Аллаһын Падшаһлығынын һакимијјәти алтында һәр јанда сүлһ олаҹаг

Тезликлә Аллаһын Падшаһлығы, јәни Аллаһын тәсис етдији үмумдүнја һөкумәт бүтүн јер үзүндә сүлһү вә әмин-аманлығы бәргәрар едәҹәк. Зәбур 72:7 ајәсиндә вәд едилдији кими, «һәр јанда сүлһ олаҹаг». Аллаһын Падшаһлығы бүтүн дүнјаны нә заман идарә едәҹәк? Аллаһын Падшаһлығы идарәчилији неҹә әлә алаҹаг? Аллаһын Падшаһлығынын вәтәндашы олмаг үчүн нә етмәлисиниз?

АЛЛАҺЫН ПАДШАҺЛЫҒЫ НӘ ЗАМАН ИДАРӘ ЕДӘҸӘК?

Мүгәддәс Китабда габагҹадан дејилмишди ки, бир сыра мүһүм һадисәләр Аллаһын Падшаһлығынын тезликлә идарә едәҹәјинә ишарә верәҹәк. Мүгәддәс Китабда бу һадисәләрин һамысы бирликдә «әламәт» адланыр. Бу әламәтә бүтүн дүнјада мүһарибәләр, аҹлыг, хәстәлик, зәлзәлә, һәрҹ-мәрҹлијин баш алыб ҝетмәси дахилдир (Мәтта 24:3, 7, 12; Лука 21:11; Вәһј 6:2—8).

Диҝәр бир пејғәмбәрликдә дејилир: «Ахырзаманда сон дәрәҹә чәтин бир вахт ҝәләҹәк. Чүнки инсанлар худбин, пулпәрәст,.. валидејнләринә итаәт етмәјән, нанкор, вәфасыз, доғмаларыны севмәјән, барышмаз, бөһтанчы, өзүнә һаким олмајан, залым, јахшылығын дүшмәни,.. тәкәббүрлү олаҹаглар, Аллаһдан чох ејш-ишрәти севәҹәкләр» (2 Тимутијә 3:1—4). Бу ҹүр кејфијјәтләр һәмишә мүәјјән дәрәҹәдә өзүнү бүрузә вериб, анҹаг инди инсанларын әксәријјәти беләдир.

Бу пејғәмбәрликләр 1914-ҹү илдән јеринә јетмәјә башлајыб. Һәгигәтән дә, тарихчиләр, дөвләт хадимләри вә јазычылар һәмин илдән дүнјанын неҹә дәјишдијини тез-тез шәрһ едир. Мәсәлән, Данимарка тарихчиси Питер Мүнк јазмышды: «1914-ҹү илдә мүһарибәнин башламасы бәшәр тарихиндә мүһүм дөнүш нөгтәси олду. Бөјүк тәрәгги епохасындан фәлакәт, дәһшәт, әдавәт вә тәһлүкә ерасына дахил олдуг».

Диҝәр тәрәфдән, буҝүнкү вәзијјәт јахшы бир шејин олаҹағына ишарә едир. Неҹә ки фыртынадан сонра сакитлик чөкүр, еләҹә дә бу һадисәләр ону ҝөстәрир ки, Падшаһлығын бүтүн јер үзүнү идарә едәҹәји вахта аз галыб. Иса Мәсиһ сонун әламәтиндән данышанда мүсбәт бир мәгамы да гејд етмишди: «Падшаһлыг һаггындакы бу мүждә халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мәтта 24:14).

Јеһованын Шаһидләринин тәблиғ етдији хәбәрин мәғзи бу мүждәдир. Елә Јеһованын Шаһидләринин әсас нәшри дә «Ҝөзәтчи гүлләси Јеһова Аллаһын Падшаһлығыны бәјан едир» адланыр. Журналда Аллаһын Падшаһлығынын бәшәријјәт вә јер күрәси үчүн едәҹәји мөһтәшәм ишләрдән данышылыр.

АЛЛАҺЫН ПАДШАҺЛЫҒЫ ИДАРӘЧИЛИЈИ НЕҸӘ ӘЛӘ АЛАҸАГ?

Бу суалын ҹавабы дөрд ваҹиб амили өзүнә дахил едир.

1. Аллаһын Падшаһлығы нә мүасир дүнјадакы сијаси рәһбәрләр васитәсилә тәмсил олунаҹаг, нә дә онларын васитәсилә фәалијјәт ҝөстәрәҹәк.

2. Дүнјанын сијаси лидерләри һакимијјәти әлдән вермәмәк үчүн сәфеһҹәсинә Аллаһын Падшаһлығына мејдан охујаҹаглар (Зәбур 2:2—9).

3. Аллаһын Падшаһлығы бәшәријјәти идарә етмәк севдасындан әл чәкмәјән дөвләтләри мәһв етмәли олаҹаг (Дәнјал 2:44; Вәһј 19:17—21). Бу сонунҹу үмумдүнја гаршыдурма Армаҝеддон адланыр (Вәһј 16:14, 16).

4. Көнүл хошлуғу илә Аллаһын Падшаһлығына табе олан һәр кәс Армаҝеддонда сағ галыб сүлһ ичиндә јени дүнјаја гәдәм гојаҹаг. Бу инсанларын сајы милјонларла олаҹаг вә онлар Мүгәддәс Китабда бөјүк издиһам адланан групу тәшкил едәҹәк (Вәһј 7:9, 10, 13, 14).

АЛЛАҺЫН ПАДШАҺЛЫҒЫНЫН ВӘТӘНДАШЫ ОЛМАГ ҮЧҮН НӘ ЕТМӘЛИСИНИЗ?

Аллаһын Падшаһлығынын вәтәндашы олмаг үчүн илк аддым тәһсилдир. Иса Мәсиһ дуада Аллаһа демишди: «Әбәди һәјат одур ки, Сәни, тәк ҝерчәк Аллаһы вә ҝөндәрдијин Иса Мәсиһи танысынлар» (Јәһја 17:3).

Јеһова Аллаһы танымаг инсана чохлу немәтләр бәхш едир. Ҝәлин бунлардан икисини нәзәрдән кечирәк. Биринҹиси, инсанда Аллаһа мөһкәм иман јараныр. Сүбутлара әсасланан бу иман инсаны әмин едир ки, Аллаһын Падшаһлығы ҝерчәкдир вә тезликлә идарә етмәјә башлајаҹаг (Ибраниләрә 11:1). Икинҹиси, инсанын Аллаһа вә инсанлара мәһәббәти артыр. Аллаһ севҝиси ону сидги-үрәкдән Аллаһа итаәт етмәјә тәшвиг едир. Инсанлара олан севҝи исә Иса Мәсиһин нөвбәти әмринә риајәт етмәјә тәшвиг едир: «Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един» (Лука 6:31).

Јараданымыз бир Ата кими, бизим јахшылығымызы истәјир. О истәјир ки, Мүгәддәс Китабда әсл һәјат адландырылан һәјаты јашајаг (1 Тимутијә 6:19). Бу ҝүн бизим јашајышымыз әсл һәјат дејил. Милјонларла инсан әзаб-әзијјәтлә әлләшиб-вурушур ки, бу ҝүндән сабаһа сағ чыхсын. Әсл һәјатын неҹә олаҹағыны билмәк үчүн Аллаһын Падшаһлығынын өз вәтәндашлары үчүн едәҹәји бәзи ишләрә нәзәр салаг.