Фәсил 97

Үзүм бағындакы ишчиләр

ИНДИ Иса бир мәсәл данышыр. Бу мәсәлин көмәји илә о, «биринҹиләрдән бир чоху ахырынҹы, ахырынҹылар исә биринҹи олаҹаг» сөзләринин мәнасыны ачыглајыр. О сөзә башлајыр: «Сәмави падшаһлыг, сәһәр тездән дуруб үзүмлүјүндә ишләмәк үчүн адам тутмаға чыхан бир мүлкәдара бәнзәјир».

«Мүлкәдар ишчиләрлә ҝүнүнү бир динара данышыб онлары үзүмлүјүнә ҝөндәрди. О, сәһәр саат доггузда јенидән чөлә чыхды вә базар мејданында бикар дурмуш бир нечә адам ҝөрдү вә онлара деди: “Сиз дә үзүмлүјә ҝедин. Һаггынызы верәҹәјәм”. Онлар ҝетдиләр. Мүлкәдар һәм ҝүнорта саат он икидә, һәм үчдә чөлә чыхды вә ејни шеји етди. О, ахшамүстү саат бешдә дә чөлә чыхыб орада дуран адамлары ҝөрдү вә онлара деди: “Нијә бүтүн ҝүнү бош-бикар дурмусунуз?” Онлар ҹаваб вердиләр: “Һеч кәс бизә иш вермәјиб”. Мүлкәдар онлара деди: “Сиз дә үзүмлүјүмә ҝедин”».

Мүлкәдар Јеһова Аллаһ, үзүмлүк исә Исраил халгыдыр. Үзүмлүкдә ишләјән ишчиләр һәвариләрин дөврүндә јашајан вә Ганун әһдинә табе олан јәһудиләри тәмсил едир. Мүлкәдар әмәк һаггынын мәбләғи барәдә јалныз бүтүн ҝүнү ишләјәнләрлә сөвдәләшир. Бир ҝүнлүк әмәк һаггы бир динардыр. Сәһәр саат доггузда ҝәләнләр 9, ҝүнорта он икидә ҝәләнләр 6, үчдә ҝәләнләр 3, ахшамүстү бешдә ҝәләнләр исә ҹәми 1 саат ишләјирләр.

«Сәһәр тездән» ишә чыхыб 12 саат ишләјән ишчиләр даима дини фәалијјәтлә мәшғул олан јәһуди рәһбәрләрини тәмсил едир. Онлардан фәргли олараг, Исанын шаҝирдләри узун илләр боју балыгчылыгла, јахуд диҝәр пешәләрлә мәшғул олмушлар. Јалныз ерамызын 29-ҹу илинин пајызында «Мүлкәдар» бу шаҝирдләри топламаг үчүн Иса Мәсиһи јер үзүнә ҝөндәрди. Онлар «ахырынҹы», башга сөзлә, ахшамүстү 5-дә ҝәлән ишчиләр олдулар.

Беләликлә, символик иш ҝүнү Исанын өлүмү илә баша чатыр, артыг ишчиләрә әмәк һаггы вермәјин вахтыдыр. Бу мәсәлдә әмәк һаггы әввәлҹә сонунҹу ҝәләнләрә верилир. «Ахшам дүшәндә үзүмлүјүн саһиби нөкәрбашыја деди: “Ишчиләри чағыр вә сонунҹудан башлајыб биринҹијә гәдәр һамысынын зәһмәт һаггыны вер”. Саат бешдән ишләјәнләр ҝәлдиләр вә һәрәси бир динар алды. Ишә биринҹи башлајанлар исә елә дүшүнүрдүләр ки, даһа чох алаҹаглар. Амма онлара да бир динар верилди. Онлар пулу аланда мүлкәдара наразылыг етдиләр: “Бу ахырынҹылар ҹәми бир саат ишләјибләр. Биз исә бүтүн ҝүнү бу истидә әлләшиб-вурушмушуг. Амма сән онлары бизә тај еләдин”. Мүлкәдар онлардан биринә деди: “Гардаш, мән сәнә һагсызлыг етмирәм. Сәнинлә бир динара данышмамышыг? Һаггыны ал, чых ҝет. Мән ахырынҹылара да бу гәдәр вермәк истәјирәм. Өзүм биләрәм, өз пулумла нә едирәм. Јохса хејирхаһ олдуғуму ҝөрүб пахыллығын тутур?” Беләҹә, ахырынҹылар биринҹи, биринҹиләр дә ахырынҹы олаҹаг».

Әмәк һаггы Иса өлән вахт јох, ерамызын 33-ҹү илинин Әллинҹи ҝүн бајрамында «нөкәрбашы»нын, јәни Мәсиһин шаҝирдләри үзәринә мүгәддәс руһ төкүлән заман верилир. Исанын бу шаҝирдләри «ахырынҹы», башга сөзлә, саат бешдә ҝәлән ишчиләрдир. Динар мүгәддәс руһ әнамынын өзү дејил. Динар руһани Исраилин үзвү олуб Аллаһын Падшаһлығыны тәблиғ етмәк үчүн бу руһла мәсһ олунмаг шәрәфини билдирир. Шаҝирдләрин индики вә әбәди һәјаты ондан асылыдыр. Онлар јалныз јердә ондан истифадә едирләр.

Чох чәкмәдән биринҹи чағырылмыш ишчиләр ҝөрүрләр ки, Исанын шаҝирдләри символик динары алыб ондан истифадә едирләр. Лакин биринҹи чағырыланлар мүгәддәс руһ вә онун васитәсилә верилән Падшаһлыг имтијазларындан да артыг бир шеј истәјирләр. Онларын наразылығы вә дејинмәси нәтиҹәдә үзүмлүкдә чалышан «ахырынҹыларын», јәни Мәсиһин шаҝирдләринин тәгиб олунмасына ҝәтириб чыхарыр.

Бәс ҝөрәсән, Исанын бу мәсәли тәкҹә биринҹи әсрә аиддир? Хејр. Сон әсрләрдә христиан дүнјасынын дин хадимләри әлләриндә вәзифә вә сәлаһијјәт олдуғу үчүн Аллаһын символик үзүм бағында «биринҹи» ишчиләр олдулар. Онлар һесаб едирләр ки, Јеһованын Шаһидләринин мәсиһчи јығынҹағынын үзвләри Аллаһа хидмәтдә ваҹиб тапшырыг алмаға лајиг дејилләр, јәни «ахырынҹы»дырлар. Амма мәһз дин хадимләринин һәгарәтлә бахдыглары бу «ахырынҹылар» динар алдылар. Онлар Аллаһын Падшаһлығынын мүгәддәс руһла мәсһ олунмуш сәфирләри шәрәфинә лајиг ҝөрүлдүләр. Матта 19:30—20:16.

▪ Үзүмлүк нәдир? Мүлкәдар, 12 саат вә 1 саат ишләјән ишчиләр кимләри тәмсил едир?

▪ Символик иш ҝүнү нә вахт баша чатды вә әмәк һаггы нә заман верилди?

▪ Динар нәји билдирир?