Мүвәффәгијјәт сизин үчүн нә демәкдир?

МҮДРИК ишҝүзар гәрарлары илә танынан Ҹеси Ливермор бә’зиләринин фикринҹә Уолл-Стритин ән мүвәффәгијјәтли сәһм тиҹарәтчиси олмушдур. Бунун сајәсиндә о, бөјүк вар-дөвләтә саһиб иди, ән ҝөзәл костјумлар тикдириб ҝејинир, 29 отаглы маликанәдә јашајырды. Ону гара Роллс-Ројсда шәхси сүрүҹүсү ҝәздирирди.

Девидa дә уғур газанмағы гаршысына мәгсәд гојмушду. О, компүтер технолоҝијасы үзрә фирманын директор мүавини вә баш мүдири иди. Девидин гаршысында компанијанын шө’бә мүдири вәзифәсинә кечмәк имканы вар иди. Вар-дөвләт вә ад-сан ону өзүнә чәкирди. Лакин о, компанијадан ҝетмәк гәрарына ҝәлди. Девид дејир: «Мән билирәм ки, артыг һеч вахт белә ҝәлирли, јүксәк вәзифәли ишим олмајаҹаг». Сизин фикринизҹә, Девид сәһв гәрар вермишди?

Бир чохлары мүвәффәгијјәтин вар-дөвләт, шан-шөһрәт вә ад-сандан асылы олдуғуна әминдирләр. Лакин мадди фираванлыг ичиндә јашајанлар да үрәкләриндә бошлуг һисс едир вә һәјат онлара мә’насыз ҝәлир. Ҹәнаб Ливермору да бу һиссләр боғурду. Ҹаһ-ҹалал ичиндә јашамасына бахмајараг, фаҹиә вә гәм-гүссә илә долу һәјатында үмидсизлијә гапылмышды. О, депрессијадан әзијјәт чәкирди, никаһлары уғурсузлугла нәтиҹәләнмишди, оғуллары илә мүнасибәти исә сојуг иди. Ахырда вар-дөвләтинин чохуну итирән ҹәнаб Ливермор бир ҝүн баһалы меһманхананын барында отуруб өз һалына ағлајырды. О, ички сифариш етди, дәри үзлүклү блокнотуну чыхарыб, арвадына вида мәктубу јазды. Ичәндән сонра ала-гаранлыг отаға ҝириб, фаҹиәви шәкилдә һәјатына сон гојду.

Онун интиһар етмәсинин сәбәби дәгиг мә’лум олмаса да, бу һадисә Мүгәддәс Китабда јазылан сөзләрин һәгигилијини сүбут едир: «Варланмаг истәјәнләр... өзләринә бир чох әзаблар чәкдирдиләр» (1 Тимотејә 6:9, 10).

Демәк олармы ки, мүвәффәгијјәти вар-дөвләтдә, шан-шөһрәтдә вә ад-санда ҝөрәнләр сәһв дүшүнүрләр? Сиз өзүнүзү мүвәффәгијјәтли һесаб едирсинизми? Нијә белә дүшүнүрсүнүз? Мүвәффәгијјәти нәдә ҝөрүрсүнүз? Мүвәффәгијјәтә олан бахышыныз нәјин тә’сири алтында формалашыр? Нөвбәти мәгаләдә милјонларла инсана һәјатда уғур газанмаға көмәк едән, заманын сынағындан чыхмыш мәсләһәтләри арашдыраҹағыг. Ҝәлин ҝөрәк сиз һәјатда неҹә уғур газана биләрсиниз.

[Һашијә]