Нә үчүн Аллаһ Өз халгына јалныз диндашлары илә аилә гурмағы бујурмушду?

▪ Аллаһын Исраил оғулларына вердији ганунда әтраф халгларла бағлы белә ҝөстәриш вар иди: «Онларла гоһум олмајын, оғулларына гыз вериб, оғулларыныза онлардан гыз алмајын» (Ганунун тәкрары 7:3, 4). Нијә Аллаһ белә әмр вермишди?

Биринҹиси, бу, бүтүн халгын ҝәләҹәји үчүн иди. Јеһова Аллаһ билирди ки, Шејтан Онун халгыны јолдан чыхарыб јаланчы танрылара үз тутмаға сөвг едәҹәк. Одур ки, Аллаһ сөзүнә давам едир: «Чүнки онлар өвладларынызы Мәним ардымҹа ҝетмәкдән дөндәриб, башга аллаһлара гуллуг етдирәҹәкләр». Бу, чох ҹидди мәсәлә иди. Әҝәр исраиллиләр башга танрылара тапынсајдылар, Аллаһын рәғбәтини итирәҹәкдиләр. Бу да өз нөвбәсиндә онлары дүшмән гаршысында әлијалын едәҹәкди. Онда Аллаһын вәд етдији Мәсиһ һеч вәҹһлә бу халгдан төрәјә билмәзди. Ајдын мәсәләдир ки, Шејтан исраиллиләри бүтпәрәстләрлә гоһум олмаға тәһрик етмәк үчүн дәридән-габыгдан чыхаҹагды.

Икинҹиси, Аллаһын бу әмри һәр бир исраиллинин рифаһына хидмәт едирди. Аллаһ-Таала билирди ки, онларын һәр биринин хошбәхтлији вә хош ҝүзәраны Јараданларына јахын олмаларындан асылы иди. Бәс бүтпәрәстләрлә никаһ мәсәләсинә бир белә ҹидди јанашмаға әсас вар иди? Ҝәлин Сүлејман падшаһын һадисәсинә нәзәр салаг. Јеһова Аллаһ халгыны хәбәрдар едәрәк демишди ки, бүтпәрәст арвадлар онларын үрәјини өз танрыларына тәрәф дөндәрәҹәкләр. Сүлејман буну чох ҝөзәл билирди, анҹаг ҝүҹлү дәрракә саһиби олдуғундан јәгин фикирләширди ки, Аллаһын мәсләһәтинә еһтијаҹы јохдур. О, Аллаһын мәсләһәтини гулагардына вурду. Бунун нәтиҹәси нә олду? «Арвадлары онун үрәјини јолдан чыхартдылар... үрәјини башга аллаһлара тәрәф аздырдылар». Бу, әсил фаҹиә иди! Падшаһ Аллаһын ҝөзүндән дүшдү. Үстәлик, онун хәјанәти уҹбатындан халг парчаланды (1 Падшаһлар 11:2—4; 9—13).

Кимсә дејә биләр ки, ахы әксинә дә олуб. Мисал үчүн, исраилли Махлон моавлы Рутла евләнмишди вә бу гадын Јеһова Аллаһын ҝөркәмли хидмәтчиләриндән бири олду. Илк нөвбәдә гејд етмәк лазымдыр ки, моавлы гадынла издиваҹа ҝирмәк хаталы иш иди. Һәм дә Махлонун моавлы гызла евләнмәји тәгдирәлајиг һәрәкәт кими тәгдим едилмир. О, ҹаван өлдү вә Рут бәлкә дә онун өлүмүндән сонра Јеһованы өз Аллаһы кими гәбул етди. Махлонун гардашы Килјон да Орпа адлы бир моавлы гыз алмышды. Орпа өз танрыларындан әл чәкмәмишди. Сонрадан Боаз Руту аланда, бу гадын артыг Јеһова Аллаһа ибадәт едирди. Јәһудиләр ону ән мүкәммәл прозелитa адландырмышдылар. Боазла Рутун никаһы һәр икиси үчүн әсил әнам олду (Рут 1:4, 5, 15—17; 4:13—17).

Бунлары нәзәрә алсаг, Махлон вә Рутун нүмунәсинә бәнзәр нүмунәләри әлдә бајраг едиб Јеһованын аилә гурмагла бағлы әмринин ҹиддилијини азалтмаг нә дәрәҹәдә доғрудур? Бу ҹүр мүлаһизәләр киминсә лотерејада ҹек-пот уддуғуну ҝөстәриб гумар ојунларына бәраәт газандырмаға бәнзәјир.

Мүгәддәс Китаб мәсиһчиләрә јалныз Јеһова Аллаһа ибадәт едән инсанла никаһа ҝирмәји бујурур. Һәмчинин Аллаһ бујурур ки, «имансызларла ејни бојундуруға ҝирмәјин». Бу ҝөстәришләр субај мәсиһчиләр үчүндүр. Һәјат јолдашы иманда олмајанлара исә Мүгәддәс Китаб башга мәсләһәтләр верир. Бу мәсләһәтләр аиләдә меһрибан аб-һаваны горумаға көмәк едир. (1 Коринфлиләрә 7:12—16, 39; 2 Коринфлиләрә 6:14). Бүтүн бу нәсиһәтләрдән ајдын ҝөрүнүр ки, никаһын баниси олан Јеһова Аллаһ субајларын да, евлиләрин дә хошбәхт олмағыны истәјир.

[Һашијә]