Охуҹуларын суаллары
Иса динләјиҹиләринә демишди: «Сәмави Атаныз камил олдуғу кими, сиз дә камил олмалысыныз». Бу ҝүн инсанлар неҹә «камил» ола биләрләр? (Мат. 5:48).
Бу суалын ҹавабыны билмәк үчүн биз әввәлҹә «камил» вә «камиллик» сөзләринин Мүгәддәс Китабда неҹә ишләндијини баша дүшмәлијик. Мүгәддәс Јазыларда камил адландырылан шејләрин һамысы һеч дә мүтләг мәнада белә дејил. Сөзсүз ки, Јеһова Аллаһ мүтләг мәнада камилдир. Инсанлар вә әшјалар исә јалныз нисби мәнада камил вә ја мүкәммәл ола биләрләр. «Камил» кими тәрҹүмә олунан ибрани вә јунан сөзләри, адәтән, һәр һансы бир һакимијјәт тәрәфиндән тәсис олунан нормалара ҝөрә «бүтөв», «јеткин» вә ја «нөгсансыз» демәкдир.
Адәмлә Һәвва мәнәви, руһани вә физики ҹәһәтдән камил јарадылмышдылар. Онлар, Јараданларынын гојдуғу нормалара әсасән, камил һесаб олунурдулар. Итаәтсизликләри уҹбатындан онлар артыг бу нормалара мүвафиг ҝәлмәдиләр, буна ҝөрә дә һәм өзләри, һәм дә ҝәләҹәк нәсилләри камилликдән мәһрум олду. Беләликлә, ҝүнаһ, гејри-камиллик вә өлүм Адәм васитәсилә бүтүн бәшәријјәтә кечди (Ром. 5:12).
Лакин Дағүстү тәблиғдә Иса гејд етди ки, һәтта гејри-камил инсанлар белә нисби мәнада камил ола биләрләр. О, бу нитги сөјләјәркән мүкәммәл мәһәббәтә даир норма тәсис етди. Бу, Аллаһын бәшәријјәтә ҝөстәрдији мәһәббәтә бәнзәјир. Иса демишди: «Дүшмәнләринизи һәмишә севин вә сизи тәгиб едәнләр үчүн һәмишә дуа един. Беләҹә, ҝөјдәки Атанызын оғуллары олаҹагсыныз. О, ҝүнәшә әмр едир ки, писләрин дә, јахшыларын да үзәринә доғсун; јағыша әмр едир ки, салеһләрин дә, гејри-салеһләрин дә үзәринә јағсын» (Мат. 5:44, 45). Мәһз белә мәһәббәт ҝөстәрдикләри тәгдирдә Исанын шаҝирдләри Аллаһын мүкәммәл нүмунәсини изләмиш олаҹагдылар.
Бу ҝүн бүтүн дүнјада Јеһованын Шаһидләри башгалары илә мүнасибәтдә јүксәк мәһәббәт нормаларыны горујуб сахламаға чалышырлар. Онлар мүхтәлиф иргләрдән вә динләрдән олан инсанлара Мүгәддәс Китабдакы дәгиг билијә јијәләнмәјә көмәк етмәк истәјирләр. Јеһованын Шаһидләри һал-һазырда 236 өлкә вә әразидә 7 000 000-дан чох инсанла Мүгәддәс Китаб өјрәнмәси кечирирләр.
Иса демишди: «Әҝәр тәкҹә сизи севәнләри севирсинизсә, бундан нә газанырсыныз? Мәҝәр верҝијығанлар да белә етмирләр? Әҝәр тәкҹә гардашларынызы саламлајырсынызса, мәҝәр гејри-ади бир иш ҝөрүрсүнүз? Мәҝәр башга милләтләрдән оланлар да белә етмирләр?» (Мат. 5:46, 47). Һәгиги мәсиһчиләр тәһсилинә вә ја милли мәнсубијјәтинә ҝөрә инсанлар арасында фәрг гојмурлар; онлар јалныз мәһәббәтләринә мәһәббәтлә ҹаваб верәнләри севмирләр. Әксинә, онлар һамыја — касыблара вә хәстәләрә, ҹаванлара вә гоҹалара көмәк едирләр. Мәһз белә давранмагла онлар Јеһованын мәһәббәтини тәглид едәрәк нисби мәнада камил ола биләрләр.
Адәмин итирдији камиллијә нә вахтса говуша биләҹәјикми? Бәли, Мәсиһ Миниллик Һөкмранлығы заманы ‘Иблисин ишләрини дағыданда’ Исанын фидјә гурбанлығына иман едән итаәткар инсанлар там камиллијә јетишәҹәкләр (1 Јәһ. 3:8).