Фәсил 63

Диҝәр нәсиһәтләр

ИСА МӘСИҺ Капернаһумдакы евдә һәвариләри илә сөһбәт едир. Онлардан кимин ән бөјүк олдуғу сөһбәтиндән сонра диҝәр һадисәдән сөз дүшүр. Ҝөрүнүр, бу һадисә дә онлар Капернаһума гајыдаркән јолда баш вериб вә Иса һәмин вахт һәвариләрин јанында олмајыб. Һәвари Јәһја һадисәни данышыр: «Мүәллим, биз бир адам ҝөрдүк. О, сәнин адындан истифадә едиб ҹинләри говурду. Биз она мане олмаға чалышдыг, чүнки о бизимлә ҝәзмир».

Јәгин, Јәһја белә дүшүнүр ки, һәвариләр хүсуси бир групдур вә адам сағалтмаға јалныз онларын ихтијары вар. Јәһјанын фикринҹә, һәмин адам онларын групуна аид олмадығындан онун мөҹүзәви иш ҝөрмәси мүнасиб дејил.

Анҹаг Иса онлара дејир: «Она мане олмајын, чүнки мәним адымла гүдрәтли ишләр ҝөрән адам бундан дәрһал сонра гајыдыб мәни писләмәз. Бизә гаршы чыхмајан, бизим тәрәфимиздәдир. Мәсиһә мәхсус олдуғунуз үчүн сизә бир парч су верән, инанын ки, мүкафатсыз галмајаҹаг».

Һәмин адама, Исанын тәрәфдары сајылмаг үчүн, мүтләг Исанын јанында олмаг ҝәрәк дејилди. О вахт мәсиһчи јығынҹағы һәлә јаранмамышды. Буна ҝөрә дә бу киши һәвариләрлә бирҝә олмурдуса, о демәк дејилди ки, башга група мәнсуб иди. О, Исанын адына иман ҝәтирдији үчүн ҹинләри гова билирди; беләҹә, Исанын мүкафата лајиг сајдығы бир иши ҝөрүрдү. Исанын дедијинә ҝөрә, о, «мүкафатсыз галмајаҹаг».

Бәс әҝәр һәвариләрин сөзләри вә ја һәрәкәтләри бу кишини иман јолундан дөндәрсәјди, онда неҹә? Бунун нәтиҹәси чох ағыр олаҹагды. Иса гејд едир: «Иман едән бу кичикләрдән бирини ҝүнаһа сүрүкләјән адам үчүн јахшы оларды ки, бојнуна дәјирман дашы асыб ону дәнизә тулласынлар».

Сонра Иса шаҝирдләринә дејир ки, әҝәр әл, ајаг вә ја ҝөз кими зәрури бир шеј олса белә, онлары ҝүнаһа сүрүкләјирсә, ону чыхарыб атсынлар. Бәдәнин зәрури үзвләриндән бирини итириб Аллаһын Падшаһлығына ҝирмәк һәмин үзвү сахлајыб әбәди мәһвин символу олан «Һинном дәрәси»нә (Јерусәлим зибилханасынын олдуғу јер) атылмагдан јахшыдыр.

Иса һәмчинин хәбәрдарлыг едир: «Бахын һа, бу кичикләрдән биринә сајмазјана јанашмајын. Буну билин ки, онларын мәләкләри ҝөјдә даима сәмави Атамын үзүнү ҝөрүрләр». Сонра о, «кичикләрин» нә гәдәр дәјәрли олдуғуну ҝөстәрмәк үчүн бир мәсәл чәкир. Иса јүз гојуну олан бир адамдан данышыр: әҝәр бу адам гојунлардан бирини итирәрсә, дохсан доггузуну гојаҹаг вә итмиш бир гојуну ҝедиб ахтараҹаг. Тапанда исә дохсан доггузундан өтрү севиндијиндән артыг ондан өтрү севинәҹәк. «Ејнилә дә, мәним сәмави Атам бу кичикләрдән бирҹәсинин белә мәһв олмасыны истәмир», — дејә Иса мәсәли јекунлашдырыр.

Ола билсин, Иса шаҝирдләрин бајагкы мүбаһисәсини нәзәрдә тутараг онлары тәшвиг едир: «Гој ичиниздә дуз олсун, бир-биринизлә меһрибан олун». Дуз јемәјә дад верир. Ејнилә, мәҹази мәнада дуз гатылмыш сөзү гәбул етмәк асан олур. Бунун сајәсиндә арада меһрибанчылыг олур.

Лакин гејри-камиллик уҹбатындан арабир ҹидди анлашылмазлыглар олаҹаг. Бәс белә һалларда неҹә давранмалы? Иса изаһ едир: «Әҝәр гардашын бир ҝүнаһ иш тутса, ҝет онунла тәкликдә даныш, ҝүнаһыны үзүнә де. Әҝәр о, сәнә гулаг асса, бил ки, сән гардашыны газандын». Бәс гулаг асмаса? Иса мәсләһәт верир: «Өзүнлә бир вә ја ики нәфәр ҝөтүр ки, мәсәлә ики вә ја үч шаһидин дили илә тәсдиг олунсун».

Әҝәр јенә дә иш јолуна гојулмазса, Иса дејир ки, онда мәсәләни јығынҹаға, јәни јығынҹаға нәзарәт едән ағсаггаллара данышмаг лазымдыр ки, онлар бу мәсәлә илә бағлы өлчү ҝөтүрсүнләр. Тәгсири олан адам ағсаггалларын гәрарына да гулаг асмазса, Исанын сөзүнә ҝөрә, «гој о адам сәнин үчүн бир бүтпәрәст вә ја верҝијыған кими олсун».

Интизам ишләринә бахан ағсаггаллар Јеһованын Кәламындакы ҝөстәришләрә ҹидди риајәт етмәлидирләр. Бу тәгдирдә, онларын кимисә тәгсирли билиб ҹәзаја лајиг олмасы барәдә чыхартдыглары гәрар артыг «ҝөјдә бағланмыш олаҹаг»дыр. Јахуд онларын «јердә ачдыглары һәр шеј», јәни киминсә ҝүнаһсыз олмасы барәдә гәрарлары артыг «ҝөјдә дә ачылмыш олаҹаг»дыр. Бу ҹүр интизам ишләри илә әлагәдар Иса дејир: «Ики вә ја үч адам мәним адым наминә бир јерә јығышанда, мән дә орада, онларын арасындајам». Матта 18:6—20; Марк 9:38—50; Лука 9:49, 50.

▪ Нәјә ҝөрә Иса јердә оланда мүтләг онун јанында олмаг тәләб олунмурду?

▪ «Кичикләрдән» бирини ҝүнаһа сүрүкләмәк нә дәрәҹәдә ҹидди мәсәләдир вә Иса бу «кичикләрин» дәјәрли олдуғуну неҹә ҝөстәрир?

▪ Исанын һәвариләринә вердији «ичиниздә дуз олсун» мәсләһәти нә илә әлагәдардыр?

▪ «Бағламаг» вә «ачмаг» ифадәләринин мәнасы нәдир?