Асандыр, бәс дәгигдирми?
АНГЛИКАН килсәси 2005-ҹи илин сентјабрында «100 дәгигәлик Мүгәддәс Китаб»ын бурахылышыны севинҹлә дәстәкләди. 100 дәгигә әрзиндә охујуб гуртарылмасы нәзәрдә тутулан Мүгәддәс Китабын јени версијасында Ибраниҹә Мүгәддәс Јазылар 17, Јунанҹа Мүгәддәс Јазылар исә 33 бөлмәдә үмумиләшдирилмишдир. Бу бөлмәләрдән һәр бири бир сәһифәдә јерләшдирилиб. Беләликлә, бир тәнгидчинин дедији кими, бүтүн «марагсыз һиссәләр» бурахылмышдыр. Дүздүр, бу китаб асан олмағына асандыр, бәс дәгигдирми?
Мүгәддәс Јазылара ҹидди јанашанларын нәзәриндән китабда тәкҹә Аллаһын ады Јеһованын бурахылмасы дејил, башга ујғунсузлугларын да олмасы гачмајаҹаг (Јешаја 42:8, КМ). Мәсәлән, биринҹи бөлмәдә дејилир ки, Аллаһ «ҝөјү вә јери алты ҝүнә јаратды». Јарадылыш 1:1 ајәсиндә исә садәҹә олараг јазылыб: «Башланғыҹда Аллаһ ҝөјләри вә јери јаратды». Бундан сонра орижинал мәтндә Јерин дә јарадылмасы дахил олмагла, алты «ҝүн» вә ја вахт мүддәти чәкән јарадылыш мәрһәләләри тәсвир олунур. Јарадылыш 2:4 (КМ) ајәсиндә бүтүн јарадылыш мүддәти јекунлашдырылараг ‘Рәбб Аллаһын јери вә ҝөјләри јаратдығы ҝүн’ адланыр.
«100 дәгигәлик Мүгәддәс Китаб»а әсасән нөгсансыз инсан Әјјуба һүҹум едән «Шејтан, үзәринә инсанлары иттиһам етмәк мәс’улијјәти гојулан Аллаһын хидмәтчиләриндән бири иди». Сиз бурадакы зиддијјәти ҝөрүрсүнүзмү? «Шејтан» сөзү «дүшмән» демәкдир. Шејтан Аллаһын хидмәтчиси дејил, әксинә, Онун гаты дүшмәнидир вә бәшәријјәти иттиһам етмәк фикринә о өзү дүшмүшдүр (Вәһј 12:7-10).
Бәс китабын Јунанҹа Мүгәддәс Јазылар һиссәси һаггында нә демәк олар? Јени версијада гојунлар вә кечиләр мәсәлиндә дејилир ки, «истәнилән адама һәтта кичиҹик» көмәклик ҝөстәрән инсанлар Мәсиһин лүтфүнү газанырлар. Анҹаг Иса әслиндә демишди ки, онун давамчыларына, јә’ни ‘гардашларына’ јахшылыг едәнләр хејир-дуа алаҹаглар (Матта 25:40). «Вәһј» китабынын хүласәсиндә «бөјүк Бабил олан Романын јерлә јексан едиләҹәји» јазылыб. Мүгәддәс Китабы өјрәнәнләр исә билирләр ки, орижинал јазылар ‘Бөјүк Бабилин’ Рома илә ејниләшдирилмәси үчүн һеч бир әсас вермир (Вәһј 17:15–18:24).
Јараданымызы танымаға вә Онун нијјәтини баша дүшмәјә ҹан атан инсанлар үчүн Мүгәддәс Китабы әвәз едә биләҹәк һеч бир шеј јохдур. Дүздүр, Мүгәддәс Китабы охумаг 100 дәгигәдән чох вахт апараҹаг, анҹаг бу сонсуз хејир-дуалар ҝәтирир (Јәһја 17:3). Зәһмәт тәләб етсә дә, Мүгәддәс Китабы оху ки, сән дә бу хејир-дуалара саһиб оласан (2 Тимотејә 3:16, 17).