Мөһкәм иманын тәзаһүрү!
1 Һәвариләр Исанын өз иштиракы вә системин ахыры барәдә дедикләрини диггәтлә динләјирдиләр. Иса бәшәријјәти тәлаша салаҹаг һадисәләрдән — мүһарибәләр, аҹлыг, зәлзәләләр вә гырғынлардан данышырды. Сонра о, давамчыларына нифрәт едиләҹәјини, онларын әлә вериләҹәјини вә өлдүрүләҹәјини деди. Јаланчы пејғәмбәрләр артараг бир чохларыны алдадаҹагды. Әксәр инсанларын севҝиси сојујаҹагды.
2 Исадан, белә вәзијјәтдә Аллаһын Падшаһлығы һаггында хош хәбәрин бүтүн дүнјада тәблиғ олунаҹағы хәбәрини ешитмәк, јәгин ки, һәвариләрә гәрибә ҝәлди (Мат. 24:3-14). Бу ҝүн биз һәјәҹан доғуран бу пејғәмбәрлијин мөһтәшәм шәкилдә јеринә јетмәсинин шаһидијик. Јашадығымыз ҝүнләр тәһлүкәли олса да, Јеһованын Шаһидләри хош хәбәри сәјлә тәблиғ едирләр. Дүнјада севҝи сојуса да, бизим севҝимиз ҝүнү-ҝүндән артыр. «Бүтүн халглар» бизә нифрәт етсә дә, биз, сөзүн әсл мәнасында, һәр халга тәблиғ едирик.
3 3-дән 6-ја кими сәһифәләрдәки ҹәдвәлдә Јеһованын Шаһидләринин кечән хидмәт или әрзиндә фәалијјәтинә нәзәр салмаг неҹә дә руһландырыҹыдыр! 16 илдир ки, һәр ил тәблиғ вә шаҝирд һазырламаг ишинә бир милјарддан чох саат сәрф едилир. Бу, һәгигәтән дә мөһкәм иманын тәзаһүрүдүр! Пионерләрин 5,8, тәблиғчиләрин 3,1, Мүгәддәс Китабы өјрәнәнләрин сајында исә 4,4 фаиз артым олмушдур. Кечән хидмәт илиндә вәфтиз олунанларын сајы 20,1 фаиз артмышдыр. Једди милјона јахын инсанын сәдагәтлә Јеһоваја хидмәт етмәсини ҝөрмәк неҹә дә һәјәҹанландырыҹыдыр! Бәшәр тарихиндә һәлә белә шеј олмајыб! Бу ҹәдвәлә баханда, сәни ән чох нә руһландырыр?
4 Биз һеч вахт унутмамалыјыг ки, бу һәјәҹан доғуран рәгәмләр иманларыны тәзаһүр етдирән инсанлары ҝөстәрир. Ҝилјермонун нүмунәсинә нәзәр салаг. О, 1935-ҹи илдә доғулуб вә Боливијада бөјүјүб. Ҝилјермо доггуз јашындан кока плантасијасында ишләјиб. О, ағыр физики ишин әзијјәтини јүнҝүлләшдирмәк үчүн ушаглыгдан кока биткисинин јарпагларыны чејнәјирди. Даһа сонра исә, спиртли ичкиләрә алудә олду вә сигарет чәкмәјә башлады. Јеһованын ондан нә тәләб етдијини өјрәнәндә Ҝилјермо сигаретә вә сәрхошлуға сон гојду. Узун илләрдир ки кока јарпагларыны чејнәмәк вәрдишини тәрҝитмәк онун үчүн ән чәтини олду. О, дурмадан дуа едирди вә бу вәрдишә галиб ҝәлди. Бүтүн пис вәрдишләри архада галды, о вәфтиз олунду. Ҝилјермо дејир: «Инди мән өзүмү тәмиз вә олдугҹа хошбәхт һисс едирәм».
5 Јеһова һәгигәтән инсанларла марагланыр. О истәјир ки, һамы төвбәјә ҝәлсин (2 Пет. 3:9). Буну биз дә истәјирик. Гој үрәјимиз бундан сонра да бизи башгаларынын Јеһованы танымасына вә севмәсинә көмәк етмәјә тәшвиг етсин.
[Өјрәнилмә үчүн олан суаллар]
1. Иса бәшәријјәти тәлаша салаҹаг һансы һадисәләрдән данышмышды?
2. Хош хәбәрин бүтүн дүнјада тәблиғ едилмәси нә үчүн һејрәтамиздир?
3. Үмумдүнја һесабатында һансы нәтиҹәләр сәни руһландырыр?
4. Бир киши вәфтиз олунана кими һансы проблемләрин өһдәсиндән ҝәлди?
5. Бизим истәјимиз нәдир?