Аллаһа јахынлашын

‘Тахтын әбәди мөһкәм галаҹаг’

2 Шамуел 7:1—16

ТАРИХ боју бир чох рәһбәрләр һакимијјәтдән кәнар едилмишләр. Бәзиләри сәсвермә јолу илә, диҝәрләри исә зорла вәзифәдән узаглашдырылмышлар. Бәс сәмави Падшаһлығын Падшаһы Иса Мәсиһ һаггында нә демәк олар? Аллаһын тәјин етдији Падшаһ кими идарә етмәкдә онун гаршысыны нә исә кәсә биләрми? Бу суалын ҹавабыны Јеһованын гәдим Исраилин падшаһы Давуда дедији сөзләрдә, «2 Шамуел» китабынын 7-ҹи фәслиндә тапмаг олар.

Фәслин әввәлиндә өјрәнирик ки, Давуд өзүнүн, ади падшаһын ҝөзәл сарајда јашадығы һалда, Аллаһын сандығынын садә бир чадырда галмасына ҝөрә нараһат идиa. Буна ҝөрә Давуд Јеһова үчүн лајигли бир ев, мәбәд тикмәк истәдијини билдирир (2-ҹи ајә). Лакин тезликлә өјрәнир ки, еви о тикмәјәҹәк. Јеһова Натан пејғәмбәр васитәсилә Давуда еви оғлунун тикәҹәјини дејир (4, 5, 12, 13-ҹү ајәләр).

Давудун бу сәмими арзусу Јеһованын үрәјинҹә олур. Сәдагәтинә ҹаваб олараг вә пејғәмбәрлијә әсасән, Аллаһ Давудла онун нәслиндән әбәдилик һөкм сүрәҹәк бир шәхс чыхараҹағына даир әһд бағлајыр. Натан Давуда Аллаһын мүгәддәс вәдини чатдырыр: «Сәнин нәслин вә падшаһлығын Мәним гаршымда әбәди әмин-аманлыгда олаҹаг, тахтын исә әбәди мөһкәм галаҹаг» (16-ҹы ајә). Бу әһдин даими Вариси — әбәдијјән һөкм сүрәҹәк кәс кимдир? (Јарадылыш 49:10; Мәзмур 89:20, 29, 34—36).

Назаретли Иса Давудун нәслиндән иди. Исанын доғулмасыны хәбәр верәркән мәләк демишди: «Рәбб Аллаһ Она атасы Давудун тахтыны верәҹәкдир. Әбәди олараг Јагубун соју үзәриндә һөкмранлыг едәҹәк вә Онун Сәлтәнәтинин сону олмајаҹагдыр» (Лука 1:32, 33). Беләликлә, Давудла бағланан әһд Иса Мәсиһин үзәриндә јеринә јетди. О, сәсвермә јолу илә һакимијјәт башына ҝәлмәјиб, әксинә, она әбәдијјән һөкм сүрмәк һүгугуну Аллаһын мүгәддәс вәди верир. Ҝәлин унутмајаг ки, Аллаһ вәдләрини һәмишә јеринә јетирир (Јешаја 55:10, 11).

Биз «2 Шамуел» китабынын 7-ҹи фәслиндән ики ваҹиб шеји өјрәнирик. Биринҹиси, шүбһә јохдур ки, һеч нә вә һеч ким Иса Мәсиһин һакимијјәт сүрмәсинә мане ола билмәз. Беләликлә, әмин ола биләрик ки, о, гаршысына гојдуғу мәгсәдә чатаҹаг, башга сөзлә, Аллаһын ирадәсинин ҝөјдә олдуғу кими, јердә дә тамамилә һәјата кечмәсинә наил олаҹаг (Матта 6:9, 10).

Икинҹиси, бурадан Јеһова вә Онун неҹә Аллаһ олмасы һаггында үрәји риггәтә ҝәтирән бир шеј өјрәнирик. Јадыныздадырса, Јеһова Давудун үрәјиндәки нијјәти ҝөрүб ону гијмәтләндирди. Јеһованын сәдагәтлә Она ибадәт етдијимизи ҝөрмәси вә буну гијмәтләндирмәси бизи руһландырыр. Бәзи һалларда биздән асылы олмајан вәзијјәтләр, мәсәлән, зәиф сағламлыг вә ја гоҹалыг уҹбатындан Аллаһа үрәјимиз истәјән гәдәр хидмәт едә билмирик. Әҝәр беләдирсә, ҝәлин Јеһованын сәдагәтлә ибадәт етдијимизи, һәтта үрәјимиздәки нијјәтләри белә ҝөрдүјүнү дүшүнәрәк тәсәлли тапаг.

[Һашијә]