Ушагларынызы өјрәдин

Ривга Јеһованы разы салмаға чалышырды

ҺАЛ-ҺАЗЫРДА бәзи өлкәләрдә гызлара гојулан адлардан бири Ривгадыр. Елә дүнјада ән танынмыш китаб олан Мүгәддәс Китабда ады чәкилән ваҹиб инсанлардан биринин ады да Ривгадыр. Онун һаггында нә исә билирсән? ~ a Биз Ривга һаггында өјрәнмәлијик, чүнки онун гојдуғу ҝөзәл нүмунә бизә һәгиги Аллаһ олан Јеһоваја ибадәт етмәјә көмәк едә биләр.

Ривга Мүгәддәс Китабда ады чәкилән вә Јеһованын һәгиги хидмәтчиси олан гадынлардан икинҹисидир. Билирсән, Јеһоваја сәдагәтлә хидмәт едән биринҹи гадын ким иди? ~ О, Ибраһимин арвады Сара иди. Гоҹа јашында Сара јеҝанә оғлу Исһагын анасы олду. Инди исә ҝәл ҝөрәк, Ривга Јеһованы разы салмаг үчүн нә едирди вә о, Исһагла неҹә таныш олду.

Аллаһын әмри илә Ибраһимин вә Саранын Харандан чыхыб Кәнан дијарына көчмәсиндән 60 илдән чох вахт кечмишди. Онлар јаша доланда Аллаһ онлара Исһаг адлы оғуллары олаҹағыны вәд етди. Ајдын мәсәләдир ки, валидејнләри Исһагы чох истәјирдиләр. Анасы Сара 127 јашында өләндә о, артыг јеткин јашларында иди вә анасынын өлүмүнә ҝөрә чох кәдәрләнирди. Ибраһим истәмирди ки, оғлу Исһаг Јеһоваја ибадәт етмәјән кәнанлылардан өзүнә арвад алсын. Буна ҝөрә дә о, гулуну, еһтимал ки, Елиезери 800 километр узаға — Харанда јашајан гоһумларынын јанына ҝөндәрди ки, Исһаг үчүн арвад сечсин (Јарадылыш 12:4, 5; 15:2; 17:17, 19; 23:1).

Онлар он дәвәнин үзәринә азугә вә ҝәлин үчүн һәдијјәләр јүкләјиб јола дүшдүләр. Чох ҝетдиләр, аз ҝетдиләр, нәһајәт ки, Елиезерлә Ибраһимин диҝәр гуллары Харана чатдылар. Онлар бир гујунун башында ајаг сахладылар. Чүнки Елиезер билирди ки, адәтән, ҝүнорта чағы ҹамаат бура аиләләри вә һејванлары үчүн су чәкмәјә ҝәлир. Бу вахт о, Аллаһа дуа етмәјә башлајыр. Дуада о дејир ки, Исһага сечәҹәји арвад онун ичмәк үчүн су истәјәҹәји вә ҹавабында: «Сән дә ич, дәвәләринә дә ҝедиб су чәким», — сөјләјәҹәк гыз олсун.

Һәр шеј мәһз белә дә олду! «Ҝөрүнүшҹә чох ҝөзәл» олан ҝәнҹ Ривга гујуја јахынлашыр. Елиезер ондан су истәјир. Гыз она су верәндән сонра дејир: «Дәвәләрин үчүн дә су чәким». Бундан сонра гыз дәфәләрлә гујуја тәрәф гачыб орадан су чәкир. Бүтүн бунлары марагла изләјән Елиезер «диггәтлә гыза бахырды». Бир тәсәввүр ет, он дәвәјә су ичирмәк үчүн Ривга гујудан нә аз, нә чох, дүз 1 000 литр су чәкмәли иди!

Елиезер Ривгаја ҝөзәл һәдијјәләр верди вә онун Ибраһимин гоһуму Бетуелин гызы олдуғуну өјрәнди. Ривга ону вә јол јолдашларыны евләриндә «ҝеҹәләмәјә» дәвәт етди. Сонра исә онлардан габаг гачараг евдәкиләрә деди ки, гоһумлары Ибраһим онлара баш чәкмәк үчүн адамлар ҝөндәриб.

Ривганын бөјүк гардашы Лаван Елиезерин ким олдуғуну вә баҹысына баһалы һәдијјәләр вердијини биләндә ону евләринә дәвәт етди. Анҹаг Елиезер: «Мәгсәдими сөјләмәјинҹә јемәјәҹәјәм», — деди. Беләликлә, о, Ибраһимин ону нәјә ҝөрә бура ҝөндәрдијини данышды. Бетуел, арвады вә оғлу Лаван Ривганын Исһага әрә ҝетмәсинә разылыг вердиләр.

Јејиб-ичдикдән сонра Елиезер вә онунла ҝәләнләр орада ҝеҹәләдиләр. Сәһәриси ҝүн Елиезер деди: «Мәни ағамын јанына ҝөндәрин». Анҹаг Ривганын анасы вә гардашы онлардан ‘һеч олмаса он ҝүн галмағы’ хаһиш етдиләр. Ривгадан ҝүнү бу ҝүн ҝетмәк истәјиб-истәмәдијини сорушанда о: «Ҝедирәм», — дејә ҹаваб верди вә вахт итирмәдән Елиезерлә бирҝә јола чыхды. Узун сәјаһәтдән сонра онлар евләринә чатдылар вә Ривга Исһагын арвады олду (Јарадылыш 24:1—58, 67).

Неҹә дүшүнүрсән, ола билсин, бир даһа гоһум-әгрәбаларыны вә дост-танышларыны ҝөрмәјәҹәјини биләрәк онлардан узаг бир јерә көчмәк Ривга үчүн асан иди? ~ Һеч дә јох. Амма Ривга Јеһованы разы салмаға чалышдығына ҝөрә хејир-дуа алды. Мәсәлән, о, ҝүнаһ вә өлүмдән бизи хилас едән Иса Мәсиһин улу нәнәси олмаг шәрәфинә лајиг ҝөрүлдү. Әҝәр биз дә, Ривга кими, Јеһованы разы салан ишләр ҝөрсәк, әмин ола биләрик ки, О, бизә дә хејир-дуа верәҹәк (Ромалылара 9:7—10).

[Һашијә]

СУАЛЛАР:

▪ Ривга ким иди вә Елиезер ону илк дәфә һарада ҝөрмүшдү?

▪ Нәјә ҝөрә Ибраһим оғлу Исһагын кәнанлылардан арвад алмасынын әлејһинә иди?

▪ Ривга Исһага јахшы арвад олаҹағыны неҹә ҝөстәрди?

▪ Ривга кими олмаг үчүн нә едә биләрик?