“Јегова мәнә гаршы чох мәрһәмәтлидир!”
БИР дәфә 1985-ҹи илин март ҝеҹәләриндән бириндә Јегованын Шаһидләринин Нју-Јоркдакы үмумдүнја мәркәзи идарәсинин јазычылар шө’бәсиндән олан баҹы-гардашлар әламәтдар бир тарихи гејд етмәк үчүн, ҝөзәл бир мүһитдә топлашдылар: Карл Клејн өмрүнүн 60 илини таммүддәтли хидмәтдә кечирмишдир. Клејн гардаш бөјүк руһ јүксәклији илә “Јегованын она гаршы чох мәрһәмәтли” олдуғуну сөјләди. О, Мәзмур 37:4-ҹү ајәсинин онун ән севимли Мүгәддәс Китаб ајәси олдуғуну билдирди. Сонра исә һамы бөјүк мәмнунијјәтлә онун виолончелдә ифа етдији мусигини динләди.
Сонракы 15 ил әрзиндә Клејн гардаш јазычылар шө’бәсинин бир үзвү кими ишини давам едир вә Јегованын Шаһидләринин Рәһбәрлик шурасында хидмәт едирди. 2001-ҹи ил јанварын 3-дә, Аллаһын садиг хидмәтчиси олан 95 јашлы Карл Клејн өзүнүн јер үзүндәки һәјатыны баша чатдырды.
Карл Алманијада анадан олмушдур. Онун аиләси Бирләшмиш Штатлара көчмүш, буна ҝөрә дә Карл Чикагоја јахын олан гәсәбәдә (Иллинојс штатында) бөјүмүшдүр. Артыг ушаг вахтларындан Карл вә онун балаҹа гардашы Тед, Мүгәддәс Китаба дәрин мараг ҝөстәрмәјә башламышлар. Карл 1918-ҹи илдә вәфтиз олунду, 1922-ҹи илдә исә Мүгәддәс Китабын Тәдгигатчыларынын конгресиндәки һәјәҹанландырыҹы мә’рузәләр онда тәблиғ хидмәтинә өмүрлүк мәһәббәт атәшини аловландырды. О, тәблиғсиз бир һәфтә дә јашаја билмәзди, һәтта һәјатынын сон һәфтәләриндә белә тәблиғ едирди.
Карл 1925-ҹи илдә Јегованын Шаһидләринин мәркәзи идарәсинин үзвү олду вә илк вахтлар чапханада ишләди. О, мусигини ҹошгун һәвәслә севирди вә мусигиси мәсиһчи радиоверилишләриндә сәсләнән оркестрин тәркибиндә бир нечә ил виолончел чалмышды. Сонра о, хидмәти шө’бәдә ишләмиш вә нәзарәтчиси Т. Салливанла мөһкәм достлуг етмишди. Карлын гардашы Тед евләнди вә арвады Дорислә бирликдә миссионер кими Пуерто-Рикоја ҝөндәрилди.
Карл Клејн тәдгигатлар апармағы хошладығына вә Мүгәддәс Китабын билијинә дәриндән саһиб олдуғуна ҝөрә, јазычылар шө’бәсиндә јарым әср хидмәт етмиш вә бу шө’бәнин ишини зәнҝинләшдирмишдир. 1963-ҹү илдә Карл, Боливијада хидмәт едән Алманијалы Маргарета адлы миссионерлә евләнди. Маргаретанын ҝөстәрдији мәһәббәт вә һимајә, хүсусән дә сағламлығы писләшән заман, ишләмәк габилијјәтини горујуб сахламагда Карла көмәк едирди. О, һәтта гоҹалыг дөврүндә дә — инсанларын әксәријјәтинин тәгаүдә чыхдыглары бир вахтда — сәмәрәли ишләјә билирди. О, тәбии сәмимилији вә мусигијә олан шөвгү сајәсиндә топлантыларда вә конгресләрдә унудулмаз мә’рузәләрлә чыхыш едә билирди. Өлүмүндән бир аз әввәл Нју-Јоркдакы Бејт-ел аиләсиндә сәһәр ибадәтини апарараг ҝүндәлик ајәни арашдырырды, бу исә һамыја бөјүк севинҹ вә фајда ҝәтирирди.
“Ҝөзәтчи Гүлләси” журналынын даими охуҹуларынын чоху, 1984-ҹү ил, 1 октјабр (инҝ.) бурахылышында чап олунмуш, Карл гардашын ачыг јазылмыш тәрҹүмеји-һалыны хатырлајырлар. Онун јазылышындан сонракы 15 ил әрзиндә Карл Клејнин Аллаһа садиг бир мәсиһчи кими хидмәт етдијини хатырлајараг, бу һәјати тарихи дәфәләрлә мәмнунлугла охумаг олар.
Рәббин мәсһ едилмишләриндән бири кими, Клејн гардаш ҝөјдә Мәсиһлә бирликдә рәһбәрлик етмәји сәмими гәлбдән арзу едирди. Онун, бу истәјинин Јегова тәрәфиндән јеринә јетирилдијинә әмин олмаг үчүн һәр бир әсасымыз вардыр (Лука 22:28—30).
[31-ҹи сәһифәдәки шәкил]
Карл 1943-ҹү илдә Т. Салливан, Тед вә Дорислә бирликдә.
[31-ҹи сәһифәдәки шәкил]
Карл вә Маргарета, 2000-ҹи илин октјабр ајы.