Фәсил 1

Ҝөјдән ҝәлән хәбәрләр

МҮГӘДДӘС КИТАБ бүтөвлүклә ҝөјдән ҝәлмишдир вә Аллаһ-Таала онун васитәсилә бизә рәһбәрлик верир. Тәхминән 2000 ил бундан әввәл «Аллаһын һүзурунда дуран» Ҹәбрајыл мәләк ики дәфә јер үзүнә ҝөндәрилди. О, ики ваҹиб хәбәр ҝәтирмишди. Ҝәлин бу ики сәфәрлә бағлы һадисәләрә нәзәр салаг.

Бизим ерадан әввәл 3-ҹү ил иди. Јәһудејанын дағлыг бөлҝәсиндә, еһтимал ки, Јерусәлимә јахын бир јердә Јеһова Аллаһа каһин кими хидмәт едән Зәкәријјә адлы бир киши јашајырды. Зәкәријјә вә онун арвады Елизабет гоҹалыб јаша долмушдулар, амма ушаглары јох иди. Аллаһын мәбәдиндә хидмәт етмәк нөвбәси јетишәндә Зәкәријјә Јерусәлимә ҝедир. О, мәбәддә каһинлик хидмәтини иҹра едәркән гәфләтән Ҹәбрајыл бухур гурбанҝаһынын сағ тәрәфиндә пејда олур.

Зәкәријјә бәрк горхур. Амма Ҹәбрајыл ону сакитләшдириб дејир: «Зәкәријјә, горхма, чүнки Аллаһ сәнин јалварышыны ешитди. Арвадын Елизабет сәнә бир оғул доғаҹаг вә онун адыны Јәһја гојаҹагсан». Ҹәбрајыл сонра дејир ки, «о, Јеһованын ҝөзүндә бөјүк олаҹаг» вә «халгы Јеһоваја һазырлајаҹаг».

Лакин Зәкәријјәнин буна инанмағы ҝәлмир. О инана билмир ки, онун вә Елизабетин бу јашда ушағы ола биләр. Онда Ҹәбрајыл она дејир: «Бунлар баш верәнә гәдәр дилин тутулаҹаг вә даныша билмәјәҹәксән, она ҝөрә ки,.. сөзләримә инанмадын».

Бу арада чөлдәки ҹамаат Зәкәријјәнин мәбәддә бир белә ләнҝидијинә тәәҹҹүбләнир. Нәһајәт, чөлә чыханда дили тутулур вә јалныз әл-голу илә данышыр, онда ҹамаат баша дүшүр ки, о, мәбәддә гејри-ади бир шеј ҝөрүб.

Зәкәријјә мәбәддә хидмәти баша вуруб евинә гајыдыр. Бир гәдәр сонра мәләјин сөзләри ҝерчәкләшир, Елизабет һамилә галыр. О, һамиләлик дөврүндә беш ај һеч јана чыхмыр.

Ҹәбрајыл јенидән пејда олур. Бәс бу сәфәр о, киминлә данышыр? Назарет шәһәриндә јашајан Мәрјәм адлы ҹаван бир гызла. Ҝөрәсән, Ҹәбрајыл Мәрјәмә һансы хәбәри ҝәтириб? О дејир: «Сән Аллаһын ҝөзүндә лүтф тапмысан. Сән һамилә галыб оғул доғаҹагсан вә адыны Иса гојаҹагсан». Амма Мәрјәм һәлә әрдә дејил. Ҹәбрајыл сөзүнә давам едир: «О, бөјүк олаҹаг вә Аллаһ-Тааланын Оғлу адланаҹаг... О, Јагубун еви үзәриндә әбәдијјән һөкмранлыг едәҹәк, онун падшаһлығынын сону олмајаҹаг».

Сөзсүз ки, Ҹәбрајыл бу хәбәрләри чатдырмағы өзүнә бөјүк шәрәф һесаб едир. Јәһја пејғәмбәр вә Иса Мәсиһ һаггында даһа чох өјрәндикҹә бу хәбәрләрин нә гәдәр ваҹиб олдуғуну дәрк едәҹәјик. 2 Тимотејә 3:16; Лука 1:5—33.

▪ Аллаһ һансы ики ваҹиб хәбәри ҝөндәрир?

▪ Бу хәбәрләри ким вә кимләрә ҝәтирир?

▪ Нәјә ҝөрә бу хәбәрләрә инанмаг асан дејил?