Фәсил 102
Мәсиһ тәнтәнә илә Јерусәлимә дахил олур
НИСАНЫН 9-у сәһәр вахты Иса Мәсиһ шаҝирдләри илә Бетанијадан чыхыб Јерусәлимә ҝедирләр. Онлар тезликлә Зејтун дағында јерләшән Бетфаҝијаја јахынлашырлар. Иса шаҝирдләриндән икисинә дејир:
«Гаршыдакы кәндә ҝедин. Кәндә ҝирәндә пајаја бағланмыш бир ешшәк вә јанында бир годуг ҝөрәҹәксиниз. Онлары ачыб јаныма ҝәтирин. Ишдир, кимсә сизә бир сөз десә, дејин ки, Ағаја лазымдыр. О да дәрһал һејванлары сизә верәҹәк».
Шаҝирдләр әввәлҹә баша дүшмүрләр ки, Исанын бу ҝөстәриши илә Мүгәддәс Китаб пејғәмбәрлији һәјата кечир (онлар буну бир гәдәр сонра анлајырлар). Зәкәријјә пејғәмбәр габагҹадан демишди ки, Аллаһын вәд едилмиш Падшаһы Јерусәлимә «ешшәјин баласы олан сыпаја миниб ҝәләҹәк». Мисал үчүн, Сүлејман падшаһ да мәсһ олунмаға ҝедәндә годуға минмишди.
Исанын шаҝирдләри Бетфаҝијаја ҝириб һејванлары ачанда орадакы адамлар дејирләр: «Һејваны нијә ачырсыныз?» Амма шаҝирдләр онларын Ағаја лазым олдуғуну дејәндә адамлар мане олмурлар. Шаҝирдләр үст палтарларыны чыхарыб ешшәјин вә годуғун белинә гојурлар. Иса годуға минир.
О, јолуна давам едир. Онунла ҝедән издиһам ҝет-ҝедә бөјүјүр. Адамларын әксәријјәти үст палтарларыны, бәзиләри исә ағаҹ будагларыны јола сәрирләр. Онлар уҹадан: «Јеһованын ады илә Падшаһ кими ҝәләнә ешг олсун!» вә «Ҝөјдә сүлһ вә јүксәкләрдә Јашајана ешг олсун!» — дејирләр.
Издиһамын арасында фәрисејләр дә вар. Онлар ҹамаатын бу һәмд сөзләринә гәзәбләниб Исаја шикајәтләнирләр: «Мүәллим, шаҝирдләрини сусдур». Лакин Иса онлара белә ҹаваб верир: «Буну билин ки, онлар сусса, дашлар дилә ҝәлиб гышгыраҹаг».
Иса Јерусәлимә јахынлашдыгда она бахыб ағлајыр вә дејир: «Каш сән сүлһә апаран јолу бу ҝүн дәрк едәјдин... Амма ҝөзләрин бағланыб». Јерусәлим инадла ҝөстәрдији итаәтсизлијин әвәзини өдәмәлидир. Бу һагда Иса пејғәмбәрлик едир:
«Дүшмәнләрин әтрафында уҹу шиш пајаларла истеһкам гураҹаг, сәни мүһасирәјә алыб һәр тәрәфдән сыхышдыраҹаг. Онлар сәни вә ушагларыны јерә чырпаҹаг, сәндә дашы даш үстә гојмајаҹаг». Исанын дедији пејғәмбәрлик 37 ил сонра, ерамызын 70-ҹи илиндә Рома гошунлары ҝенерал Титин рәһбәрлији алтында Јерусәлими дармадағын едән заман јеринә јетди.
Издиһамын арасындан чохлары ҹәми бир нечә һәфтә әввәл Исанын Лазары дирилтдијинин шаһиди олмушду. Онлар һәлә дә бу мөҹүзәни башгаларына данышырлар. Буна ҝөрә дә Иса Јерусәлимә дахил оланда бүтүн шәһәр әһалиси арасында ҹанланма јараныр. Онлар марагла сорушурлар: «Бу кимдир?» Издиһам: «Бу, Галилејанын Назарет шәһәриндән олан Иса пејғәмбәрдир!» — дејә ҹаваб верир. Бу һадисәләри мүшаһидә едән фәрисејләр јана-јана дејирләр: «Бүтүн дүнја онун ардынҹа ҝедир!»
Иса һәмишә Јерусәлимә ҝәләндә етдији кими, бу сәфәр дә тәлим вермәк үчүн мәбәдә ҝирир. Бурада кор вә ахсаг адамлар онун јанына ҝәлир вә Иса онлары сағалдыр. Бөјүк каһинләр вә мирзәләр Исанын етдији мөҹүзәләри ҝөрәндә вә мәбәддә: «Јалварырыг, Давуд Оғлуну хилас ет!» — дејән оғлан ушагларынын сәдасыны ешидәндә гәзәбләнирләр. Онлар наразылыгла Исаја дејирләр: «Бунларын нә дедијини ешидирсән?»
Иса ҹаваб верир: «Бәли, ешидирәм. Мәҝәр: “Сән көрпәләрин вә чағаларын дили илә һәмд сәсләндирдин”, — сөзләрини һеч вахт охумамысыныз?»
Иса тәлим вермәјә давам едир вә әтрафа ҝөз ҝәздирир. Ҝүн баша чатмаг үзрәдир. Иса он ики һәвариси илә орадан чыхыб Бетанијаја гајыдыр. Еһтимал ки, о, һәмин ҝеҹәни Лазарын евиндә кечирир. Матта 21:1—11, 14—17; Марк 11:1—11; Лука 19:29—44; Јәһја 12:12—19; Зәкәријјә 9:9.
▪ Иса бир падшаһ кими Јерусәлимә нә вахт вә неҹә ҝәлир?
▪ Издиһамын Исаны мәдһ етмәси һансы мәнаны кәсб едир?
▪ Иса Јерусәлимә баханда һансы һиссләри кечирир вә һансы пејғәмбәрлији сөјләјир?
▪ Иса мәбәдә ҝирәндә нәләр олур?