Ахырзаман. Әламәтләри вә сизә аидијјәти

Тәсәввүрүнүздә ҝурулту илә чапан дөрд аты ҹанландырын. Биринҹи ат ағ рәнҝдәдир. Белиндә отуран јениҹә тахта чыхмыш шанлы падшаһдыр. Ардынҹа күрән ат чапыр. Белиндәки атлы јер үзүндән сүлһү ҝөтүрмәк үчүн ҝәлир. Онун архасынҹа чапан ат зил гара рәнҝдәдир. Бу аты чапанын әлиндә тәрәзи вар. Һәмин атлынын ҝәлиши әрзаг гытлығы хәбәрини ҹар чәкән бир сәслә мүшајиәт олунур. Ахырда ҝәлән солғун рәнҝли дөрдүнҹү ат хәстәлик вә башга һәјат тәһлүкәләринин хәбәрчисидир. Онун белиндә отуранын ады Өлүмдүр. Үмумбәшәр мәзар аддымбааддым онун далынҹа ҝәлир вә Өлүмүн сајсыз-һесабсыз гурбанларыны ағушуна алыр (Вәһј 6:1—8). Аллаһдан пејғәмбәрә ҝөрүм шәклиндә назил олмуш бу вәһј Инҹил китабында гәләмә алыныб вә ахырзамана аиддир. Ҝөрүм о гәдәр ҹанлы тәсвир олунуб ки, нечә-нечә охуҹуну һејрәтә салыб.

«Дөрд атлы һаггында илк дәфә охујанда ҹанымы горху алды. Елә билдим Һагг-һесаб ҝүнү ҝәлир, мән исә һазыр олмадығым үчүн мәһв олаҹағам» (Кристел).

«Дөрд атлы барәсиндәки ҝөрүм мәни чаш-баш гојмушду. Анҹаг бу вәһјин мәнасыны анлајанда һәр шеј ајдын олду» (Ед).

Әҝәр сиз Инҹилдәки бу вәһји охумусунуз, ја да һаггында ешитмисинизсә, ола билсин, сиз дә онун мәнасыны вә сизә аидијјәтини анламаг истәјирсиниз. Илк олараг гејд едәк ки, дөрд атлы сәһнәси Мүгәддәс Китабын «Вәһј» адланан сонунҹу гисминдә тәсвир олунан ән мәшһур сәһнәләрдән биридир. Буну да дејәк ки, бу вәһјин билаваситә сизә аидијјәти вар. Сорушаҹагсыныз неҹә? Аллаһ-Таала сөз верир ки, «бу пејғәмбәрлик сөзләрини уҹадан охујан, онлары ешидән вә орада јазыланлара әмәл едән адам» әсл хошбәхтлијә чатаҹаг (Вәһј 1:1—3).

Дөрд атлы һаггындакы вәһј инсанлары горхутмаг мәгсәдилә јазылмајыб. Әксинә, бу вәһјин мәнасыны анлајан милјонларла мөминин иманы артыб, ҝөзәл ҝәләҹәјә үмиди јараныб. Сиз дә бу инсанларын сырасында ола биләрсиниз. Нөвбәти мәгаләдә бу һагда даһа әтрафлы јазылыб.