Фәсил 125

Ишҝәнҹә дирәји үзәриндә

ИСА МӘСИҺЛӘ бирликдә ики ҹинајәткары да едама апарырлар. Издиһам шәһәрин јахынлығында Голгота, јәни Кәллә адланан јердә дајаныр.

Мәһбуслары сојундурурлар. Сонра онлара ичинә мүрр гатылмыш шәраб верирләр. Ҝөрүнүр, бу шәрабы Јерусәлим гадынлары һазырлајыблар; Рома әсҝәрләри едамдан габаг бу биһушедиҹи ичкини мәһкум едилмиш адамлара вермәји гадаған етмирләр. Иса шәрабын дадына бахыр, лакин ичмир. Нијә? Ајдындыр ки, сынагларынын сон пилләсиндә о, әглән вә ҹисмән ајыг галмаг истәјир.

Исаны дирәјин үстүндә узадыб әлләрини башынын үзәринә галдырырлар. Әсҝәрләр ону әлләриндән вә ајагларындан мыхлајырлар. Мыхлар әти дәлиб кечәндә Иса ағрыдан гыврылыр. Дирәји јухары галдыранда мыхларын ачдығы јаралар бәдәнин ағырлығы алтында јыртылыр вә ағры лап дөзүлмәз олур. Амма Иса әсҝәрләри һәдәләмәк әвәзинә онлар үчүн дуа едир: «Ата, онлары бағышла, чүнки нә етдикләрини билмирләр».

Пилат Исанын башы үстүндән үзәриндә «Јәһудиләрин падшаһы назаретли Иса» сөзләри јазылмыш бир лөвһәҹик вурдурмушду. Ҝөрүнүр, о, буну тәкҹә Исаја һөрмәт бәсләдијиндән јох, һәм дә ону Исаја өлүм һөкмү чыхармаға вадар етмиш јәһуди каһинләринә нифрәт етдијиндән белә јазыб. Һәр кәсин охуја билмәси үчүн Пилат јазыны јәһуди, рәсми латын вә үмумхалг јунан дилиндә јаздырыб.

Бөјүк каһинләр, о ҹүмләдән Кајафа вә Һанна тәшвишә дүшүрләр. Бу јазы онларын гәләбәси үзәринә көлҝә салыр. Онлар етираз едирләр: «“Јәһудиләрин падшаһы” јох, өзүнүн дедији кими: “Мән јәһудиләрин падшаһыјам” јаз». Каһинләрин әлиндә ојунҹаға чеврилдији үчүн тәнҝә ҝәлмиш Пилат сәрт ҹаваб верир: «Нә јазмышам, одур!»

Каһинләр чохлу адамла едам јеринә топлашараг лөвһәҹикдә јазыланлары јалана чыхармаг истәјирләр. Онлар Синедриондакы мәһкәмә заманы верилмиш јалан шәһадәти тәкрар едирләр. Буна ҝөрә јолдан кечәнләр дә Исаны сөјүр вә башларыны јырғалаја-јырғалаја дејирләр: «Мәбәди дағыдыб үч ҝүнә тикәнә бах! Өзүнү нијә хилас етмирсән? Әҝәр Аллаһын оғлусанса, ишҝәнҹә дирәјиндән дүш!»

Бөјүк каһинләр вә онларын јолдашлары бу мәсхәрәјә гошулуб дејирләр: «Башгаларыны хилас едирди, өзүнү исә хилас едә билмир! Әҝәр о, Исраилин Падшаһыдырса, гој ишҝәнҹә дирәјиндән дүшсүн, онда биз она инанарыг! Бәс нә олду, Аллаһа ҝүвәнирди?! “Мән Аллаһын Оғлујам”, — дејирди. Әҝәр о, Аллаһа лазымдырса, гој Аллаһ ону хилас етсин дә!»

Бу руһ әсҝәрләрә дә сирајәт едир, онлар да Исаны араја гојурлар. Әсҝәрләр Исаны әлә салараг она турш шәраб верирләр, ҝөрүнүр, шәрабы онун сусузлугдан гурумуш додагларына јахынлашдырырлар. Онлар лағ едирләр: «Әҝәр сән јәһудиләрин падшаһысанса, өзүнү хилас ет!» Иш о јерә чатыр ки, онун сағ вә сол тәрәфиндә дирәјә мыхланмыш ҹинајәткарлар да ону тәһгир едирләр. Һәр шејин јарадылмасында Јеһова Аллаһа көмәк етмиш бу гејри-ади инсан бу гәдәр тәһгирләрә мәруз галыр. Амма о, мәрд-мәрданә дөзүр!

Әсҝәрләр Исанын әбасыны ҝөтүрүб дөрд јерә бөлүрләр. Сонра пүшк атыб өз араларында бөлүшдүрүрләр. Анҹаг көјнәји тикишсиз, јухарыдан-ашағыја бүтөв тохума иди. Она ҝөрә дә бир-бириләринә дејирләр: «Ҝәлин буну ҹырмајаг, пүшк атаг ҝөрәк кимә дүшәҹәк». Беләҹә, өзләри дә билмәдән Мүгәддәс Јазыларын: «Палтарымы араларында бөлүшдүрдүләр, ҝејимим үчүн пүшк атдылар», — сөзләрини јеринә јетирирләр.

Бир гәдәр кечир. Ҹинајәткарлардан бири баша дүшүр ки, Иса, доғрудан да, падшаһ олмалы иди. Буна ҝөрә дә о, өз јолдашына дејир: «Сән һеч Аллаһдан горхмурсан? Ахы өзүн дә ејни ҹәзаны чәкирсән. Бизә әмәлләримизә ҝөрә ҹәза верибләр, дүз дә едибләр, бу адам исә һеч бир пис иш ҝөрмәјиб». Сонра үзүнү Исаја тутуб хаһиш едир: «Иса, падшаһлығына ҝәләндә мәни јадына сал».

Иса ҹаваб верир: «Буну бил: сән мәнимлә Ҹәннәтдә олаҹагсан!» Иса ҝөјләрдә падшаһ олараг һакимијјәт сүрәркән бу вәд јер үзүндә ҝерчәкләшәҹәк. О заман Иса төвбә етмиш бу ҹинајәткары Һар-Маҝедонда сағ галмыш инсанларын вә башга дирилмиш инсанларын јашајаҹағы јерүзү Ҹәннәтдә дирилдәҹәк! Матта 27:33—44; Марк 15:22—32; Лука 23:27, 32—43; Јәһја 19:17—24.

▪ Иса мүрр гатылмыш шәрабы нә үчүн ичмир?

▪ Исанын едам едилдији дирәјин үзәринә нә үчүн јазылы лөвһәҹик вурулуб? Бунун үстүндә Пилатла бөјүк каһинләр бир-бириләринә нә дејирләр?

▪ Иса дирәк үзәриндә икән һансы тәһгирләрә мәруз галыр?

▪ Исанын палтарлары илә нә едирләр вә бунунла һансы пејғәмбәрлик јеринә јетир?

▪ Ҹинајәткарлардан бири нәји баша дүшүр? Иса онун хаһишини неҹә јеринә јетирәҹәк?