Охуҹуларын суаллары
Тәквин 38:15, 16 ајәләринә әсасән, һансы вәзијјәт Јәһуданын фаһишә сандығы гадынла ҹинси әлагәдә олмасына ҝәтириб чыхарды?
Јәһуда фаһишә сандығы гадынла доғрудан да ҹинси әлагәдә олса да, әслиндә һәмин гадын фаһишә дејилди. “Тәквин” китабынын 38-ҹи фәслинә әсасән, һадисә белә олмушдур.
Јәһуданын илк оғлу вә Тамарын әри “Рәббин [“Јеһованын”, ЈД] ҝөзүндә пис” олдуғу үчүн, өзүндән сонра нәсил гојмадан өлдүрүлдү (Тәквин 38:7). Һәмин дөврүн адәти үзрә, киши өзүндән сонра нәсил гојмадан өлдүкдә, гардашы онун дул галмыш арвады илә евләнмәли вә нәсил јетишдирмәли иди. Лакин Јәһуданын икинҹи оғлу Онан өз вәзифәсини јеринә јетирмәкдән имтина етди. Буна ҝөрә Аллаһ ону да өлдүрдү. Бу заман Јәһуда ҝәлини Тамары атасынын евинә ҝөндәрди ки, үчүнҹү оғлу Шела онунла евләнмәк үчүн кифајәт гәдәр бөјүјәнә гәдәр орада галсын. Вахты ҝәлиб чатанда Јәһуда Шеланы Тамар илә евләндирмәди. Буна ҝөрә дә, Јәһуданын арвады өләндән сонра, Тамар исраилли гајынатасы Јәһудадан нәсил јетишдирмәјин үсулуну тапды. О, мә’бәд фаһишәси палтары ҝејиниб, Јәһуданын ҝәлиб-кечмәли олдуғу јолун кәнарында отурду.
Јәһуда Тамары танымајыб, онунла интим әлагәјә ҝирди. Тамар исә еһтијат үчүн әвәзиндә онун бә’зи әшјаларыны ҝөтүрдү вә сонрадан онларын көмәјилә Јәһудадан һамилә олдуғуну сүбут етди. Һәгигәтин үстү ачыланда Јәһуда Тамары ҝүнаһландырмады, әксинә, һәлимликлә е’тираф етди: “О мәндән һаглыдыр, чүнки ону оғлум Шелаја вермәдим”. Вә тәбии ки, Јәһуда “онунла бир даһа јахынлыг етмәди” (Јарадылыш 38:26, МКШ).
Јәһуда Тамары, вә’д етдији кими, оғлу Шелаја вермәмәклә дүзҝүн иш ҝөрмәмишди. Бундан әлавә о, мә’бәд јахынлығындакы фаһишә кими һесаб етдији гадынла интим әлагәјә ҝирмишди. Бу, Аллаһын, кишинин јалныз никаһ дахилиндә ҹинси әлагәдә олмаға даир нијјәтинә зидд иди (Тәквин 2:24). Әслиндә исә Јәһуда фаһишә илә әлагәдә олмамышды. О, өзү дә дәрк етмәдән, оғлу Шеланын јеринә левират никаһда гануни варисин атасы олмушду.
Тамара ҝәлдикдә исә, онун Јәһуда илә олан мүнасибәти әхлагсызлыг дејилди. Онун әкиз оғуллары зинадан доғулмамышды. Бејтлеһемдән олан Боаз левират никаһ шәртләри алтында моаблы Рутла евләнән заман, Бејтлеһемин ағсаггаллары Тамарын оғлу Перетс һаггында илтифатла данышдылар вә Боаза дедиләр: “Гој Рәбб сәнин евини бу ҝәнҹ гадындан верәҹәји нәсли Тамарын Јәһудаја доғдуғу Пересин [Перетс] еви кими етсин” (Рут 4:12, МКШ). Перетсин ады, Иса Мәсиһин нәсил шәҹәрәсинә дә дахилдир (Матта 1:1-3; Лука 3:23-33).