын Кәламынын дәјәри һаггында ХХ әсрин университет мүәллими Вилјам Лајон Фелпс јазмышдыр: «Мүгәддәс Китабы дәриндән билән һәр кәси савадлы адландырмаг олар... Мән дүшүнүрәм ки, университет тәһсили олмадан Мүгәддәс Китабы билмәк, Мүгәддәс Китабдан бихәбәр олуб али тәһсилли олмагдан даһа дәјәрлидир».
Там фајда әлдә етмәк неҹә мүмкүндүр?
Сөзсүз ки, Теократик Хидмәт Мәктәбиндә верилән тәлимдән там фајда әлдә етмәк үчүн мәктәбдә охујан өзү чалышмалыдыр. Һәвари Павел мәсиһчи әмәкдашы Тимотеји тәшвиг едирди: «Бу ишләрә фикир вер вә онларла мәшғул ол ки, сәнин тәрәггин һамыја ашкар олсун» (1 Тим. 4:15). Бәс бунун үчүн сиз нә едә биләрсиниз?
Мүмкүндүрсә, Теократик Хидмәт Мәктәбинә һәр һәфтә ҝәлин. «Теократик Хидмәт Мәктәбиндә тәлим алырыг» дәрслијиндән сәмәрәли шәкилдә истифадә един. Китабын биринҹи сәһифәсиндә ајрылмыш јердә адынызы јазын. Мәктәбә ҝәләндә китабы һәмишә өзүнүзлә ҝәтирин. Бу дәрсликдә, һәмчинин гејдләр апармаг олар. Китабдан өзүнүз үчүн фајдалы олан ваҹиб фикирләри охујанда алтындан хәтт чәкин. Сәһифәләрин кәнарларында бурахылмыш ҝениш бош јерләрә мәктәбдәки мүзакирә заманы өјрәндијиниз фајдалы фикирләри гејд един.
Теократик Хидмәт Мәктәбинин чап олунмуш програмы ајрыҹа тәгдим олунур. Програмда мәктәбин неҹә кечириләҹәји дә изаһ едилир. Һәмишә әлинизин алтында олмасы үчүн програмы китабын арасында сахлаја биләрсиниз.
Мәктәбин һәфтәлик һиссәләринә һазырлашаркән јадда сахлајын ки, әсас дәрслик Мүгәддәс Китабдыр. Илк нөвбәдә Мүгәддәс Китабын һәмин һәфтә үчүн нәзәрдә тутулан фәсилләрини охујун. Диҝәр бәндләрин материалы илә дә габагҹадан таныш олсаныз, јахшы олар.
Програмын бәзи һиссәләриндә динләјиҹиләрин дә иштирак етмәк имканы олур. Бундан там фајда әлдә етмәјә чалышын. Ешитдикләринизи јадда сахламаг вә шәхси һәјатынызда тәтбиг етмәк үчүн белә мүзакирәләрдә иштирак етмәк ваҹиб амилдир.
Сөзсүз ки, һәр бир шаҝирдин јығынҹаг гаршысында чыхыш етмәк, јахуд сәһнәҹик ҝөстәрмәк имканы олаҹаг. Һәр бир фүрсәтдән истифадә един. Сизә верилән һәр дәрси јахшы јеринә јетирмәк үчүн ҹидд-ҹәһдлә чалышын. Даим тәрәгги етмәниз үчүн сизә мәсләһәтләр вериләҹәк. Белә көмәји мәмнунијјәтлә гәбул един. Тәрәгги етмәјиниз үчүн верилән мәсләһәтләри китабынызда гејд един. Өзүмүзү кәнардан ҝөрмәк чәтин олдуғундан, Мүгәддәс Китаба әсасланараг мәһәббәтлә верилән мәсләһәтләр вә ҝөстәришләр тәрәггинизә әһәмијјәтли дәрәҹәдә көмәк едә биләр. Бу, һәтта мәктәбә чохдан јазыланлара да аиддир (Сүл. мәс. 1:5).
Даһа тез тәрәгги етмәк истәјирсинизми? Өзүнүз тәшәббүс ҝөстәрсәниз, бу мүмкүндүр. Шаҝирдләрин тапшырығынын мөвзусуну габагҹадан арашдырын. Бу һалда, кимисә әвәз етмәк лазым ҝәләрсә, өз көмәјинизи тәклиф едә биләҹәксиниз вә бунун да сајәсиндә тәҹрүбәниз артаҹаг. Башгалары чыхыш едәндә материалы неҹә тәгдим етдикләринә диггәтлә гулаг асын. Чүнки биз бир-биримиздән өјрәнирик.
Һәмчинин, шәраитиниз јол верирсә, дәрслији әввәлҹәдән шәхсән өјрәнсәниз, даһа тез тәрәгги едәрсиниз. Нөвбәти 15 фәсли јахшы өјрәндикдән сонра 78-ҹи сәһифәдән башлајан «Натиглик вә мүәллимлик габилијјәтини инкишаф етдирмәк үчүн програм» васитәсилә чалышмаға давам един. Әввәлҹә һәр дәрси өјрәнин, сонра она аид верилән чалышманы јеринә јетирин. Өјрәндикләринизи хидмәтдә тәтбиг един. Бу, натиг вә Аллаһын Кәламынын мүәллими кими инкишафыныза бөјүк тәкан олаҹаг.
Теократик Хидмәт Мәктәбиндә алдығыныз тәлим сизи һәјатда ваҹиб ишләрин өһдәсиндән ҝәлмәјә һазырлајаҹаг. Аллаһын ирадәси илә мөвҹуд олдуғумуз үчүн һәјатымызын әсас мәгсәди Ону иззәтләндирмәк олмалыдыр. Јеһова Аллаһ ән јүксәк һәмдә лајигдир (Вәһј 4:11). Мәктәбдә алдығымыз тәлим бу ишдә бизә көмәк едир, чүнки биз ајдын дүшүнмәји, мүдрик давранмағы вә Аллаһын илһамланмыш Кәламындакы мөһтәшәм һәгигәтләри еффектив сурәтдә чатдырмағы өјрәнирик.