Фәсил 6
Вәд едилмиш ушаг
ЈУСИФ вә Мәрјәм Назаретә гајытмајыблар, онлар һәлә Бетлеһемдәдирләр. Аллаһын Муса пејғәмбәрә вердији Гануна ҝөрә онлар сәккиз ҝүнлүк Исаны сүннәт едирләр. Ҝөрүнүр, Исраилдә оғлан ушағына сүннәт едилән ҝүн ад верилирди. Јусифлә Мәрјәм Ҹәбрајыл мәләјин ҝөстәришинә әсасән, ушаға Иса адыны гојурлар.
Бир мүддәт кечир, Иса артыг гырх ҝүнлүкдүр. Инди валидејнләри ону ҝөтүрүб Аллаһын Јерусәлимдәки мәбәдинә ҝәтирирләр. Бура онларын галдығы евдән ҹәми бир нечә километр мәсафәдә јерләшир. Мусанын Ганунуна әсасән, оғлан ушағы гырх ҝүнлүк оланда анасы пак олмаг үчүн мәбәдә гурбан ҝәтирмәли иди.
Мәрјәм дә белә едир. О, ики балаҹа гуш гурбан ҝәтирир. Бурадан биз Јусифлә Мәрјәмин касыб јашадыгларыны өјрәнирик. Әслиндә, Ганун гадындан бир тоғлу гурбан ҝәтирмәји тәләб едирди. Тоғлу гушдан гат-гат баһа иди. Әҝәр гадынын буна ҝүҹү чатмырдыса, онда бир ҹүт гумру гушу, јахуд да ики ҝөјәрчин ҝәтирә биләрди.
Мәбәддә Шимеон адлы гоҹа бир киши Исаны гуҹағына ҝөтүрүр. Јеһова Аллаһ она билдирмишди ки, о, вәд едилмиш Мәсиһи ҝөрмәјинҹә өлмәјәҹәк. Јусифлә Мәрјәм ушағы мәбәдә ҝәтирдикләри ҝүн Шимеон да мәбәдә ҝәлир вә мүгәддәс руһ ону көрпә Исанын јанына апарыр.
Шимеон ушағы гуҹағында тутуб Аллаһа шүкүр едир: «Пәрвәрдиҝара! Дедијин кими, инди гулун мәзара архајынлыгла ҝедәҹәк, чүнки бүтүн милләтләрин өнүндә һазырладығын хилас јолуну өз ҝөзләримлә ҝөрдүм. О, милләтләрин ҝөзүндәки дувағы галдыран ишыгдыр, халгын Исраилин шәрәфидир».
Јусифлә Мәрјәм бунлары ешидәндә һејрәтләнирләр. Сонра Шимеон онлара хејир-дуа вериб Мәрјәмә дејир ки, онун оғлу «Исраилдә бир чохларынын јыхылмасы вә јенидән галхмасы үчүндүр» вә кәдәр Мәрјәмин гәлбини ити гылынҹ кими јарыб кечәҹәк.
Бу вахт 84 јашлы гадын пејғәмбәр Анна да орада иди. О, һеч вахт мәбәддән ајрылмырды. Анна онлара јахынлашыб Аллаһа шүкүр етмәјә башлајыр вә ону динләјән һәр адама Иса һаггында данышыр.
Јусиф вә Мәрјәм мәбәддә баш верәнләри ҝөрүб һәдсиз севинирләр. Бүтүн бунлар бир даһа онлары әмин едир ки, Иса Аллаһын вәд етдији ушагдыр! Лука 2:21—38; Левилиләр 12:1—8.
▪ Исраилдә оғлан ушагларына нә вахт ад гојурдулар?
▪ Исраилдә оғлан ушағы гырх ҝүнлүк оланда ана нә етмәли иди вә Мәрјәмин бу тәләби јеринә јетирмәсиндән онун мадди вәзијјәти һаггында нә өјрәнирик?
▪ Исанын Хиласкар олдуғу кимләрә бәлли олур вә онлар буну неҹә ҝөстәрирләр?