Фәсил 100

Он мина барәдә мәсәл

ҜӨРҮНҮР, Јерусәлимә ҝедән Иса һәлә дә Заккајын евиндәдир. Шаҝирдләр елә билирләр ки, о, Јерусәлимдә Мәсиһ олдуғуну халга бәјан едәҹәк вә падшаһлығыны гураҹаг. Иса онлара јанылдыгларыны вә Аллаһын Падшаһлығынын чох-чох узагда олдуғуну ҝөстәрмәк үчүн бир мәсәл чәкир:

«Күбар аиләдән олан бир адам падшаһлыг һакимијјәтини алыб ҝери гајытмаг үчүн узаг бир өлкәјә јолланырды». «Күбар аиләдән олан адам» Исадыр, «узаг өлкә» исә ҝөјләрдир. Иса ҝөјә гајыданда Атасы она падшаһлыг һакимијјәтини верәҹәкди.

Лакин бу күбар адам јола дүшмәздән өнҹә он нөкәрини чағырыр вә һәр биринә бир мина дәјәриндә ҝүмүш пул вериб дејир: «Мән ҝәләнә кими бу пулу дөвријјәјә бурахын». Он нөкәр биринҹи нөвбәдә Исанын илк шаҝирдләрини, ҝениш мәнада исә Падшаһлығын һәмвариси ола биләҹәк һәр кәси тәмсил едир.

Ҝүмүш мина дәјәрли пулдур; бу, әкин-бичинлә мәшғул олан адамын үч ајлыг газанҹыдыр. Бәс мина нәјин символудур? Нөкәрләр ону дөвријјәјә неҹә бурахмалыдырлар?

Бу миналар Исанын тахтда отураҹағы вахтадәк Падшаһлығын һәмварисләринин сајыны артырмаг үчүн мәсһ олунмуш шаҝирдләрин истифадә едәҹәји васитәләрдир. Иса дирилиб шаҝирдләринә ҝөрүндүкдә символик миналары онлара верир ки, онлар даһа чох шаҝирд һазырлајыб Падшаһлығын һәмварисләрини топласынлар.

Иса сөзүнә давам едир: «Лакин өлкәсинин вәтәндашлары она нифрәт едирдиләр вә ардынҹа бир нечә елчи ҝөндәриб дедиләр: “Биз бу адамын үзәримиздә һөкмранлыг етмәсини истәмирик”». Бурада вәтәндашлар, Исанын шаҝирдләрини чыхмаг шәртилә, исраиллиләри, башга сөзлә, јәһудиләри тәмсил едир. Иса ҝөјә галхдыгдан сонра јәһудиләр онун шаҝирдләрини тәгиб етмәјә башладылар. Онлар күбар адамын далынҹа елчи ҝөндәрән өлкә вәтәндашлары кими һәрәкәт едирләр: Иса ҝөјә галхдыгдан сонра јәһудиләр онун шаҝирдләрини тәгиб етмәјә башлајараг Исаны өз падшаһлары кими гәбул етмәдикләрини ҝөстәрирләр.

Бу он нөкәр миналардан неҹә истифадә едир? Иса нәгл едир: «Падшаһлыг һакимијјәтини алыб ҝери гајыдандан сонра о, һәмин нөкәрләри јанына чағыртдырды ки, ҝөрсүн онлара вердији ҝүмүш пулун дөвријјәсиндән нә гәдәр ҝәлир әлдә едибләр. Биринҹи нөкәр ҝәлиб деди: “Ағам, вердијин мина он мина ҝәтирди”. Ағасы она деди: “Афәрин, гочаг нөкәр! Хырда бир ишдә садиг олдуғун үчүн сәнә он шәһәр үзәриндә һакимијјәт верирәм”. Сонра икинҹи нөкәр ҝәлиб деди: “Ағам, вердијин мина беш мина ҝәтирди”. Ағасы бу нөкәрә дә деди: “Сәнә дә беш шәһәр үзәриндә һакимијјәт верирәм”».

Он минасы олан нөкәр ерамызын 33-ҹү илинин Әллинҹи ҝүн бајрамындан бәри Исанын шаҝирдләриндән ибарәт олан групу тәмсил едир. Һәвариләр дә бу група дахилдир. Беш мина газанан нөкәр дә ејни вахт кәсијиндә јашајан вә имканы дахилиндә падшаһын јер үзүндәки мүлкүнү артыран групдур. Бу груплар хош хәбәри ҹанла-башла тәблиғ едир вә бунун сајәсиндә чохлу сајда сәмими инсан Мәсиһин давамчысы олур. Бәли, он нөкәрдән доггузу ишләрини сәмәрәли гуруб әлләриндә олан миналары артырырлар.

Иса давам едир: «Лакин башга бириси ҝәлиб белә деди: “Ағам, ал, бу да сәнин пулун. Ону јајлыға бүкүб сахламышам. Сәндән горхдум, чүнки сән инсафсыз адамсан; гојмадығыны ҝөтүрүрсән, әкмәдијини бичирсән”. Ағасы она деди: “Јарамаз нөкәр! Сән өз дилинлә өзүнү мәһкум етдин. Ахы сән мәним гојмадығыны ҝөтүрән, әкмәдијини бичән инсафсыз адам олдуғуму билирдин! Белә исә, нә үчүн ҝүмүш пулу дөвријјәјә бурахмадын ки, гајыданда ону фаизлә ҝери алым?” Онда аға јанындакылара деди: “Пулу бундан алыб он минасы олана верин”».

«Јарамаз нөкәр» символик минаны итирмәклә сәмави Падшаһлыгда јерини әлдән верир. Бәли, о, мәҹази мәнада беш вә ја он шәһәр үзәриндә һакимлик етмәк шәрәфиндән мәһрум олур. Ону да гејд едәк ки, бу нөкәр пис иш тутдуғуна ҝөрә јох, ағасынын әмлакыны артырмадығы үчүн јарамаз адланыр.

Јарамаз нөкәрин пулу биринҹи нөкәрә вериләндә бәзиләри етираз едир: «Аға, ахы онун артыг он минасы вар!» Лакин Иса дејир: «Буну билин ки, кимдә варса, она даһа чох вериләҹәк, кимдә јохдурса, әлиндәки дә алынаҹаг. Үзәрләриндә падшаһлыг етмәјими истәмәјән дүшмәнләрими исә бура ҝәтириб ҝөзүмүн габағында өлдүрүн». Лука 19:11—27; Матта 28:19, 20.

▪ Иса он мина мәсәлини нәјә ҝөрә данышыр?

▪ «Күбар адам» кимдир вә о, һара ҝедир?

▪ «Нөкәрләр» кимләри тәмсил едир? «Миналар» нәји билдирир?

▪ «Өлкә вәтәндашлары» кимләрдир вә күбар адама нифрәтләрини неҹә ҝөстәрирләр?

▪ Нәјә ҝөрә нөкәрләрдән бири «јарамаз» адланыр вә онун минадан мәһрум олмасы нә демәкдир?