Фәсил 22
Дөрд шаҝирд чағырылыр
ИСА МӘСИҺ ону өлдүрмәк истәдикләри Назарет шәһәрини тәрк едиб Галилеја ҝөлү тәрәфә, Капернаһум шәһәринә ҝедир. Беләҹә, Јешаја пејғәмбәрин јаздығы даһа бир пејғәмбәрлик јеринә јетир. Һәмин пејғәмбәрликдә дејилирди ки, саһил бојунҹа јашајан Галилеја ҹамааты парлаг ишыг ҝөрәҹәк.
Бәли, Иса Мәсиһ инсанлара нур, јәни сәмави Падшаһлыг һаггында хош хәбәри ҝәтириб. Бу әразидә тәблиғ едәркән Иса шаҝирдләриндән дөрдүнү тапыр. Габаглар ону мүшајиәт етмиш бу кишиләр Јәһудејадан ҝери дөнәндән сонра јенидән балыгчылыг пешәсинә гајытмышдылар. Инди Исаја даими көмәкчиләр лазымдыр ки, башладығы иши өзүндән сонра давам етдирмәк үчүн онлара тәлим вериб бу хидмәтә һазырласын. Јәгин, бу сәбәбдән о, һәмин шаҝирдләри ахтарыб тапыр.
Бир ҝүн Иса Мәсиһ ҝөлүн саһили илә ҝедәркән Шимон Петер вә јолдашлары торлары јујурдулар. Иса онлара јахынлашыр. О, Петерин гајығына минир вә хаһиш едир ки, гајығы бир гәдәр саһилдән араласын. Сонра гајыгда әјләшиб саһилдә топлашмыш ҹамаата тәлим вермәјә башлајыр.
Иса сөзүнү битирдикдән сонра Петерә дејир:
— Гајығы бир дәрин јерә сүрүб торлары суја атын.
— Мүәллим, бүтүн ҝеҹәни әлләшмишик, амма бир шеј тутмамышыг. Инди ки сән дејирсән, баш үстә, торлары атарам.
Балыгчылар тору суја атырлар вә тора о гәдәр чох балыг дүшүр ки, јыртылмаға башлајыр. Онлар о бири гајыгдакы јолдашларыны көмәјә чағырыб балыглары гајыглара долдурурлар. Гајыглар ағзынаҹан долур вә батмаға башлајыр. Петер иши белә ҝөрәндә Исанын габағында диз үстә дүшүб дејир:
— Аға, мән ҝүнаһлы адамам, мәни бурах.
— Горхма! Индән белә дири адам овлајаҹагсан, — дејә Иса она тохтаглыг верир.
Иса Мәсиһ Петерин гардашы Андреасы да дәвәт едир. Онлара дејир: «Ардымҹа ҝәлин. Бундан сонра балыг јох, инсан тутаҹагсыныз». Петер вә Андреасла бирҝә балыгчылыг едән Зебедејин оғланлары Јагуб вә Јәһја да дәвәт алырлар. Онлар да тәрәддүд етмәдән разылашырлар. Бу дөрд киши балыгчылыг пешәсини бурахыб Исанын даими шаҝирди олурлар. Лука 5:1—11; Матта 4:13—22; Марк 1:16—20; Јешаја 9:1, 2.
▪ Иса Мәсиһ кимләри ардынҹа ҝетмәјә чағырыр вә буну нә үчүн едир?
▪ Һансы мөҹүзә Петери горхудур?
▪ Иса Мәсиһ шаҝирдләрини һансы ишә чағырыр?