Технолоҝијанын тәсири. Никаһыныза
Дүзҝүн истифадә едилдикдә електрон ҹиһазлар әрлә арвадын мүнасибәтини мөһкәмләндирә биләр. Мәсәлән, онлар ҝүн әрзиндә бир-бирилә әлагә сахлаја биләрләр.
Лакин бәзи ҹүтлүкләр електрон ҹиһазлардан јанлыш истифадә едирләр. Бу сәбәбдән...
бир-биринә ајырмаға вахтлары галмыр.
иши лазымсыз јерә евә ҝәтирирләр.
араларында етибарсызлыг јараныр вә һәтта хәјанәтә јол верирләр.
НӘЈИ БИЛМӘК ЛАЗЫМДЫР?
ВАХТ АЈЫРЫН
Мајкл адлы бир киши дејир: «Бәзән арвадымла бир отагда олсаг да, адамда елә һисс олур ки, санки о, башга јердәдир. Онун башы телефонуна гарышыр. О дејир: “Телефона бахмаға вахтым олмајыб”». Ҹонатан адлы бир киши дејир ки, белә вәзијјәтләрдә әрлә арвад ҹисмән бир јердә олсалар да, руһән бир-бириндән чох узагдадырлар.
ДҮШҮНҮН: Һәјат јолдашымла вахт кечирәркән телефон зәнҝләри, месажлар, билдиришләр диггәтими тез-тез јајындырыр? (ЕФЕСЛИЛӘРӘ 5:33).
ИШ
Бәзиләринин иши еләдир ки, ҝеҹә-ҝүндүз телефона ҝәлән зәнҝләрә ҹаваб вермәли олурлар. Бәзиләринин исә иши буну тәләб етмәсә дә, евдә дә ишдән ајрыла билмирләр. Ли адлы бир киши дејир: «Арвадымла бирҝә кечирмәк үчүн ајырдығым вахтларда да өзүмү сахлаја билмәјиб ишлә бағлы ҝәлән зәнҝләрә вә месажлара ҹаваб верирәм». Ҹој адлы бир гадын дејир: «Мән евдән ишләјирәм. Буна ҝөрә дә иш сааты илә асудә вахт арасында сәрһәд гојмаг асан олмур».
ДҮШҮНҮН: Һәјат јолдашыныз сизинлә данышанда она диггәтлә гулаг асырсыныз? (ЛУКА 8:18).
СӘДАГӘТ
Бир сорғуја әсасән, әрлә-арвад арасында олан сөз-сөһбәтин әсас сәбәбләриндән бири сосиал медиадыр. Сорғуда иштирак едәнләрдән он фаизи етираф етмишдир ки, интернетдә һәјат јолдашындан ҝизли пајлашымлар едиб.
Мәһз елә буна ҝөрә сосиал медиа «никаһда миналанмыш әрази» вә һәтта «хәјанәт хидмәти» адланыр. Тәәҹҹүблү дејил ки, бошанма ишләринә бахан вәкилләрин сөзләринә ҝөрә, сосиал медиа мүасир дөврдә аиләләрин дағылмасынын башлыҹа сәбәбләриндән биридир.
ДҮШҮНҮН: Әкс ҹинсдән киминләсә үнсијјәт етдијинизи һәјат јолдашыныздан ҝизләдирсиниз? (МӘСӘЛЛӘР 4:23).
НӘ ЕДӘ БИЛӘРСИНИЗ?
НӘЈИН ВАҸИБ ОЛДУҒУНУ МҮӘЈЈӘН ЕДИН
Јемәјинә фикир вермәјән инсанын сәһһәтиндә проблемләр олаҹаг. Ејнилә, һәјат јолдашы илә мүнасибәтинә фикир вермәјән, онунла вахт кечирмәјән инсанын да никаһында проблемләр олаҹаг (Ефеслиләрә 5:28, 29).
МҮГӘДДӘС КИТАБДАН МӘСЛӘҺӘТ: «Даһа ваҹиб шејләри ајырд етмәји баҹарасыныз» (ФИЛИППИЛИЛӘРӘ 1:10).
Сизә ујғун олан мәсләһәтләри мүзакирә един, јахуд өз фикирләринизи јазын.
Һәр ҝүн ән азы бир дәфә бирликдә јемәк јејин.
Һәр ҝүн мүәјјән вахт әрзиндә електрон ҹиһаздан истифадә етмәјин.
Бирликдә ҝәзмәјә ҝедин.
Електрон ҹиһазы јатдығыныз отагдан кәнара гојун.
Електрон ҹиһазынызы сөндүрүб һәр ҝүн ән азы он беш дәгигә бир-биринизлә сөһбәт един.
Ҝүнүн мүәјјән вахтында интернети сөндүрүн.