Иса Аллаһын Падшаһлығы һаггында нә өјрәдирди?

«Иса шәһәрләри вә кәндләри ҝәзмәјә башлады. О, Аллаһын Падшаһлығыны вәз едәрәк Мүждәни јајырды» (ЛУКА 8:1, МК—09).

БИЗ үрәјимизҹә олан вә ваҹиб сајдығымыз шејләр һаггында данышмағы хошлајырыг. Исанын өзүнүн дә дедији кими, «ағыз үрәкдән ҝәләни сөјләјир» (Матта 12:34). Исанын хидмәт заманы сөјләдикләрини нәзәрдән кечирдикҹә белә нәтиҹәјә ҝәлә биләрик ки, Аллаһын Падшаһлығы онун үчүн бөјүк әһәмијјәт кәсб едирди.

Аллаһын Падшаһлығы нәдир? Падшаһлыг падшаһ тәрәфиндән идарә олунан һөкумәтдир. Беләликлә, Аллаһын Падшаһлығы Аллаһын гурдуғу һөкумәтдир. Иса Аллаһын Падшаһлығы һаггында чох сөз сөјләмишди, белә ки, о, Исанын чатдырдығы хәбәрин әсас мөвзусу иди. Тәкҹә дөрд Мүждәдә һәмин Падшаһлыг һаггында 110 дәфәдән чох данышылыр. Лакин Иса јалныз сөзләрлә өјрәтмирди. Онун һәрәкәтләри дә Аллаһын Падшаһлығы вә онун едәҹәји ишләр һагда чох шеји ачыглајырды.

Падшаһлығын Падшаһы кимдир? Аллаһын Падшаһлығынын Падшаһы инсанлар тәрәфиндән сечилмәјиб. Әксинә, бу Рәһбәри Аллаһын Өзү тәјин едиб. Вердији тәлимләр васитәсилә Иса Аллаһын ону падшаһ сечдијини ачыглады.

Иса билирди ки, Мүгәддәс Китабдакы пејғәмбәрликләр васитәсилә вәд едилмиш Мәсиһин әбәди Падшаһлыгда идарә едәҹәји хәбәр верилмишди (2 Шамуел 7:12—14; Даниел 7:13, 14; Матта 26:63, 64). Јадыныздадырса, Иса өзүнүн һаггында данышылан Мәсиһ олдуғуну ачыгҹа бәјан етмишди. Бунунла Иса Аллаһ тәрәфиндән тәјин олунмуш Падшаһ олдуғуну тәсдиг етмишди (Јәһја 4:25, 26). Буна мүвафиг олараг, Иса һәрдән «Мәним Падшаһлығым» ифадәсини ишләдирди (Јәһја 18:36, МК—09).

Иса һәмчинин сөјләмишди ки, Падшаһлыгда онунла бирҝә башгалары да идарә едәҹәк (Лука 22:28—30). Мәһдуд сајда олдуглары үчүн о, өзүнүн һакимијјәт шәрикләрини «кичик сүрү» адландырмышды. Иса онлара демишди: «Атаныз Падшаһлығы сизә вермәји мүнасиб ҝөрдү» (Лука 12:32, МК—09). Мүгәддәс Китабын сонунҹу китабында Иса илә бирҝә рәһбәрлик етмәк шәрәфинә лајиг ҝөрүләнләрин үмуми сајынын 144 000 олдуғу ҝөстәрилир (Вәһј 5:9, 10; 14:1).

Падшаһлыг һарада јерләшир? Иса Рома валиси Понти Пилата демишди: «Мәним Падшаһлығым бурадан дејил» (Јәһја 18:36, МК—09). Мәсиһин рәһбәрлик етдији бу Падшаһлыг һакимијјәтини инсанлар васитәсилә һәјата кечирмәјәҹәк. Иса дөнә-дөнә Аллаһын Падшаһлығыны «Сәмави Падшаһлыг» адландырмышдыa (Матта 4:17; 5:3, 10, 19, 20, МК—09). Буна ҝөрә дә Аллаһын Падшаһлығы сәмави һөкумәтдир.

Иса дәгиг билирди ки, јердәки һәјатыны битирдикдән сонра ҝөјә галхаҹаг. Буна ҝөрә дә орада ‘јер һазырлајаҹағыны’, јәни һакимијјәт шәрикләринин она говушмалары үчүн јол ачаҹағыны сөјләди (Јәһја 14:2, 3).

Падшаһлыг нәјә наил олаҹаг? Иса ону динләјәнләрә Аллаһа бу сөзләрлә дуа етмәји өјрәдирди: «Падшаһлығын ҝәлсин, ҝөјдә олдуғу кими јердә дә Сәнин ирадән олсун» (Матта 6:9, 10, МК—09). Аллаһын ирадәси һал-һазырда ҝөјдә јеринә јетир. Онун јерә даир нијјәти исә Падшаһлыг васитәсилә һәјата кечәҹәк. Буна наил олмаг үчүн Падшаһлыг јер үзүндә көклү дәјишикликләр едәҹәк.

Падшаһлыг јердә нәләри һәјата кечирәҹәк? Иса сөјләјирди ки, Аллаһын Падшаһлығы залымларын көкүнү кәсмәклә пислији арадан галдыраҹаг (Матта 25:31—34, 46). Бунунла да бүтүн писликләрә вә позғунлуға сон гојулаҹаг. Иса өјрәдирди ки, јер үзүндә ‘һәлим’, ‘салеһ’, «мәрһәмәтли», «үрәји тәмиз» вә ‘сүлһпәрвәр’ инсанлар јашајаҹаг (Матта 5:5—9).

Белә јахшы инсанлар чиркләнмиш планетдәми јашајаҹаглар? Әлбәттә ки, јох! Иса вәд етмишди ки, Аллаһын Падшаһлығынын һакимијјәти алтында јер үзүндә һејрәтамиз дәјишикликләр баш верәҹәк. Исанын јанында едам олунан киши она демишди: «Еј Иса, Өз Падшаһлығына ҝәләндә мәни хатырла». Ҹавабында Иса демишди: «Буну бил: сән мәнимлә Ҹәннәтдә олаҹагсан!» (Лука 23:42, 43, ЈД). Бәли, Аллаһын Падшаһлығы бүтүн јер күрәсини Еден бағы кими ҹәннәтә чевирәҹәкb.

Аллаһын Падшаһлығы бәшәријјәт үчүн даһа нәләр едәҹәк? Иса Аллаһын Падшаһлығынын едәҹәји ишләри вәд етмәклә кифајәтләнмирди. О, һәмчинин бунлары әмәлдә ҝөстәрирди. Иса хәстәләри мөҹүзәви шәкилдә сағалтмагла ҝөстәрирди ки, кичик мигјасда етдији бу ишләр онун һөкмранлыг едәҹәји вахт бөјүк мигјасда һәјата кечәҹәк. Аллаһдан илһам алмыш Мүждәдә Иса һаггында нөвбәти сөзләр јазылыб: «Иса бүтүн Галилејаны ҝәзәрәк, онларын синагогларында өјрәдиб, Сәмави Сәлтәнәт Мүждәсини тәблиғ едир, халг арасында һәр ҹүр хәстәлик вә нахошлуғу сағалдырды» (Матта 4:23).

Иса мүхтәлиф хәстәликләрдән әзијјәт чәкән инсанлара шәфа верирди. О, ‘анаданҝәлмә кор бир адамын ҝөзләрини ачды’ (Јәһја 9:1—7, 32, 33). Ијрәнҹ ҹүзам хәстәлијинә тутулан адама нәвазишлә тохунараг ону сағалтды (Марк 1:40—42). «Кар вә пәлтәк» адамы онун јанына ҝәтирәндә исә ҝөстәрди ки, ‘карлары ешитдириб, дилсизләри данышдырмаға’ гадирдир (Марк 7:31—37).

Өлүм белә Аллаһын тәјин етдији бу Падшаһын гаршысында дура билмәз. Иса дүз үч дәфә өлән адамы һәјата гајтармышды. О, дул гадынын оғлуну, 12 јашлы гызы вә әзиз досту Лазары дирилтмишди (Лука 7:11—15; 8:41—55; Јәһја 11:38—44).

Аллаһын Падшаһлығынын тәбәәләрини ҝөзләјән ҝөзәл ҝәләҹәји тәсвир едәрәк Иса һәвари Јәһја васитәсилә демишди: «Будур, Аллаһын мәскәни инсанларла бәрабәрдир вә О, онларла бәрабәр јашајаҹагдыр. Онлар Онун халгы олаҹаг вә Аллаһын Өзү онларла олаҹагдыр. Аллаһ онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр, чүнки әввәлки шејләр кечиб ҝетди» (Вәһј 1:1; 21:3, 4). Кәдәр ҝөз јашларынын, ағры вә өлүмүн олмадығы бир дүнјаны тәсәввүр един! Һәмин вахт Аллаһын ирадәсинин ҝөјдә олдуғу кими, јердә дә јеринә јетмәсинә даир едилән дуа тамамилә јеринә јетәҹәк.

Аллаһын Падшаһлығы нә заман ҝәләҹәк? Иса өјрәдирди ки, онун һакимијјәт башына ҝәлмәси ‘иштиракы’ адландырдығы хүсуси дөврлә үст-үстә дүшәҹәк. О, падшаһ кими иштиракынын башлајаҹағы вахты ҝөстәрмәк үчүн пејғәмбәрликләр сөјләмишди. Һәмин мүддәт әрзиндә бүтүн дүнјада чәтинликләр, еләҹә дә мүһарибәләр, аҹлыглар, зәлзәләләр, хәстәликләр олаҹаг вә ганунсузлуг артаҹагды (Матта 24:3, 7—12; Лука 21:10, 11). Исанын сөјләдији бу вә диҝәр һадисәләр Биринҹи Дүнја мүһарибәсинин башладығы 1914-ҹү илдән етибарән өзүнү габарыг шәкилдә ҝөстәрмәкдәдир. Демәли, Иса һал-һазырда Падшаһ кими идарә едир. Тезликлә Падшаһлыг јер үзүндә Аллаһын ирадәсини јеринә јетирәҹәкc.

Аллаһын Падшаһлығынын ҝәлиши шәхсән сизин үчүн һансы әһәмијјәти кәсб едәҹәк? Бу, Исанын хәбәринә неҹә һај вермәјиниздән асылыдыр.

[Һашијәләр]