Фәсил 123

«Будур о адам!»

ИСАНЫН тәмкини Пилата ҝүҹлү тәсир бағышлајыр, о баша дүшүр ки, Иса ҝүнаһсыздыр. Буна ҝөрә дә ону бурахмаг үчүн башга јол ахтарыр. Пилат ҹамаата мүраҹиәт едир: «Адәтиниз үзрә мән Пасха бајрамында сизин үчүн бир адам азад едирәм».

Бу заман Барабба адлы мәшһур бир гатил дә һәбсдәдир. Пилат ҹамаатдан сорушур: «Сизин үчүн кими азад едим: Бараббаны, јохса Мәсиһ адланан Исаны?»

Бөјүк каһинләр тәрәфиндән гызышдырылан адамлар истәјир ки, Барабба азадлыға бурахылсын, Иса исә едам едилсин. Анҹаг Пилат бир даһа онлардан сорушур:

— Бу ики нәфәрдән һансыны азад едим?

— Бараббаны, — онлар гышгырырлар.

— Бәс бу Мәсиһ адланан Иса илә нә едим? — Пилат һејфсиләнәрәк сорушур.

— Ону дирәјә мыхла!.. Ону дирәјә мыхла! Дирәјә мыхла! — ҹамаат бир ағыздан гулагбатырыҹы сәслә гышгырыр.

Пилат буну ешидәндә Исаны мүдафиә едир: «Ахы нијә? Бу адам нә пис иш ҝөрүб ки? Мән онда өлүмә лајиг бир шеј тапмадым. Ҹәзасыны вериб бурахаҹағам».

Дин хадимләринин гызышдырдығы ҹамаат Пилатын бүтүн ҹәһдләринә бахмајараг: «Ону дирәјә мыхла!» — гышгырмаға давам едир. Ағлыны итирмиш ҹамаат ган ҝөрмәк истәјир. Бир дүшүнүн: онларын арасында, ола билсин, ҹәми беш ҝүн әввәл Иса Јерусәлимә ҝирәркән ону падшаһ кими гаршылајанлар да вар! Бүтүн бу вахт әрзиндә һәвариләрин сәси-сәмири чыхмыр. Һәтта онлар ораја ҝәлибләрсә дә сакитҹә бир гырагда дурублар.

Пилат ҝөрүр ки, бу ишин ахыры јахшы гуртармајаҹаг, чүнки ҹамаат ҝет-ҝедә гызышыр. Онда о, су ҝөтүрүб һамынын ҝөзү гаршысында әлләрини јујур вә дејир: «Мән бу адамын ганындан тәмизәм. Өзүнүз биләрсиниз». Ҹамаат исә бир ағыздан: «Гој онун ганы бизим вә өвладларымызын бојнунда галсын», — дејир.

Беләликлә, Пилат бу ишин дүзҝүн олмадығыны билә-билә, ҹамааты разы салмаг хатиринә Бараббаны азадлыға бурахыр. Исаны исә сојундуруб гамчыламағы әмр едир. Бу ади гамчылама дејил. Бир тибб журналында дејилир:

«Адәтән бу аләт (флаҝрум, јахуд флаҝеллум) мүхтәлиф узунлугда бир нечә тәк вә ја һөрүлмүш гајышлардан ибарәт гыса гамчы иди. Гајышларын үзәринә мүәјјән мәсафәдә балаҹа дәмир күрәҹикләр вә ја уҹу ити гојун сүмүкләри бәркидилирди... Ромалы әсҝәрләр ҹәза верилән адамын күрәјинә вар-ҝүҹләри илә тәкрар-тәкрар вураркән дәмир күрәҹикләр онун бәдәнини дөјүб әзир, гајышларла гојун сүмүкләри исә дәрини вә дәриалты тохумалары дидирди. Гамчылама просесиндә күрәјин әти тәдриҹән скелет әзәләләринә гәдәр јыртылыр вә дидик-дидик олмуш әт ганајараг горхунҹ һала дүшүрдү» («The Journal of the American Medical Association»).

Иса бу ҹүр ишҝәнҹә илә дөјүләндән сонра Пилатын сарајына ҝәтирилир вә бүтүн алај ораја топлашыр. Бурада Исаны тәһгир етмәјә давам едирләр. Әсҝәрләр тикандан чәләнҝ һөрүб онун башына кечирирләр вә сағ әлинә гамыш чубуг вериб әјнинә падшаһлара мәхсус бәнөвшәји хәләт ҝејиндирирләр. Сонра да лағ-лаға илә: «Салам, еј јәһудиләрин Падшаһы!» — дејирләр. Һәмчинин она түпүрүб, үзүнә силлә вурурлар. Сонра гамыш чубуғу онун әлиндән алыб башына дөјәҹләјирләр. Ону дөјәҹләдикҹә дырнагарасы таҹын, јәни чәләнҝин тиканлары даһа да онун башына батыр.

Исанын бу бојда әзијјәтә ләјагәтлә таб ҝәтирмәси Пилата чох ҝүҹлү тәсир едир, бу сәбәбдән о, Исаны бурахмаг үчүн бир даһа ҹәһд ҝөстәрир. Пилат ҹамаата мүраҹиәт едир: «Бура бахын! Бу адамы јаныныза ҝәтирирәм. Билин, мән онда тәгсир ҝөрмүрәм». О үмид едир ки, ҹамаат Исаны бу һалда ҝөрүб она рәһм едәҹәк. Башында тиканлы чәләнҝ, әјниндә бәнөвшәји либас вә ган сызан сифәтиндә ағры һәкк олунмуш Иса бу дашүрәкли, рәһмсиз күтләнин гаршысына чыханда Пилат бәјан едир: «Будур о адам!»

Будур бәшәрин ән даһи шәхсијјәти! Ағыр ишҝәнҹәләрә синә ҝәрмиш Иса онларын габағында вүгарла дуруб. Исанын сакит вә вүгарлы дурушу һәтта Пилаты да онун әзәмәтини гәбул етмәјә мәҹбур едир. Бу, Пилатын һөрмәт, ејни заманда мәрһәмәт долу сөзләриндән бәлли олур. Јәһја 18:39—19:5; Матта 27:15—17, 20—30; Марк 15:6—19; Лука 23:18—25.

▪ Пилат Исаны һансы јолла азад етмәјә чалышыр?

▪ Пилат мәсулијјәти бојнундан атмаг үчүн нә едир?

▪ Гәдимдә гамчыланма ҹәзасы нә демәк иди?

▪ Гамчыландыгдан сонра Исаны неҹә әлә салырлар?

▪ Пилат Исаны азад етмәк үчүн даһа нә едир?