«Бу, һәгигәтән дә, Аллаһын ән мүгәддәс вә бөјүк адыдыр»
Бу фикри 1430-ҹу илдә Кузанлы Николај өз тәблиғиндә демишдиa. Бу адам бир чох шејләрлә марагланырды, мәсәлән, јунан вә ибрани дилини, фәлсәфәни, илаһијјаты, ријазијјаты вә астрономијаны өјрәнирди. Артыг 22 јашында о, Рома католик килсәсинин гануну үзрә докторлуг дәрәҹәсини алмышды. 1448-ҹи илдә исә кардинал тәјин едилмишди.
Тәхминән 550 ил әввәл Алманијанын Бонн шәһәриндән 130 километр ҹәнубда јерләшән Күсдә, инди Бернкастел-Күс кими танынан шәһәрдә Кузанлы Николај гоҹалар еви тикмишди. Һал-һазырда һәмин бинада Кузанлы Николајын 300-дән артыг әлјазмасы сахланылан китабханасы јерләшир. Онлардан бири Кузан кодекси 220-дир вә 1430-ҹу илдә сөјләдији тәблиғи дә ораја дахилдир. «Башланғыҹда Кәлам варды» («In principio erat verbum») адланан бу тәблиғдә Кузанлы Николај Јеһованын адыны латынҹа Иеһоуа кими истифадә етмишдиb. Онун 56-ҹы сәһифәсиндә Аллаһын адына даир нөвбәти сөзләр јазыб: «Бу ады Өзүнә Аллаһ вериб. Бу тетраграмматондур, јәни дөрд һәрфдән ибарәт олан аддыр. [...] Бу, һәгигәтән дә, Аллаһын ән мүгәддәс вә бөјүк адыдыр». Кузанлы Николајын сөзләри Аллаһын адынын Ибраниҹә Мүгәддәс Јазыларын орижинал мәтниндә олдуғу илә үст-үстә дүшүр (Чых. 6:3, КМ).
15-ҹи әсрин әввәлләринә аид едилән бу кодекс горунуб сахланылан ән гәдим сәнәдләрдән биридир ки, орада тетраграмматон «Иеһоуа» кими верилир. Бу јазылы сәнәд даһа бир сүбутдур ки, Аллаһын адынын «Јеһова» формасына бәнзәр бир чох формалар әсрләр боју истифадә олунмушду.
[Һашијәләр]
a Кузанлы Николај һәмчинин Николаус Крифтс (Кребс), Николаус Кузанус вә Николаус фон Күс кими дә таныныр. Күс онун доғулдуғу алман шәһәринин ады иди.
b Бу тәблиғ Үч үгнум тәлимини дәстәкләјирди.
[16-ҹы сәһифәдәки шәкил]
Кузанлы Николајын китабханасы