Фәсил 67

Исаны тутмаг мүмкүн олмур

ЧАРДАГЛАР бајрамы һәлә давам едир вә дин хадимләри Исаны һәбс етмәк үчүн кешикчиләри ҝөндәрирләр. Иса ҝизләнмир, әксинә, халг гаршысында тәлим верәрәк дејир: «Мәни ҝөндәрәнин јанына гајытмаздан әввәл бир аз да сизинлә галаҹағам. Сиз мәни ахтараҹагсыныз, амма тапмајаҹагсыныз вә ҝетдијим јерә ҝәлә билмәјәҹәксиниз».

Јәһудиләр бунун мәнасыны баша дүшмүрләр. Онлар бир-бириләриндән сорушурлар: «Бу адам һара ҝедир ки, биз ону тапмајаҹағыг? Бәлкә, о, јунанларын арасында јашајан јәһудиләрин јанына ҝедиб јунанлары да өјрәтмәк фикриндәдир? Ҝөрәсән о: “Мәни ахтараҹагсыныз, амма тапмајаҹагсыныз вә ҝетдијим јерә ҝәлә билмәјәҹәксиниз”, — сөзләри илә нә демәк истәјир?» Иса өзүнүн тезликлә өләҹәјиндән, дириләҹәјиндән вә ҝөјдәки ҝәләҹәк һәјатындан данышыр; онун дүшмәнләри ораја ҝедә билмәјәҹәкләр.

Бајрамын једдинҹи, јәни сонунҹу ҝүнү ҝәлир. Бу једди ҝүн әрзиндә һәр сәһәр каһин Силоам һовузундан ҝөтүрдүјү сују бошалдырды вә су ахыб гурбанҝаһын дибинә чатырды. Иса, ола билсин, бу адәти ҹамаата хатырладараг дејир: «Сусајан јаныма ҝәлиб ичсин. Ким мәнә иман едәрсә, Мүгәддәс Јазыларда дејилдији кими, онун “ичиндән һәјат сулары ахаҹаг”».

Бурада Иса мүгәддәс руһ төкүләндә һасил олаҹаг ҝөзәл бәһрәләрдән данышыр. Мүгәддәс руһ ҝәлән ил, Әллинҹи ҝүн бајрамында төкүләҹәкди. Онда Исанын 120 шаҝирди инсанлара тәблиғ етмәјә башлајаҹаг вә һәмин вахтдан бәри «һәјат сулары» ахаҹагды. О вахта кими Мәсиһин шаҝирдләриндән һеч бири мүгәддәс руһла мәсһ олунуб ҝөјләр һәјатына дәвәт алмамышды, мүгәддәс руһ бу мәнада һәлә ҝәлмәмишди.

Бәзиләри Исанын тәлимини динләјәрәк дејир: «Бу адам, доғрудан да, Пејғәмбәрдир!» «Пејғәмбәр» дејәркән онлар, ҝөрүнүр, Мүгәддәс Јазыларда вәд едилмиш Муса пејғәмбәрдән бөјүк пејғәмбәри нәзәрдә тутурлар. Бир башгалары дејир: «Бу Мәсиһдир». Анҹаг етираз едәнләр дә вар: «Мәҝәр Мәсиһ Галилејадан ҝәләҹәк? Ахы Мүгәддәс Јазыларда јазылыб ки, Мәсиһ Давудун нәслиндән олаҹаг вә Давудун јашадығы Бетлеһем кәндиндән ҝәләҹәк».

Беләликлә, ҹамаат арасында ихтилаф јараныр. Адамларын бир гисми Исаны јахаламаг фикринә дүшүр, амма һеч ким буна ҹүрәт етмир. Кешикчиләр әлибош гајыданда бөјүк каһинләр вә фәрисејләр сорушурлар: «Ону нијә ҝәтирмәдиниз?»

Кешикчиләр ҹаваб верирләр: «Биз һәлә өмрүмүздә ҝөрмәмишик ки, кимсә белә данышсын».

Һирсләриндән зәнҹир ҝәмирән фәрисејләр кешикчиләри лаға гојуб сөјүрләр вә јалана әл атырлар. Фәрисејләр ришхәндлә: «Дејәсән, о, сизи дә јолдан чыхарыб! Ҝөрүн, һеч рәһбәрләрдән вә ја фәрисејләрдән кимсә она инаныр? Бу ләнәтә ҝәлмиш ҹамаатын исә Ганундан хәбәри јохдур», — дејирләр.

Бундан сонра Синедрионун үзвү, јәни јәһуди рәһбәрләриндән олан Никодим адлы бир фәрисеј Исанын тәрәфини сахламаға ҹүрәт едир. Јәгин, хатириниздәдир ки, һәмин Никодим ики ил јарым бундан әввәл ҝеҹә вахты Исанын јанына ҝәлиб она иман ҝәтирдијини ҝөстәрмишди. Инди о дејир: «Мәҝәр бизим ганун, инсаны динләмәдән вә онун ишини арашдырмадан она һөкм кәсмәјә јол верир?»

Өз араларындан киминсә Исаја тәрәфдар чыхдығыны ҝөрән фәрисејләр даһа да гызышырлар: «Олмаја, сән дә галилејалысан? — дејә кинајә атырлар. — Ахтарсан ҝөрәрсән ки, Галилејадан һеч вахт пејғәмбәр чыхмаз».

Мүгәддәс Јазыларда Галилејадан пејғәмбәр ҝәләҹәји бирбаша дејилмәсә дә, о бөлҝәдә парлаг ишыг ҝөрүнәҹәк сөзләри Мәсиһин орадан ҝәләҹәјинә ишарә едир. Үстәлик, Иса Бетлеһемдә доғулуб вә Давуд падшаһын көкүндәндир. Фәрисејләр бу фактлары билирләр, амма, ҝөрүнүр, халг арасында Иса барәсиндә јанлыш мәлуматлары јајан онлардыр. Јәһја 7:32—52; Јешаја 9:1, 2; Матта 4:13—17.

▪ Бајрамын једди ҝүнү әрзиндә һәр сәһәр нә олур вә Иса буна неҹә диггәт јетирир?

▪ Нә үчүн кешикчиләр Исаны ҝәтирмирләр вә фәрисејләр буна неҹә реаксија верирләр?

▪ Никодим кимдир вә о, Исаја неҹә мүнасибәт бәсләјир? Фәрисејләр она нә дејирләр?

▪ Мәсиһин Галилејадан ҝәләҹәјинә һансы дәлилләр вар?