Фәсил 34

Иса һәвариләрини сечир

ВӘФТИЗЧИ ЈӘҺЈАНЫН Иса Мәсиһи «Аллаһын Гузусу» кими тәгдим етмәсиндән вә Исанын тәблиғ хидмәтинә башламасындан тәхминән бир ил јарым кечиб. Иса хидмәтә башлајанда Шимон Петер, Андреас, Јәһја, ола билсин, онун гардашы Јагуб, Филип вә Натанаел (диҝәр ады Бартоломеј) онун илк шаҝирдләри олдулар. Сонрадан башгалары да онлара гошулуб Мәсиһин ардынҹа ҝетмәјә башлајыр.

Артыг вахт јетишиб, инди Иса һәвариләрини тәјин етмәлидир. Бу һәвариләр онун јахын достлары олаҹаг вә о, онлара хүсуси тәлим верәҹәк. Сечим етмәздән әввәл Иса даға галхыр вә бүтүн ҝеҹәни орада галыб дуа едир. Јәгин ки, о, Аллаһдан һикмәт вә хејир-дуа диләјир. Сәһәр ачыланда о, шаҝирдләрини чағырыб араларындан он ики нәфәри сечир. Бу он ики нәфәр һәвари олмагла јанашы, һәм дә шаҝирд адланыр, она ҝөрә ки, Исадан тәлим алмагда давам едирләр.

Он ики һәваридән алтысы јухарыда адлары чәкилән шаҝирдләрдир. Даһа бир нәфәр верҝијыған Маттадыр. Галан беш нәфәр исә бунлардыр: Јәһуда (диҝәр ады Тадај), Јәһуда Искариот, Шимон (ләгәби «Гејрәтли»), Томас вә Алфеј оғлу Јагуб. Бу Јагуба «Балаҹа Јагуб» да дејилирди, јәгин она ҝөрә ки, о бири Јагубдан боју балаҹа иди, јахуд да ондан јашҹа кичик иди.

Бу он ики киши артыг хејли вахтдыр ки, Исанын јанындадыр, буна ҝөрә дә о, онлары јахшы таныјыр. Үстәлик, онлардан бир нечәси онун гоһумларыдыр. Мисал үчүн, Јагуб вә Јәһја ҝәрәк ки, онунла халаоғлудурлар. Һәмчинин, ҝүман едилир ки, о бири Јагубун атасы Алфеј Исанын аталығы Јусифин гардашыдыр. Белә олдугда, бу Јагуб Исаја әмиоғлу ҝәлир.

Адәтән, чохлу адамын адыны дәрһал јадда сахламаг чәтин олур. Биз һәвариләрин адларыны белә јадда сахлаја биләрик: ики нәфәрин ады Шимондур, икисинин ады Јагуб, икисининки Јәһуда. Шимонун гардашынын ады Андреасдыр, Јагубун гардашынын ады Јәһја. Бу олду сәккиз нәфәр. Галан дөрд һәвари: верҝијыған Матта, Томас (Иса дирилиб шаҝирдләрә ҝөрүнәндә, о, онларла олмадығындан буна шүбһә етмишди), Натанаел (о чағырыланда әнҹир ағаҹынын алтында иди) вә онун досту Филип.

Һәвариләрдән он бир нәфәри Иса кими галилејалыдыр: Натанаел Кана шәһәриндәндир; Шимон Петер, Андреас вә Филип Бејтсајдадан (сонрадан Шимон Петер вә Андреас Капернаһума көчмүшдүләр). Матта Капернаһумда олурду; әввәлләр балыгчылыг едән Јагубла Јәһјанын да һәмин шәһәрдә, ја да онун јахынлығында јашадығы ҝүман едилир. Ҝөрүнүр, тәкҹә Јәһуда Искариот (бу шаҝирд сонрадан Иса Мәсиһи сатмышды) јәһудејалы иди. Марк 3:13—19; Лука 6:12—16.

▪ Һәвариләрдән кимләрин Иса илә гоһум олдуғу ҝүман едилир?

▪ Биз һәвариләрин адларыны неҹә јадда сахлаја биләрик?

▪ Һәвариләр һаралы идиләр?