Фәсил 2
Доғулмаздан әввәл она еһтирам ҝөстәрилди
ҸӘБРАЈЫЛ Мәрјәмә оғлан ушағы доғаҹағыны вә бу ушағын әбәди падшаһ олаҹағыны билдирдикдән сонра Мәрјәм ондан сорушур: «Бу неҹә ола биләр? Ахы мәним киши хејлағы илә јахынлығым олмајыб?»
Ҹәбрајыл ҹаваб верир: «Мүгәддәс руһ үзәринә ҝәләҹәк, Аллаһ-Тааланын ҝүҹү сәнин үстүндә көлҝә кими олаҹаг. Буна ҝөрә дә доғаҹағын ушаға мүгәддәс дејиләҹәк, о, Аллаһын Оғлу адланаҹаг».
Ҹәбрајыл Мәрјәми инандырмаг үчүн әлавә едир: «Бах, сонсуз адландырылан гоһумун Елизабет дә гоҹа јашында бир оғлан ушағына һамилә галыб вә артыг алтынҹы ајындадыр. Чүнки Аллаһын дедији һәр бир сөз мүтләг јеринә јетир».
Мәрјәм Ҹәбрајылын сөзүнә инаныр. Бәс бу хәбәр она неҹә тәсир едир? Мәрјәм һәјәҹан ичиндә дејир: «Мән Јеһованын кәнизијәм! Гој сән дејән кими олсун».
Ҹәбрајыл ҝедәндән бир гәдәр сонра Мәрјәм һазырлашыб, Елизабетә гонаг ҝедир. Елизабет әри Зәкәријјә илә бирҝә Јәһудејанын дағлыг бөлҝәсиндә јашајыр. Мәрјәмин јашадығы Назарет шәһәриндән ораја үч-дөрд ҝүнлүк узун бир јолдур.
Мәрјәм нәһајәт ҝәлиб Зәкәријјәнин евинә чатыр. О, ичәри ҝириб салам верәндә Елизабет мүгәддәс руһла долуб Мәрјәмә дејир: «Гадынлар арасында нә бәхтијарсан, бәтниндәки ушаг да нә бәхтијардыр! Ҝөр мәнә неҹә бөјүк шәрәф нәсиб олуб! Ағамын анасы јаныма ҝәлиб! Бах, саламыны ешидән кими, гарнымдакы ушаг севинҹиндән тәрпәнди».
Мәрјәм бу сөзләри ешидәндә еһтирамла ҹаваб верир: «Гәлбим Јеһованы уҹалдыр, руһум Аллаһыма, Хиласкарыма ҝөрә ҹуша ҝәлир, чүнки О, кәнизинин фағырлығына фикир верди. Бундан сонра бүтүн нәсилләр мәнә бәхтијар дејәҹәкләр. Гүдрәтли Аллаһым мәним үчүн бөјүк ишләр етди». Бахмајараг ки, Мәрјәмә бөјүк шәрәф нәсиб олуб о, Аллаһы уҹалдыр: «Онун ады мүгәддәсдир, Ондан горханлара нәсилдән-нәслә мәрһәмәт ҝөстәрир».
Мәрјәм ичиндә пејғәмбәрлик олан бир нәғмәдә Аллаһы тәрәннүм едир: «Голунун гүввәти илә бөјүк ишләр ҝөрдү, үрәјиндә тәкәббүрлү нијјәт тутанлары пәрән-пәрән етди. О, һакимләри тахтдан салды, фағырлары јүксәлтди; аҹлары бол немәтләрлә дојдурду, варлылары әлибош гајтарды. О, гулу Исраилин имдадына чатды, чүнки Ибраһимә вә онун нәслинә әбәдијјән мәрһәмәт ҝөстәрәҹәјини аталарымыза вәд етмишди».
Мәрјәм тәхминән үч ај Елизабетин јанында галыр вә она көмәклик ҝөстәрир. Һамиләлик дөврү баша чатан Елизабет үчүн бу гајғы лап јеринә дүшүр. Аллаһын көмәјилә һамилә галмыш бу ики сәдагәтли гадынын һәјатларынын белә бир чағында бирҝә олмалары неҹә дә хошдур!
Ҝөрүн, һәлә доғулмаздан әввәл Исаја неҹә еһтирам ҝөстәрилди! Елизабет Мәрјәми гаршылајанда Исаја «Ағам» деди, Елизабетин бәтниндәки ушаг исә бәрк тәрпәнди. Амма ирәлидә ҝөрәҹәјик ки, башгалары Мәрјәмә вә онун һәлә доғулмамыш ушағына һөрмәтсизлик ҝөстәрдиләр. Лука 1:26—56.
▪ Ҹәбрајыл Мәрјәмә һамилә галаҹағыны неҹә изаһ едир?
▪ Һәлә доғулмаздан әввәл Исаја неҹә еһтирам ҝөстәрилди?
▪ Мәрјәм Аллаһы һансы сөзләрлә тәрәннүм едир?
▪ Мәрјәм Елизабетин јанында нә гәдәр галыр вә бу, нә үчүн јахшы иди?