Фәсил 112
Исанын сонунҹу Пасха бајрамы јахынлашыр
ҺАДИСӘЛӘРЛӘ ДОЛУ нисанын 11-и баша чатыр. Иса Зејтун дағында һәвариләринә тәлим вериб гуртарыр вә јәгин ки, онлар ҝеҹәләмәк үчүн Бетанијаја гајыдырлар. Јолда Иса һәвариләринә дејир: «Сиз билирсиниз ки, ики ҝүндән сонра Пасха бајрамыдыр, инсан Оғлу әлә верилиб дирәјин үзәриндә едам едиләҹәк».
Инди нисанын 12-дир. Иса билир ки, бу саат дин рәһбәрләри ону өлдүрмәк үчүн ахтарырлар, чүнки дүнән о, ҹамаатын гаршысында онлары ифша етмишди. Буна ҝөрә дә бүтүн ҝүнү һәвариләрлә олур вә ҹамаатын арасына чыхмыр. О истәмир ки, сабаһ ахшам һәвариләрлә бирҝә кечирәҹәји Пасха бајрамына кимсә мане олсун.
Бу арада бөјүк каһинләр вә халгын ағсаггаллары баш каһин Кајафанын һәјәтиндә топлашыблар. Онлар Исанын әлиндән јаныглыдырлар вә ону һијлә илә тутуб өлдүрмәк үчүн јол ахтарырлар. Бунунла белә, онлар Исаја рәғбәт бәсләјән халгдан горхурлар вә дејирләр: «Амма бајрамда олмасын, јохса халг ајаға галхар».
Һәмин вахт ораја бир адам ҝәлир. Онлар ҝөзләринә инанмырлар, чүнки бу ҝәлән Исанын һәвариси Јәһуда Искариотдур. Шејтан онун үрәјинә алчаг бир фикир, Ағасына хәјанәт етмәк фикрини гојуб. Јәһуда онлардан сорушур: «Ону сизә сатсам, мәнә нә верәрсиниз?» Бу, онлар үчүн лап ҝөјдән дүшмә олур! Онлар Јәһудаја отуз ҝүмүш (Мусанын Ганунуна ҝөрә бир гулун гијмәти) вермәјә бојун олурлар. Бу андан етибарән Јәһуда Исаны халгдан хәлвәт онларын әлинә вермәк үчүн фүрсәт ахтарыр.
Ҝүнәшин гүрубујла нисанын 13-ү башлајыр. Иса Јериходан нисанын 8-и башлајанда ҝәлиб. Демәли, бу онун Бетанијада галдығы алтынҹы вә сонунҹу ҝеҹәдир. Ҝүндүз Пасха бајрамына ахырынҹы һазырлыг ишләри ҝөрүләҹәк. Ахшам, ҝүн батандан сонра бајрам башлајаҹаг вә һәмин вахт бајрам гузусуну кәсиб бүтөвлүклә гызардаҹаглар. Бәс Иса вә һәвариләри бајрамы һарада кечирәҹәкләр вә бүтүн бунлары ким һазырлајаҹаг?
Иса бу барәдә һеч нә демәјиб. Бәлкә дә она ҝөрә демәјиб ки, Јәһуда Искариот бөјүк каһинләрә хәбәр верәр вә онлар бајрам вахты ҝәлиб ону јахалајарлар. Инди, нисанын 13-ү, һарадаса ҝүнортадан сонра Иса Петерлә Јәһјаны ҝөндәриб дејир:
— Ҝедин вә бизә пасха јемәји һазырлајын.
— Һарада һазырлајаг? — онлар сорушурлар.
— Шәһәрә ҝирәндә сахсы сәһәнҝдә су апаран бир адам ҝөрәҹәксиниз. Онун ҝирдији евә ҝедин вә ев саһибинә белә дејин: «Бизи Мүәллим ҝөндәриб. О билмәк истәјир ки, шаҝирдләри илә пасха јемәјини һансы гонаг отағында јејәҹәк». О адам сизә јухары мәртәбәдә һазырланмыш бөјүк бир отаг ҝөстәрәҹәк. Јемәји орада һазырлајын.
Шүбһәсиз, ев саһиби Исанын шаҝирдидир вә јәгин, о ҝөзләјир ки, Иса бајрамы онун евиндә кечирәҹәк. Петерлә Јәһја Јерусәлимә ҝәләндә һәр шеј Исанын дедији кими олур. Онлар икиси Пасха гузусуну вә 13 нәфәрлик (Иса вә 12 һәвари үчүн) бајрам тәдарүкүнү һазырлајырлар. Матта 26:1—5, 14—19; Марк 14:1, 2, 10—16; Лука 22:1—13; Чыхыш 21:32.
▪ Нисанын 12-и Иса нә едир вә нәјә ҝөрә?
▪ Баш каһинин евиндә һансы мәшвәрәт кечирилир? Јәһуда дин рәһбәрләринин јанына һансы мәгсәдлә ҝәлир?
▪ Нисанын 13-ү Иса Јерусәлимә кимләри ҝөндәрир вә нә үчүн?
▪ Бу һәвариләр орада нөвбәти дәфә Исанын харигүладә габилијјәтинин неҹә шаһиди олурлар?