Һәјатдан мәмнунлуг дујмағын сирләри
Субај вә ја евли, јашлы, јахуд ҹаван олмасындан асылы олмајараг, һәр кәс истәјир ки, хошбәхт олсун вә һәјатдан мәмнунлуг дујсун. Јараданымыз да буну истәјир, буна ҝөрә дә бизә чох ҝөзәл мәсләһәтләр верир.
Зәһмәткеш олун
«Оғурлуг едән даһа оғурлуг етмәсин, әлинин һалал зәһмәти илә долансын ки, корлуг чәкәнә дә әл тута билсин» (ЕФЕСЛИЛӘРӘ 4:28).
Аллаһ истәјир ки, биз ишҝүзар олаг. Чүнки зәһмәткеш инсан хошбәхтдир. О өзүнү вә аиләсини доландыра билир. Еһтијаҹы оланлара әл тутур. Белә адамын иш јериндә гәдир-гијмәти олур. Буна ҝөрә дә, чох еһтимал ки, ишини дә итирмир. Инсанын өз зәһмәти илә әлдә етдији бу наилијјәтләр Мүгәддәс Китабда Аллаһын бәхшиши адланыр (Ваиз 3:13).
Дүрүст олун
«Виҹданымызын тәмиз олдуғуна әминик, ахы һәр саһәдә дүрүст олмаг истәјирик» (ИБРАНИЛӘРӘ 13:18).
Дүрүст инсан өзүнә һөрмәт едир, горху-һүркү билмир, ҝеҹәләр раһат јатыр. Башгалары да она инаныр вә һөрмәт едир. Амма надүрүст инсан өзүнү бүтүн бунлардан мәһрум едир. Виҹданы ону нараһат едир. Горху ичиндә јашајыр ки, бирдән надүрүст әмәлләринин үстү ачылар.
Пула дүзҝүн јанашын
«Һәјатынызда пулпәрәстлијә јер вермәјин, нәјиниз варса, она гане олун» (ИБРАНИЛӘРӘ 13:5).
Доланмаг вә тәләбатларымызы өдәмәк үчүн бизә пул лазымдыр. Амма пулпәрәстлик чох тәһлүкәлидир. Пулпәрәст адам бүтүн вахтыны вә ҝүҹүнү пул газанмаға сәрф едир. Пул севдасы уҹбатындан аиләсиндә ҝәрҝинлик јараныр, ушагларына вахт ајыра билмир, һәтта сағламлығы да әлдән ҝедир (1 Тимутијә 6:9, 10). Ән бетәри исә одур ки, пулпәрәст адам надүрүстлүјә дә әл атыр. Бир һикмәтли инсан демишди: «Садиг инсанын хејир-бәрәкәти олар. Тез варланмаг истәјән тәмиз галмаз» (Мәсәлләр 28:20).
Ән јахшы елмә јијәләнин
«Һикмәти, дүшүнҹәни гору» (МӘСӘЛЛӘР 3:21).
Тәһсил бизә мәсулијјәтли инсан, јахшы валидејн олмаға көмәк едир, амма өз-өзлүјүндә инсана хош ҝүзәран вәд етмир. Һәјатын һәр саһәсиндә уғур газанмаг үчүн биз Аллаһын елминә јијәләнмәлијик. Мүгәддәс Китабда дејилир ки, Аллаһа итаәт едән инсан «һәр ишиндә уғур газанар» (Зәбур 1:1—3).