Охуҹуларын суаллары

Сүлејманын мәсәлләри 24:27 ајәсиндә һансы ибрәт дәрси вар?

«Сүлејманын мәсәлләри»ни јазан адам бир ҝәнҹә мәсләһәт верәрәк дејир: «Әввәлҹә чөлдәки ишини гуртар, зәми сал, сонра евини тик». Бир чох тәрҹүмәләрдә бу ајәнин сонунҹу һиссәси белә сәсләнир: «Сонра аилә үзвләрини мөһкәмләндир». Бу илһамланмыш мәсәлдә һансы фикир вурғуланыр?

Әввәлләр бу ајә белә изаһ олунурду: аилә башчысы тәкҹә ишләмәклә јох, һәмчинин аиләсини мөһкәмләндирмәклә, јәни руһландырмагла онун гајғысына галмалыдыр. О, буну руһани тәлим вермәклә едә биләр. Бу фикир Мүгәддәс Китаба әсасланан һәгигәт олса да, ҝөрүнүр, ајәдә әсас фикир башгадыр. Бәс буну нәјә ҝөрә белә демәк олар? Ики сәбәби нәзәрдән кечирәк.

Биринҹиси, ајәнин орижинал мәтнинә әсасән, бурада артыг мөвҹуд олан аиләнин мөһкәмләндирилмәси јох, әслиндә, евин тикилмәси нәзәрдә тутулур. Бурада истифадә олунан ‘тикмәк’ вә ја ‘мөһкәмләндирмәк’ сөзләрини ејни заманда аилә гурмаға, јәни евләниб оғул-ушаг саһиби олмаға да аид етмәк олар.

Икинҹиси, ајәдә ишләрин һансы ардыҹыллыгла ҝөрүлмәли олдуғу ҝөстәриләрәк, санки, дејилир: «Әввәл бу иши ҝөр, сонра исә о бирисини». Демәк олармы ки, јазычы бурада дүнјәви ишләрин руһани ишләрдән даһа ваҹиб олдуғуну вурғулајыр? Әлбәттә, јох!

Гәдимдә ‘ев тикмәк’, јәни евләниб аилә гурмаг истәјән кәс өзүндән сорушмалы иди: «Һәјат јолдашымын вә ҝәләҹәк ушагларымын гајғысына галмаға вә онлары доландырмаға һазыраммы?» Аилә гурмаздан өнҹә, о, тарладакы ишләрини ҝөрмәли иди. Буна ҝөрә дә, тәрҹүмәләрин бириндә бу ајә белә сәсләнир: «Тарладакы ишләрини ҝөрүб гуртармамыш вә газанҹынын олдуғуна әмин олмамыш нә евини тик, нә дә аилә гур» («Today’s English Version»). Бу принсипи бу ҝүн дә тәтбиг етмәк мүмкүндүрмү?

Бәли. Евләнмәк истәјән кәс әввәлҹә аилә мәсулијјәтләринә һазыр олмалыдыр. Әҝәр сағламлығы јол верирсә, о, мүтләг ишләмәлидир. Әлбәттә, аиләнин гајғысына галмаг физики тәләбатлары өдәмәклә битмәмәлидир. Аллаһын Кәламы ҝөстәрир ки, аиләсинин физики, емосионал вә руһани тәләбатларыны өдәмәјән инсан имансыздан бетәрдир! (1 Тим. 5:8). Буна ҝөрә дә, аилә һәјаты гурмаға һазырлашан ҝәнҹ өзүндән сорушмалыдыр: «Аиләми мадди ҹәһәтдән тәмин етмәк үчүн өзүмү һазыр һисс едирәмми? Руһани ишләрдә рәһбәлији өз үзәримә ҝөтүрмәјә һазыраммы? Һәјат јолдашым вә ушагларымла мүнтәзәм Мүгәддәс Китаб өјрәнмәси кечирмәк мәсулијјәтинин өһдәсиндән ҝәлә биләҹәјәмми?» Аллаһын Кәламы бу мәсулијјәтләрин ваҹиблијини вурғулајыр (Ганун. т. 6:6-8; Ефес. 6:4).

Беләликлә, өзүнә һәјат јолдашы ахтаран киши Сүлејманын мәсәлләри 24:27 ајәсиндәки принсипин үзәриндә ҹидди дүшүнмәлидир. Ејнилә, јахшы оларды ки, ҝәнҹ гадын да һәјат јолдашы вә ана олмаға һазыр олуб-олмадығыны өзүндән сорушсун. Ушаг истәјән ҝәнҹ ҹүтлүк дә бу кими суалларын үзәриндә дүшүнмәлидир (Лука 14:28). Аллаһын рәһбәрлијинә ујғун јашамаг Онун халгына үрәк ағрысындан гачынмаға вә аилә һәјатындан зөвг алмаға көмәк едәҹәк.

[12-ҹи сәһифәдәки шәкил]

Евләнмәк истәјән ҝәнҹ өзүнә һансы суаллары вермәлидир?