Јени тәблиғчиләри тәблиғ етмәјә неҹә өјрәтмәк олар?
1. Тәблиғә илк дәфә чыхдығын заман өзүнү неҹә һисс едирдин?
1 Илк дәфә евдән-евә тәблиғә ҝетдијин ҝүн јадындадырмы? Јәгин тәшвиш ичиндә идин. Әҝәр сәнинлә Мүгәддәс Китабы өјрәнән тәблиғчи илә вә ја башгасы илә хидмәтә чыхмышдынса, шүбһәсиз, онлардан көмәк алдығына ҝөрә мәмнун идин. Инди исә тәҹрүбәли тәблиғчисән вә јени тәблиғчиләрә тәблиғ етмәји өјрәтмәк игтидарындасан.
2. Јени тәблиғчиләр нәји өјрәнмәлидирләр?
2 Јени тәблиғчиләр саһәдәки инсанларла сөһбәтә неҹә башламағы, гапы ағзында Мүгәддәс Китабдан истифадә етмәји, тәкрар башчәкмәләр етмәји, еләҹә дә Мүгәддәс Китаб өјрәнмәсинә башламағы вә кечирмәји өјрәнмәлидирләр. Онлар һәмчинин күчәдә шаһидлик вермәк вә ишҝүзар әразидә олан инсанлара баш чәкмәк кими тәблиғин мүхтәлиф нөвләриндә иштирак етмәји өјрәнмәлидирләр. Сән һәм өз нүмунәнлә, һәм дә мәсләһәтләринлә онлара хидмәтин бу нөвләриндә тәкмилләшмәјә көмәк едә биләрсән.
3. Өз нүмунәмизлә башгаларына неҹә көмәк едә биләрик?
3 Нүмунәнлә өјрәт. Иса шаҝирдләринә неҹә тәблиғ етмәји әјани шәкилдә ҝөстәрирди (Лука 8:1; 1 Пет. 2:21). Јени тәблиғчи илә хидмәтә чыхмағы планлашдыранда онун тәкрарлаја биләҹәји садә тәгдимәләр һазырла. Белә тәгдимәләри бизим әдәбијјатларымыздан тапмаг олар. Сонра исә бир-ики гапыны дөјүб биринҹи өзүн тәблиғ ет ки, јени тәблиғчи сәнин дедикләрини динләјә билсин. Нөвбәти гапыны дөјмәмишдән әввәл тәгдимәнин сәмәрәли олмасы барәдә нә дүшүндүјүнү соруша биләрсән. Бунун сајәсиндә о, башгалары илә хидмәтә чыхмағын дәјәрини анлајаҹаг вә тәгдимәсини сөјләдикдән сонра вердијин һәр һансы мәсләһәти даһа асанлыгла гәбул едәҹәк.
4. Јени тәблиғчијә тәгдимәсини динләдикдән сонра неҹә көмәк етмәк олар?
4 Мәсләһәт вер. Иса шаҝирдләринә неҹә тәблиғ етмәләринә даир ҝөстәришләр дә верирди (Мат. 10:5—14). Сән дә јени тәблиғчијә бу ҹүр көмәк едә биләрсән. О данышанда диггәтлә гулаг ас. Һәтта тәгдимәсиндә дүзәлиш етмәјә еһтијаҹ олдуғуну ҝөрсән белә, нөвбәти гапыны дөјмәмишдән әввәл, ону конкрет шејләрә ҝөрә вә сәмими-гәлбдән тәрифләмәјә чәкинмә. Мәсләһәт вермәмишдән әввәл, бах ҝөр нөвбәти гапыны дөјәндә тәгдимәсиндә дүзәлиш етди, јохса јох. Бәлкә о, садәҹә олараг һәјаҹанлы иди? Буну да јадда сахла ки, тәблиғчиләрин һамысынын габилијјәти ејни дејил вә чох вахт нәјисә етмәјин бир нечә дүзҝүн јолу олур (1 Кор. 12:4—7).
5. Мәсләһәт вермәк үчүн тәшәббүсү өз үзәримизә ҝөтүрән заман нә дејә биләрик?
5 Һәрдән јени тәблиғчи сәндән мәсләһәт истәјә биләр. Амма белә етмирсә, көмәк етмәк үчүн тәшәббүсү өз үзәринә ҝөтүр. Буну нәзакәтлә неҹә етмәк олар? Бәзи тәҹрүбәли тәблиғчиләр садәҹә олараг: «Олар, сәнә бир мәсләһәт верим?» вә ја «Бу барәдә нә дүшүнүрсән?» — дејә сорушурлар. Јахуд да белә дејә биләрсән: «Мән тәзә тәблиғчи оланда һесаб едирдим ки,.. чәтиндир, анҹаг бунун фајдалы олдуғуну ҝөрдүм...». Һәрдән «Мүлаһизә» китабына (рус.) бирҝә мүраҹиәт етмәк фајдалы оларды. Руһдан салмамаг үчүн тәгдимәсинин јалныз бир јөнүнә аид мәсләһәт вер.
6. Хидмәтә ҝәлдикдә, һансы мәнада ‘дәмир дәмири итиләјир’?
6 Дәмир дәмири итиләр. Павел тәҹрүбәли мүждәчи олан Тимотеји тәлим вермәклә мәшғул олмаға вә тәрәгги етмәјә тәшвиг едирди (1 Тим. 4:13, 15). Узун илләр хидмәт етмәјиндән асылы олмајараг, даһа да мәһарәтли олмаг үчүн үзәриндә ишләмәјә давам ет. Хидмәтдә әмәкдашлыг етдијин тәблиғчиләрдән, һәтта тәҹрүбәси аз оланлардан өјрән. Еләҹә дә башгаларына, хүсусилә јени тәблиғчиләрә хош хәбәрин мәһарәтли тәблиғчиләри олмаларына мүлајимликлә көмәк етмәјә һазыр ол (Сүл. мәс. 27:17).