Рәһбәрлик шурасынын мәктубу
Әзиз баҹы вә гардашлар!
СИЗӘ “Атамыз Аллаһ вә Рәббимиз Иса Мәсиһдән лүтф вә сүлһ олсун” (1 Кор. 1:3). “Бүтүн нәфәс саһибләри”нин, Јеһоваја Онун лајиг олдуғу иззәти верәҹәкләри вахты биз неҹә дә һәсрәтлә ҝөзләјирик (Мәз. 150:6). Бу бөјүк ҝүнү ҝөзләјәркән Аллаһын Падшаһлығы һаггындакы хош хәбәри бәјан етмәјә вә шаҝирдләр һазырламаға давам едирик.
Һал-һазырда Јеһова тәблиғ ишинә хүсуси диггәт јетирир (Марк 13:10). Јеһованын бу ишин иҹра олунмасы үчүн гајғы ҝөстәрдијини јадда сахлајараг, бу ишдә иштирак етмәк үчүн Аллаһдан гүввәт диләјир вә ејни заманда дәрк едирик ки, фидијә гурбанлығындан һәр бир инсан фајдалана биләр (Вәһј 14:6, 7, 14, 15). Бәли, бизим јолумузда чохлу чәтинликләр вар, лакин хидмәтимизи иҹра етмәк үчүн ‘сәмадан ҝәлән гүввәтлә тәҹһиз едилмәк’ имканына малик олдуғумуза ҝөрә биз неҹә дә миннәтдарыг! (Лука 24:49).
Өтән хидмәт илинә нәзәр салмаг вә бу мүддәт әрзиндә Јеһованын Өз садиг хидмәтчиләри васитәсилә етдији ишләр барәдә дүшүнмәк неҹә дә хошдур. Аллаһын халгы мүгәддәс руһ васитәсилә мөһкәмләнәрәк, дүнјанын онлара гаршы нифрәтинин өһдәсиндән ҝәлир вә Мәсиһин ҝөстәрдији мәһәббәти тәзаһүр етдирир. Бу мәһәббәт бизим конгресләримиздә хүсусилә нәзәрә чарпыр. 2003-ҹү илин ијун ајындан декабр ајына кими јүздән артыг өлкәнин нүмајәндәләри беш гит’әдә кечирилән 32 бејнәлхалг конгресләрдә олмушлар. Бир чох вилајәт вә бејнәлхалг конгресләрдә хариҹи тә’јинатларында хидмәт едән миссионерләрдән, бејнәлхалг програмын хидмәтчиләриндән вә Бејт-Елдә хидмәт едәнләрдән мүсаһибә ҝөтүрүлмүшдүр.
Бу конгресләрдә “Јахшы мәмләкәтә” бахын” (рус.) вә “Бөјүк Мүәллимдән өјрән” (рус.) адлы нәшрләр алдыг. Һәмчинин е’лан олунду ки, 2004-ҹү хидмәт илинин сонуна јахын “Пионер Хидмәти Мәктәби” дәрслијинин тәзәләнмиш варианты бурахылаҹаг. Узун мүддәт пионер кими хидмәт едән вә пионер мәктәбиндә охујанлар, тәдриҹән әсас е’тибары илә јени пионерләрдән ибарәт олан синифләрә дә’вәт олунаҹаглар.
Аллаһын дәстәкләмәси вә инсанларын сәхавәтли олмалары сајәсиндә бир чох Падшаһлыг Заллары тикилиб, хүсусилә дә мәһдуд ресурслу өлкәләрдә. Бүтүн дүнјада руһани гидаја тәләбат артдығы үчүн, бир чох өлкәләрдә филиалларын ҝенишләндирилмәси үзрә иш апарылыр. “Јер үзүндәки һәјата әбәдијјән севин!” брошүрасы һал-һазырда 299 дилдә нәшр олунур вә онун тиражы 139 милјон нүсхәдир; 161 дилдә чап олунан “Әбәди һәјата апаран билик” китабынын тиражы 93 милјон нүсхәдән чохдур; “Аллаһ биздән нә тәләб едир?” брошүрасы исә 267 дилдә 200 милјондан артыг чап едилиб.
Өтән хидмәт илиндә өзләрини Јеһоваја һәср етдикләрини суда вәфтизлә символлашдыран 258 845 баҹы вә гардашларымызы үрәкдән саламлајырыг! Аллаһын Падшаһлығыны дәстәкләдијиниз үчүн Шејтанын сизә хүсусилә нифрәт етдијинә бахмајараг, гаршыныза гојулан јарышда мәтанәтлә гачмағыныз сајәсиндә Јеһова сизә бол-бол хејир-дуалар верир вә сизи руһани ҹәһәтдән горујур (Ибр. 12:1, 2; Вәһј 12:17). Бәли, әмин олун ки, сизи “горујан мүрҝүләмәз” (Мәз. 121:3).
2004-ҹү илин “Ојаг дурун... һазыр олун” иллик ајәси там вахтындадыр (Мат. 24:42, 44). Мәсиһчиләр Аллаһын Кәламында мәһв олмаг үзрә олан бу дүнјада “гәрибләр” кими тәсвир олунурлар (1 Пет. 2:11; 4:7). Буна ҝөрә дә биз ҝәрәк диггәтимизи руһани ишләрә ҹәмләшдирәк, садә һәјат сүрәк вә үрәкләримизи диггәтлә јохлајаг. “Бөјүк әждаһа” бизи өз системинин бир һиссәси етмәк үчүн удмаға чалышыр (Вәһј 12:9).
Ајыг галмаг үчүн һәр ҝүн Мүгәддәс Китабы охумаг олдугҹа ваҹибдир. Бу, бизә Аллаһа һәср олунмамыза мүвафиг јашамагда вә бунунла да “бәли” демәјимизин доғрудан да “бәли” олдуғуну сүбут етмәјимизә көмәк едәҹәк; һәмчинин бу бизә ‘башланғыҹда биздә олан е’тимады сона гәдәр мөһкәм һифз етмәјимизә’ көмәк едәҹәкдир (Јаг. 5:12; Ибр. 3:14). Һәр ҝүн Мүгәддәс Китабы охумағын сајәсиндә бу дүнјанын Аллаһын дәјишмәз нормаларындан нә гәдәр узаглашдығыны јадда сахлаја биләҹәјик (Мал. 3:6; 2 Тим. 3:1, 13). Мүгәддәс Китаб билији “һијләҝәрҹәсинә ујдурулмуш нағыллардан” горунмагда вә Јеһоваја садиг галмагда бизә көмәк едәҹәк (2 Пет. 1:16; 3:11).
Валидејнләр! Ушагларынызы Јеһованын тәрбијә вә нәсиһәтилә бөјүдәркән, онлара гаршыларына руһани мәгсәдләр гојмаға вә “ојаг дурмаға” көмәк едирсинизми? (Ефес. 6:4). Јер үзүндә јашамыш ән һикмәтли шәхсијјәтин ҝәләҹәјә даир бахышыны ушагларыныза ашылајырсынызмы? Иса ән јахшы дүлҝәр, ихтирачы вә ја һәким ола биләрди, лакин бунун әвәзиндә о, таммүддәтли хидмәтә үстүнлүк вермишдир. Гој Исанын нүмунәси сизи тәшвиг етсин ки, ушагларыныза башлыҹа олараг Падшаһлығын мараглары үчүн јашамаға көмәк едәсиниз.
Рәһбәрлик шурасы илә тәмсил едилән “садиг вә ағыллы гул” Падшаһлыг һаггында олан бу Мүждәни милләтләрин һамысына шәһадәт олараг бүтүн дүнјада тәблиғ етмәк тапшырығыны јеринә јетирмәкдә ҝөстәрдији көмәклијә ҝөрә “бөјүк издиһама” үрәкдән тәшәккүрүнү билдирир (Мат. 24:14, 45; Вәһј 7:9). Әзиз баҹы вә гардашлар! Јеһова мәһз сизи әмин едир ки, “ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти” һеч заман унутмајаҹаг (Ибр. 6:10).
Горхусуз олараг ҝәләҹәјә доғру бахараг, диггәтинизи “мүкафата” јөнәлтмәјә давам един вә ону һеч бир адамын вә ја ҹинин әлиниздән алмасына јол вермәјин (Ибр. 11:26; Колос. 2:18). Јеһоваја ҝүвәнәрәк әмин олун ки, Ону севәнләрин һамысынын әбәди һәјата наил олмаларына көмәк едәҹәк (Јәһ. 6:48-54).
Әмин олун ки, сизинлә бирликдә Јеһованы мәдһ етмәк бизә севинҹ бәхш едир.
Сизин гардашларыныз,
Јеһованын Шаһидләринин Рәһбәрлик шурасы