Фәсил 7

Иса вә мүнәҹҹимләр

ШӘРГДӘН бир нечә адам ҝәлир. Бу адамлар улдузларын һал вә һәрәкәтини јозмағы баҹардыгларыны иддиа едән мүнәҹҹимләрдир. Онлар шәргдә, өлкәләриндә јени бир улдуз ҝөрмүш вә онун ардынҹа дүз Јерусәлимә гәдәр јүзләрлә километр јол гәт етмишләр.

Јерусәлимә чатдыгда онлар сорушурлар: «Јәһудиләрин тәзәҹә анадан олмуш падшаһы һарададыр? Биз шәргдә оланда онун улдузуну ҝөрдүк вә она тәзим етмәјә ҝәлмишик».

Јерусәлимдә олан падшаһ Һирод буну ешидәндә тәшвишә дүшүр. О, бөјүк каһинләри топлајыб онлардан Мәсиһин һарада доғулаҹағыны хәбәр алыр. Онлар Мүгәддәс Јазылара әсасән, ҹаваб верирләр: «Бетлеһем шәһәриндә». Сонра Һирод мүнәҹҹимләри јанына чағырыб онлара дејир: «Ҝедин, ушағы јахшы-јахшы ахтарын вә тапан кими мәнә хәбәр верин ки, мән дә ҝәлиб она тәзим едим». Әслиндә, о, ушағы өлдүрмәк истәјир.

Онлар јола дүшдүкдән сонра гәрибә бир шеј баш верир. Шәргдә ҝөрдүкләри улдуз онларын габағынҹа ҝедир. Ҝөрүнүр ки, бу гејри-ади бир улдуздур, ахы о, мүнәҹҹимләрә јол ҝөстәрмәк үчүн ҝөндәрилиб. Улдуз ҝәлиб Јусифлә Мәрјәмин галдыглары евин үзәриндә дајананаҹан онлар онун далынҹа ҝедирләр.

Мүнәҹҹимләр евә ҝирирләр. Онлар Мәрјәмлә балаҹа Исаны ҝөрәндә диз чөкүб ушаға тәзим едирләр. Сонра торбаларындан гызыл, ағ бухур вә әтирли гатран чыхарыб она тәгдим едирләр. Онлар ҝеријә гајыдыб ушағын јерини Һирода билдирмәк истәјәндә јухуда Аллаһдан хәбәрдарлыг алырлар ки, буну етмәсинләр. Буна ҝөрә дә өз өлкәләринә башга јолла гајыдырлар.

Сизҹә, мүнәҹҹимләрә јол ҝөстәрән бу улдузу ким ҝөндәрмишди? Јадыныздадыр, о, мүнәҹҹимләри бирбаша Бетлеһемә, Исанын олдуғу јерә јох, әввәлҹә Јерусәлимә, Исаны өлдүрмәк истәјән падшаһ Һиродун јанына ҝәтирмишди. Әҝәр Аллаһ ишә гарышыб мүнәҹҹимләрә хәбәрдарлыг вермәсәјди, Һирод Исаны өлдүрәҹәкди. Әслиндә, Исанын өлүмүнү арзулајан кәс Аллаһын дүшмәни олан Шејтан Иблис иди. Бу нијјәтинә јетишмәк үчүн һәмин улдузу о ҝөндәрмишди. Матта 2:1—12; Микеја 5:2.

▪ Мүнәҹҹимләрин ҝөрдүјү улдузун гејри-ади олмасы нәдән бәлли олур?

▪ Мүнәҹҹимләр Исаны һарада тапырлар?

▪ Мүнәҹҹимләрә јол ҝөстәрмәк үчүн улдузу Шејтанын ҝөндәрдији нәдән ајдын олур?