Фәсил 105

Һәлледиҹи ҝүнүн башланғыҹы

ИСА МӘСИҺ һәмин ҝүн ахшамүстү јенидән Бетанијаја гајыдыр. Јерусәлимдәки јекун хидмәтинин ики ҝүнү артыг архада галыб. Шүбһәсиз ки, Иса Бетанијада досту Лазарын евиндә галыр. Беләликлә, о, дөрдүнҹү ҝеҹәни дә Бетанијада кечирир.

Ертәси ҝүн, нисанын 11-и сәһәр тездән Иса шаҝирдләри илә јола чыхыр. Бу ҝүн Исанын хидмәтинин ән гызғын вә һәлледиҹи ҝүнү олаҹаг. Бу ҝүн о, сонунҹу дәфә мәбәдә ҝедәҹәк; һәбс олунуб едам едилмәздән габаг, сонунҹу дәфә адамлара тәблиғ едәҹәк.

Исаҝил Зејтун дағынын үстүндәки јолла Јерусәлимә ҝедирләр. Јолда Петер Исанын дүнән сәһәр ләнәтләдији әнҹир ағаҹыны ҝөстәриб һејрәтлә дејир: «Мүәллим, бир бах! Ләнәтләдијин әнҹир ағаҹы гурујуб!»

Ҝөрәсән, Иса бу ағаҹы нә үчүн гурутду? Бу суалын ҹавабы онун нөвбәти сөзләриндән мәлум олур: «Буну билин, әҝәр иманыныз варса вә шүбһә етмирсинизсә, сиз нәинки әнҹир ағаҹына етдијими едәҹәксиниз, һәтта бу даға [Зејтун дағына]: “Галх, дәнизә атыл”, — дејәҹәксиниз вә о атылаҹаг. Иманла дуа етсәниз, диләдијиниз һәр шеји алаҹагсыныз».

Әнҹир ағаҹыны гурутмагла Иса Аллаһа иман етмәјин ваҹиблијини шаҝирдләринә әјани шәкилдә ҝөстәрир. О дејир: «Дуа едиб хаһиш етдијиниз һәр шеји һөкмән алаҹағыныза инансаныз, алаҹагсыныз». Гаршыда дуран сынаглары нәзәрә алсаг, бу, шаҝирдләр үчүн чох мүһүм бир дәрсдир! Лакин ағаҹын гурумасы илә һәгиги иман арасында даһа бир әлагә вар.

Исраил халгы үздән бу әнҹир ағаҹы кими, алдадыҹы ҝөрүнүр. Аллаһла әһддә олан вә заһирән Онун әмрләринә риајәт едән бу халгын әслиндә иманы јохдур вә јахшы бәһрәләр ҝәтирмир. Иш о јерә чатыб ки, онлар һәтта Аллаһын Оғлуну рәдд едирләр! Буна ҝөрә дә Иса бәһрәсиз әнҹир ағаҹыны гурутмагла бу бәһрә ҝәтирмәјән вә имансыз халгын агибәтини әјани шәкилдә ҝөстәрир.

Бир аздан Исаҝил Јерусәлимә чатырлар вә адәти үзрә мәбәдә ҝедирләр. Орада Иса тәлим вермәјә башлајыр. Бөјүк каһинләр вә халгын ағсаггаллары, јәгин ки, Исанын дүнән сәррафлары мәбәддән говдуғуну нәзәрдә тутараг сорушурлар: «Де ҝөрәк бунлары нә һагла едирсән? Сәнә ким ихтијар вериб?»

Иса ҹаваб верир: «Мән дә сизә бир суал верәҹәјәм. Ҹаваб версәниз, онда бу ишләри һансы ихтијарла ҝөрдүјүмү сизә дејәҹәјәм. Дејин ҝөрүм, Јәһјаја вәфтиз етмә ихтијарыны Аллаһ вермишди, јохса инсанлар?»

Каһинләр вә ағсаггаллар өз араларында ҝөтүр-гој етмәјә башлајырлар: «Әҝәр десәк ки, “Аллаһ вериб”, о гајыдыб дејәҹәк: “Бәс нијә она инанмадыныз?” “Инсанлар вериб”, — дә дејә билмәрик, чүнки ҹамаатдан горхуруг, ахы халг Јәһјаны бир пејғәмбәр билир».

Рәһбәрләр Исаја ҹаваб вермәк үчүн сөз тапмырлар вә: «Билмирик», — дејирләр.

Иса да онлара белә дејир: «Онда мән дә бунлары нә ихтијарла етдијими сизә демәјәҹәјәм». Матта 21:19—27; Марк 11:19—33; Лука 20:1—8.

▪ Нисанын 11-и нә илә әламәтдардыр?

▪ Иса әнҹир ағаҹыны гурутмагла һансы дәрсләри верир?

▪ Иса ондан ҝөрдүјү ишләри һансы ихтијарла етдијини сорушанлара неҹә ҹаваб верир?