Фәсил 13
Илк сынаг
ИСА МӘСИҺ вәфтиз оландан дәрһал сонра Аллаһын руһу ону Јәһудејадакы чөллүјә апарыр. Вәфтиз вахты «ҝөјләрин ачылмасы» илә Иса сәмави шејләри дәрк етмәјә башладығындан инди о, чох дүшүнмәлидир. Бәли, ҝөтүр-гој етмәли чох шеј вар.
Иса 40 ҝүн, 40 ҝеҹә чөллүкдә галыр вә һеч бир шеј јемир. О, бәрк аҹыр. Елә бу заман Шејтан ҝәлиб ону сынамаға башлајыр: «Әҝәр сән Аллаһын оғлусанса, әмр ет ки, бу дашлар чөрәјә дөнсүн». Амма Иса јахшы билир ки, харигүладә габилијјәтиндән өз шәхси истәкләри үчүн истифадә етмәк дүзҝүн дејил. О, бу тәклифи рәдд едир.
Шејтан исә әл чәкмир, о, башга фәнд ишләдир. Бу сәфәр о, Исаја дејир ки, Аллаһын мәбәдинин һасарынын үстүндән ашағы атылсын вә гој Аллаһын мәләкләри ону хилас етсинләр. Лакин өзүнү бу јолла дүнјаја нүмајиш етдирмәк Исанын һеч ағлына да ҝәлмир вә о, бу тәклифи дә рәдд едир. О, Мүгәддәс Јазылара истинад едәрәк ҝөстәрир ки, Аллаһы бу ҹүр сынамаг олмаз.
Онда Шејтан дүнјанын бүтүн падшаһлыгларыны мөҹүзә јолу илә Исаја ҝөстәриб белә бир тәклиф едир: «Әҝәр диз чөкүб мәнә сәҹдә гылсан, бүтүн бунлары сәнә верәҹәјәм». Иса билир ки, бу ҝүнаһ ишдир вә бу дәфә дә ширникдириҹи тәклифә ујмур. О, Аллаһа садиг галмаг әзминдәдир.
Исанын үзләшдији бу сынаглардан биз нә өјрәнирик? Илк нөвбәдә, бу сынаглар тәсдиг едир ки, Шејтан Иблис бәзиләринин дүшүндүјү кими, инсан үрәјиндәки пислик јох, реал, ҝөзәҝөрүнмәз шәхсијјәтдир. Һәмчинин бурадан ҝөрүнүр ки, дүнјадакы бүтүн һөкумәтләр Иблисә мәхсусдур. Әҝәр бу белә олмасајды, Шејтан онлары Исаја неҹә тәклиф едә биләрди?
Ҝәлин бир шејә хүсуси диггәт јетирәк. Шејтан деди ки, әҝәр Иса Мәсиһ ҹәми бир дәфә әјилиб она сәҹдә гылса, ону мүкафатландыраҹаг, һәтта сөз верди ки, дүнјанын бүтүн падшаһлыгларыны она пешкәш едәҹәк. Иблис бизи дә ширникләндирмәк үчүн бу үсула әл ата биләр. Белә ки, бизә бу дүнјада варланмаг, һакимијјәт, шан-шөһрәт саһиби олмаг кими пуч шејләрә баш гошмаға имканлар јарада биләр. Лакин һансы бир сынаг олурса олсун, Иса Мәсиһ кими, Аллаһа садиг галмаг ән ағыллы ишдир! Матта 3:16; 4:1—11; Марк 1:12, 13; Лука 4:1—13.
▪ Иса Мәсиһ 40 ҝүн чөллүкдә оларкән нәләрин үзәриндә дүшүнүр?
▪ Иблис Иса Мәсиһи һансы шејләрлә ширникдирир?
▪ Иса Мәсиһин үзләшдији сынаглардан нә өјрәнирик?