Фәсил 110

Мәбәддә сон хидмәт

ИСА МӘСИҺ сонунҹу дәфә мәбәддә тәлим верир. Гаршыдакы һадисәләри — үч ҝүндән сонракы һәбсини, мәһкәмәсини вә едамыны нәзәрә алмасаг, бу, онун ҹамаат гаршысында сон хидмәтидир. Бу хидмәти заманы о, мирзәләрлә фәрисејләри мүһакимә едир.

Иса даһа үч дәфә «вај сизин һалыныза, икиүзлү мирзәләр вә фәрисејләр!» ифадәсини тәкрар едир. Биринҹи «вај» она ҝөрәдир ки, онлар «ҹамын вә бошгабын чөлүнү тәмизләјир, амма онларын ичи гарәт вә тамаһла долудур». Буна ҝөрә дә Иса ҹидди мәсләһәт ҝөрүр: «Әввәлҹә ҹамын вә бошгабын ичини тәмизлә, онда онлар чөлдән дә тәмиз олаҹаглар».

Нөвбәти «вај» исә онларын дахилдән чүрүјүб корландыгларыны сахта мөминлик пәрдәси архасында ҝизләтмәјә чалышдыгларына ҝөрәдир. Иса дејир: «Сиз ағардылмыш гәбирләри хатырладырсыныз. Онлар заһирән јарашыглы ҝөрүнүр, амма ичәридән өлүләрин сүмүкләри вә һәр ҹүр натәмизликлә долудурлар».

Бүтүн бунлардан әлавә, мирзәләрлә фәрисејләрин икиүзлүлүјү башгаларынын диггәтини ҹәлб етмәк үчүн хејирхаһ ишләрә әл атмаларындан ҝөрүнүр. Онлар пејғәмбәрләр үчүн ҹанфәшанлыгла түрбәләр уҹалдыр вә онлары бәзәјирләр. Анҹаг Иса дејир ки, онлар «пејғәмбәрләри гәтлә јетирмиш адамларын өвладларыдыр»лар. Бәли, онларын икиүзлүлүјүнү үзә чыхармаға ҹүрәт едән адамын башы бәлададыр!

Иса онлары даһа кәскин шәкилдә мүһакимә едир: «Еј әфи иланлар, ҝүрзә балалары! Һинном дәрәсинә мәһкумијјәтдән ҹанынызы неҹә гуртараҹагсыныз?» Һинном дәрәси Јерусәлим шәһәринин зибилханасы иди. Белә демәклә, Иса фәрисејләрлә мирзәләрә писликләриндән әл чәкмәдикләри үчүн әбәдилик мәһв олаҹагларыны сөјләјир.

Инди Иса өз нүмајәндәләри барәдә дејир: «Онлардан бәзиләрини өлдүрәҹәк вә дирәјә мыхлајаҹагсыныз, бәзиләрини исә синагогларынызда гамчылајаҹаг вә бир шәһәрдән о бири шәһәрә говаҹагсыныз. Беләҹә, салеһ Һабилин ганындан тутмуш мәбәдлә гурбанҝаһын арасында өлдүрдүјүнүз Барахија оғлу Зәкәријјәнин ганына кими, јер үзүндә ахытдығыныз бүтүн салеһләрин ганы сизин бојнунуздадыр. Билин вә аҝаһ олун, бүтүн бу ҝүнаһлара ҝөрә бу нәсил ҹаваб верәҹәк».

Зәкәријјә Исраил рәһбәрләрини кәскин шәкилдә мүһакимә етдији үчүн «она гаршы гәсд һазырладылар вә ону падшаһын әмри илә Рәббин мәбәдинин һәјәтиндә дашгалаг етдиләр». Анҹаг Исанын сөјләдији кими, исраиллиләр бу салеһләрин ганынын әвәзини өдәјәҹәкдиләр. Исанын бу пејғәмбәрлији 37 ил сонра, ерамызын 70-ҹи илиндә јеринә јетди. О вахт Рома ордусу Јерусәлими ишғал етди вә бир милјондан артыг јәһуди мәһв олду.

Иса бу дәһшәтли һадисә барәдә дүшүнәрәк гүссәләнир вә үрәк јанғысы илә тәкрар едир: «Еһ, Јерусәлим, Јерусәлим!.. Тојуг ҹүҹәләрини ганадынын алтына топладығы кими, мән дә нечә дәфә сәнин өвладларыны бир јерә јығмаг истәдим. Һејф, сиз истәмәдиниз! Буна ҝөрә дә бу Ев тәрк едилиб сизә бош галаҹаг».

Сонра әлавә едир: «“Јеһованын ады илә ҝәләнә ешг олсун!” — дејәнә гәдәр бир даһа мәни ҝөрмәјәҹәксиниз». Бу, Мәсиһин Падшаһ кими иштиракы заманы олаҹаг вә инсанлар ону иман ҝөзү илә ҝөрәҹәкләр.

Иса кечиб әјләшир. Һәмин јердән мәбәддәки хәзинә габлары вә онлара пул атанлар јахшы ҝөрүнүр. Варлылар хәзинә габларына чохлу пул салырлар. Анҹаг бир дул гадын ҝәлиб дәјәри чох аз олан ики хырда пул салыр.

Иса шаҝирдләрини јанына чағырыб дејир: «Буну билин ки, бу касыб дул гадын хәзинә габларына пул атанларын һамысындан даһа чох атды». Јәгин, бу сөзләр шаҝирдләрин марағына сәбәб олур. Буна ҝөрә дә Иса изаһ едир: «Онларын һамысы вар-дөвләтләринин артығындан ианә вердиләр, бу гадын исә јохсул ола-ола, доланмаг үчүн нәји вардыса, һамысыны верди». Бу сөзләри дејәндән сонра Иса дуруб ҝедир. О, ахырынҹы дәфә мәбәдин гапыларындан чыхыр.

Шаҝирдләрдән бири мәбәдин әзәмәтинә вә ҝөзәллијинә һејранлыгла бахыб дејир: «Мүәллим, бир бу дашлара, бу биналара бах!» Дејиләнләрә ҝөрә, дашларын узунлуғу 11 метр, ени 5 метр, һүндүрлүјү исә 3 метр олуб.

Иса дејир: «Бүтүн бунлары ҝөрүрсүнүз? Буну билин ки, бурада даш даш үстә галмајаҹаг, һамысы дағылаҹаг».

Иса бундан сонра һәвариләри илә Кидрон вадисини кечиб Зејтун дағына галхыр. Бурадан мөһтәшәм мәбәд әл ичиндә олдуғу кими ҝөрүнүр. Матта 23:25—24:3; Марк 12:41—13:3; Лука 21:1—6; 2 Салнамәләр 24:20—22.

▪ Иса мәбәдә сон ҝәлиши заманы нә едир?

▪ Мирзәләрлә фәрисејләрин ријакарлығы неҹә ортаја чыхыр?

▪ «Һинном дәрәсинә мәһкумијјәт» нә демәкдир?

▪ Нәјә ҝөрә Иса дул гадынын варлылардан даһа чох ианә етдијини дејир?