Әјани вәсаитләрдән јахшы истифадә ет

ТӘЛИМ верәркән нә үчүн әјани вәсаитләрдән истифадә етмәк лазымдыр? Чүнки бу, вердијимиз тәлими даһа тәсирли едир. Јеһова Аллаһ вә Иса Мәсиһ әјани вәсаитләрдән истифадә едирдиләр, биз дә онлардан буну өјрәнә биләрик. Фикри сөзләрлә изаһ етмәклә јанашы, әјани вәсаитләрдән дә истифадә етдикдә мәлумат ики орган васитәсилә гәбул едилир. Бу, динләјиҹиләрин диггәтинин мөвзудан јајынмамасына көмәк едәҹәк вә дедикләримизин онлара даһа бөјүк тәсир бағышламасына имкан јарадаҹаг. Хош хәбәри тәблиғ едәркән әјани вәсаитләрдән неҹә истифадә едә биләрсән? Онлардан јахшы истифадә етдијинә неҹә әмин ола биләрсән?

Ән бөјүк Мүәллимләр әјани вәсаитләрдән неҹә истифадә едирдиләр? Јеһова һәјати ваҹиб дәрсләр вермәк үчүн јаддашлардан силинмәјән әјани вәсаитләрдән истифадә едирди. Бир ҝеҹә О, Ибраһими бајыра чыхарыб белә деди: «Ҝөјә бах, орадакы улдузлары саја биләрсәнсә, сај... Нәслин о гәдәр олаҹаг» (Јар. 15:5). Инсан нөгтеји-нәзәриндән гејри-мүмкүн бир шеј кими ҝөрүнсә дә, бу вәд Ибраһимә ҝүҹлү тәсир бағышламыш вә о, Јеһоваја иман етмишди. Башга бир һалда, Јеһова дулусчунун ҝилә неҹә форма вердијини мүшаһидә етмәси үчүн Јеремјаны онун емалатханасына ҝөндәрмишди. Јараданын инсанларын үзәриндә һансы һакимијјәтә саһиб олдуғуну ҝөстәрмәк үчүн бу, неҹә дә унудулмаз дәрс иди! (Јер. 18:1-6). Јахуд Јунус Јеһованын она ҝәнәҝәрчәк биткисилә вердији мәрһәмәт дәрсини неҹә унуда биләрди? (Јун. 4:6-11). Јеһова һәтта Өз пејғәмбәрләринә ҝәләҹәклә бағлы хәбәрләри мүәјјән әшјалардан истифадә едәрәк әјани шәкилдә ҝөстәрмәји тапшырырды (1 Пад. 11:29-32; Јер. 27:1-8; Јез. 4:1-17). Һүзур чадырынын вә мәбәдин өзү дә ҝөјләрдәки ҝерчәклији баша дүшмәјимизә көмәк едән нүмунәләрдир (Ибр. 9:9, 23, 24). Аллаһ, һәмчинин ваҹиб мәлуматлары чатдырмаг үчүн дәфәләрлә ҝөрүнтүләрдән истифадә етмишди (Јез. 1:4-28; 8:2-18; Һәв. иш. 10:9-16; 16:9, 10; Вәһј 1:1).

Бәс Иса әјани вәсаитләрдән неҹә истифадә едирди? Фәрисејләр вә Һиродун адамлары ону сөздә тутмаға чалышанда Иса бир динар истәди вә диггәти онун үстүндәки Гејсәрин тәсвиринә јөнәлтди. Сонра баша салды ки, гејсәрә мәхсус шејләри гејсәрә, Аллаһа мәхсус шејләри Аллаһа вермәк лазымдыр (Мат. 22:19-21). Малик олдуғумуз һәр шејлә Аллаһы иззәтләндирмәји өјрәтмәк үчүн Иса мәбәддә ики лептон — ахырынҹы пулуну ианә едән касыб дул гадына диггәти јөнәлтди (Лука 21:1-4). Диҝәр һалда исә о, шаҝирдләринә шөһрәтпәрәстликдән узаг вә тәвазөкар олмаға даир дәрс вермәк үчүн нүмунә олараг балаҹа ушағы јанына чағырыб ҝөстәрди (Мат. 18:2-6). Иса, һәмчинин шаҝирдләринин ајагларыны јујараг тәвазөкарлығын нә демәк олдуғуну нүмајиш етдирди (Јәһ. 13:14).

Әјани вәсаитләрдән истифадә етмәјин үсуллары. Јеһовадан фәргли олараг, биз инсанлара ҝөрүнтүләр васитәсилә мәлумат чатдыра билмәрик. Анҹаг Јеһованын Шаһидләринин нәшрләриндә инсаны дүшүндүрән чохлу шәкилләр олур. Марагланан инсанларын зеһниндә Аллаһын Кәламында вәд едилән јерүзү Ҹәннәти ҹанландырмаг үчүн онлардан истифадә ет. Мүгәддәс Китаб өјрәнмәси заманы өјрәнәнин диггәтини арашдырылан мөвзуја аид шәклә јөнәлдиб орада ҝөрдүкләрини тәсвир етмәсини хаһиш етмәк олар. Диггәтәлајигдир ки, Амос пејғәмбәрә ҝөрүнтүләр верәркән Јеһова ондан сорушмушду: «Амос, сән нә ҝөрүрсән?» (Амос 7:7, 8; 8:1, 2). Инсанын диггәтини әјани вәсаит кими нәзәрдә тутулмуш шәкилләрә јөнәлдәркән сән дә белә суаллар верә биләрсән.

Ријази һесабламалары јазсан вә ја ваҹиб һадисәләрин тарихи ардыҹыллығыны чәкиб ҝөстәрсән, өјрәнән Даниел 4:16 ајәсиндәки «једди ил» вә Даниел 9:24 ајәсиндәки «јетмиш дәфә једдииллик дөвр» кими пејғәмбәрликләри даһа асан баша дүшәҹәк. Бу ҹүр әјани вәсаитләрә бизим тәлим нәшрләримиздә раст ҝәлмәк олар.

Аиләви өјрәнмә заманы шәкилләрдән вә схемләрдән истифадә етсән, Һүзур чадыры, Јерусәлимдәки мәбәд, Језекелин ҝөрүнтүдә ҝөрдүјү мәбәд кими мөвзулары баша дүшмәк асан олаҹаг. Бу ҹүр шәкилләри вә схемләри «Мүгәддәс Јазыларын дәрк едилмәси» енсиклопедијасында (инҝ.), «Мүгәддәс Јазыларын гејдләрлә Јени Дүнја Тәрҹүмәси»нин әлавәләр бөлмәсиндә (инҝ.) вә «Ҝөзәтчи Гүлләси» журналынын мүхтәлиф сајларында тапмаг олар.

Мүгәддәс Китабы аиләви охујанда хәритәләрдән истифадә етмәји јаддан чыхарма. Ибраһимин Урдан Һарана, орадан да Бет-Елә сәјаһәтини хәритәдә изләјин. Исраил халгынын Мисири тәрк едиб Вәд едилмиш дијара ҝедәркән һаралардан кечдијинә бахын. Исраилин һәр гәбиләсинә мирас кими верилән торпагларын јерини тапын. Сүлејманын һөкмранлыг етдији әразинин һүдүдларыны мүәјјәнләшдирин. Изевелин тәһдидләриндән горхараг Илјасын Изреелдән гачыб Беер-Шеванын о тајындакы сәһралыға ҝетдији јолу изләјин (1 Пад. 18:46–19:4). Исанын тәблиғ етдији шәһәр вә кәндләри тапын. Павелин «Һәвариләрин ишләри» китабында тәсвир олунан сәјаһәтләрини изләјин.

Мүгәддәс Китабы өјрәнәнләри јығынҹағын фәалијјәти илә таныш етмәкдә дә әјани вәсаитләрин көмәји дәјир. Өјрәтдијин адама конгресин програм вәрәгәсини ҝөстәриб конгресләрдә адәтән һансы мөвзуларын мүзакирә едилдијини изаһ едә биләрсән. Падшаһлыг Залында вә ја Јеһованын Шаһидләринин филиалында екскурсијада оларкән бир чохларына ҝөрдүкләри бөјүк тәсир бағышламышды. Бу, бизим фәалијјәтимиз вә мәгсәдимиз һагда јаранан јанлыш фикирләри арадан галдырмаг үчүн ҝөзәл үсул ола биләр. Падшаһлыг Залында екскурсија кечирәркән буранын диҝәр ибадәт јерләриндән нә илә фәргләндијини ҝөстәр. Мүһитин тәлим алмаг үчүн јарарлы, ејни заманда садә олдуғуну вурғула. Бир чох шејин — әдәбијјат пајланан столун, јығынҹағын әразисинин хәритәләринин вә (сәдәгә топланан габлардан фәргли олан) ианә гутуларынын хүсуси олараг тәблиғ хидмәти үчүн нәзәрдә тутулдуғуну ҝөстәр.

Әҝәр Рәһбәрлик Шурасынын нәзарәти алтында һазырланан видео филмләр варса, өјрәнәнин Мүгәддәс Китаба етибарыны артырмаг, ону Јеһованын Шаһидләринин фәалијјәти илә таныш етмәк вә Мүгәддәс Китаб принсипләринә ујғун јашамаға тәшвиг етмәк үчүн бу вәсаитләрдән истифадә ет.

Бөјүк груп гаршысында истифадә едилән әјани вәсаитләр. Јахшы һазырланан вә мәһарәтлә тәгдим едилән әјани вәсаитләр бөјүк група тәлим вермәк үчүн дә јахшы васитәдир. Онлар садиг вә ағыллы гул синфи тәрәфиндән мүхтәлиф васитәләрлә тәгдим олунур.

Адәтән «Ҝөзәтчи Гүлләси»нин өјрәнмә мәгаләләриндә әјани вәсаитләр рәсмләр шәклиндә олур. Ҝөрүшү апаран гардаш ваҹиб мәгамлары вурғуламаг үчүн онлардан истифадә едә биләр. Бу, Јығынҹағын Мүгәддәс Китаб өјрәнмәсиндә истифадә едилән нәшрләрә дә аиддир.

Бәзи ачыг мәрузәләрин планы мүәјјән мәгамлары изаһ етмәк үчүн әјани вәсаитләрдән истифадә етмәјә зәмин јарадыр. Анҹаг диггәти динләјиҹиләрин әксәријјәтинин әлиндә тутдуғу Мүгәддәс Китаба јөнәлтмәк адәтән даһа јахшы нәтиҹәни верир. Әҝәр чыхышын бир вә ја бир нечә әсас фикрини чатдырмаг үчүн шәкилдән истифадә етмәк вә ја әсас бәндләрин сијаһысыны ҝөстәрмәк лазым ҝәлсә, әјани вәсаитин ән арха сыралардан да ҝөрүндүјүнү (вә ја охундуғуну) габагҹадан јохла. Белә үсулдан тез-тез истифадә етмәк мәсләһәт ҝөрүлмүр.

Данышаркән вә ја тәлим верәркән әјани вәсаитләрдән истифадә етмәкдә мәгсәдимиз динләјиҹиләри әјләндирмәк јох, хүсуси диггәтә лајиг олан фикирләри әјани изаһ едәрәк онларын тәсирини ҝүҹләндирмәк олмалыдыр. Истифадә олунан әјани вәсаит исә санбаллы олмалыдыр. Фикирләри ајдынлашдырмаға, асанлыгла баша дүшмәјә көмәк етдији, јахуд дејиләнләрин әсаслы олдуғуна тутарлы дәлил кими ҝәтирилдији һалда әјани вәсаит фајдалы мәгсәдә хидмәт едир. Дүзҝүн истифадә едилдикдә мүнасиб әјани вәсаит динләјиҹиләрдә елә дәрин тәәссүрат ојада биләр ки, һәм әјани вәсаитин өзү, һәм дә чатдырдығы фикир узун илләр онларын јадында галар.

Һәм ҝөрмә, һәм дә ешитмә габилијјәти тәлим просесиндә мүһүм рол ојнајыр. Ән бөјүк Мүәллимләрин бу габилијјәтләрдән неҹә истифадә етдијини һәмишә јадында сахла вә инсанларын үрәјинә јол тапмаға чалышаркән онларын нүмунәсини тәглид ет.