10. Етибар

МӘНАСЫ

Етибарлы инсанлар валидејнләринин, достларынын вә мүдиринин етимадыны газаныр. Онлар гајдалара риајәт едир, сөзләринин үстүндә дурур вә һәмишә дүз данышыр.

ЗӘРУРӘТИ

Демәк олар ки, һәр мәсәләдә валидејнләринизин сизә сәрбәстлик вермәси сизин нә дәрәҹәдә етибаралајиг олдуғунузу сүбут етмәјиниздән асылыдыр.

«Валидејнләринизин етибарыны газанмағын ән јахшы јолу нәинки онлар јанынызда оланда, һәтта олмајанда белә јеткин вә мәсулијјәтли олдуғунузу ҝөстәрмәкдир» (Сераи).

МҮГӘДДӘС КИТАБ ПРИНСИПИ: «Өзүнүзү сынајын» (2 Коринфлиләрә 13:5).

ТӘТБИГИ

Даһа чох етибар газанмаг вә ја итирдијиниз етибары ҝери гајтармаг истәјирсинизсә, ашағыдакы аддымлар сизә көмәк едә биләр.

Дүрүст олун. Јалан данышмаг гәдәр етибары сарсыдан икинҹи бир шеј јохдур. Дүрүст олсаныз вә етдијиниз сәһвләри ҝизләтмәсәниз, башгаларынын етибарыны газанаҹагсыныз.

«Һәр шеј јахшы ҝедәндә дүрүст олмаг асандыр. Лакин сонда “пис инсан” кими гәләмә вериләҹәјиниз мәсәләләрдә дүрүст олсаныз, инсанлар сизә даһа чох етибар едәҹәкләр» (Кејман).

МҮГӘДДӘС КИТАБ ПРИНСИПИ: «Һәр саһәдә дүрүст олмаг истәјирик» (Ибраниләрә 13:18).

Ҝүвәнилән олун. АБШ-да кечирилән бир сорғуда инсан ресурслары мүтәхәссисләринин 78 фаизи билдирди ки, ҝүвәнҹ «ҝириш сәвијјәли вәзифәләр үчүн ән ваҹиб үч баҹарыгдан биридир». Индидән ҝүвәнилән олмағы өјрәнсәниз, бөјүјәндә дә фајдасыны ҝөрәҹәксиниз.

«Мәсулијјәтли оланда вә валидејнләримин хатырлатмасы олмадан ев ишләрими ҝөрәндә бу онларын нәзәриндән гачмыр. Мән белә давранмаға чалышдыгҹа, валидејнләрим мәнә даһа чох етибар едир» (Сара).

МҮГӘДДӘС КИТАБ ПРИНСИПИ: «Мәнә гулаг асаҹағына [ҝүвәнирәм]... вә әминәм ки, дедијимдән дә артығыны едәҹәксән» (Филимона 21).

Сәбирли олун. Тез нәзәрә чарпан физики инкишафдан фәргли олараг, емосионал вә мәнәви инкишафы ҝөрмәк үчүн инсанлара вахт лазымдыр.

«Валидејнләринизин вә башгаларынын етибарыны бир дәфәјә газана билмәзсиниз. Бунун үчүн мәсулијјәтләринизи һәмишә иҹра етмәлисиниз» (Брандон).

МҮГӘДДӘС КИТАБ ПРИНСИПИ: «Сәбри ҝејинин» (Колослулара 3:12).