Тәлатүмлү вахтларда доғмаларынызла мүнасибәти горумаг үчүн нөвбәти аддымлары атын
АИЛӘ ТЕЛЛӘРИНИ МӨҺКӘМЛӘНДИРИН
Аилә телләрини мөһкәмләндирин
Мүгәддәс Китабда дејилир: «Ики нәфәр бир нәфәрдән јахшыдыр... Әҝәр бири јыхылса, диҝәри јолдашыны галдыраҹаг» (Ваиз 4:9, 10). Әрлә арвад ики рәгиб команданын јох, ејни команданын ојунчуларына бәнзәјир. Онларын мәгсәди ејнидир: бирликдә гәләбә чалмаг.
Диггәтли олун ки, һирсинизи бир-биринизин үстүнә төкмәјәсиниз. Бир-биринизә гаршы сәбирли олун.
Ән азы һәфтәдә бир дәфә һәјат јолдашынызла проблемләринизи мүзакирә един. Чалышын проблеми һәлл едәсиниз, бир-биринизи һәдәфә алмајасыныз.
Бирликдә севдијиниз ишләри ҝөрүн.
Бирҝә кечирдијиниз хош анлары хатырлајын, мәсәлән, тој шәкилләринә бахын вә ја диҝәр хош хатирәләри јада салын.
«Дүздүр, әрлә арвадын фикри һәр шејдә үст-үстә дүшмүр. Амма бу о демәк дејил ки, онлар әл-әлә вериб проблеми һәлл едә билмәзләр. Ҹүтлүк бирҝә гәрар верә биләр, сонра исә бу гәрары һәјата кечирмәк үчүн әлләриндән ҝәләни едә биләр» (Дејвид).
ДОСТЛАРЛА МҮНАСИБӘТИ ГОРУЈУН
Достларла мүнасибәти горујун
Достларыныздан көмәк алмагла јанашы, дүшүнүн ҝөрүн сиз онлара неҹә көмәк едә биләрсиниз. Башгаларына дајаг оланда инсан өзү дә ҝүҹ тапыр.
Һәр ҝүн бир нечә достунузла әлагә сахлајыб һал-әһвал тутун.
Ејни чәтинликләрдән кечмиш достларыныздан сорушуб марагланын: Онлар бу чәтинликләри неҹә ашыблар?
«Һәјатын кешмәкешли анларында дост бир бәләдчи кими инсана јол ҝөстәрир, бәзән елә өзүнүн дә билдијин шејләри јадына салараг сәни дүзҝүн истигамәтә јөнәлдир. Достлар бир-биринә бел бағлајырлар, архајындырлар ки, дар ҝүндә бир-биринә дајаг олаҹаглар» (Никол).
ӨВЛАДЛАРЫНЫЗА ДАЈАГ ОЛУН
Өвладларыныза дајаг олун
Мүгәддәс Китабда дејилир: «Һәр бир инсан ешитмәјә һазыр олмалы, данышмаға... тәләсмәмәлидир» (Јагуб 1:19). Ола билсин, өвладларыныз әввәл-әввәл горху вә нараһатлыгларыны дилә ҝәтирмәк истәмәсинләр. Амма сәбирлә динләсәниз, онлар үрәкләрини сизә ачыб-бошалдаҹаглар.
Елә шәраит јарадын ки, ушаглар үрәкләриндән кечәни сизә ачыб дејә билсинләр. Бәзи ушаглара валидејнлә үзбәүз отуруб сөһбәт етмәк чәтиндир. Онлар сүфрә архасында әјләшәндә, һараса ҝедәндә даһа сәрбәст олурлар вә валидејнләри илә ачыг данышырлар.
Диггәт јетирин ки, өвладларыныз хошаҝәлмәз хәбәрләрә чох гулаг асмасынлар.
Ушаглары аиләнизин тәһлүкәсизлији үчүн ҝөрдүјүнүз тәдбирләрдән хәбәрдар един.
Фөвгәладә һалларда нә едәҹәјинизи планлашдырын вә ушагларынызла бирҝә мәшг един.
«Өвладларынызла сөһбәт един. Гојун үрәкләриндән кечәнләри ачыб данышсынлар. Ола билсин, онлар горху, тәлаш, гәзәб һисси кечирирләр, анҹаг буну ҝизләдирләр. Онлара билдирин ки, сиз дә ејни һиссләри кечирирсиниз. Һәмчинин бу һиссләрлә неҹә мүбаризә апардығыныз барәдә данышын» (Бетани).