Фәсил 128

Иса сағдыр!

ГАДЫНЛАР сәрдабәни бош ҝөрәндә Мәҹдәлли Мәрјәм Петерлә Јәһјаја хәбәр вермәк үчүн гачыр. Ҝөрүнүр, о бири гадынлар сәрдабәнин јанында галырлар. Аз сонра бир мәләк пејда олур вә онлары ичәри чағырыр.

Бурада гадынлар башга бир мәләји ҝөрүрләр. Мәләкләрдән бири онлара дејир: «Горхмајын! Мән билирәм ки, сиз едам едилмиш Исаны ахтарырсыныз. Иса бурада јохдур. О, өзүнүн дедији кими дирилиб. Ҝәлин, онун гојулдуғу јерә бахын. Сонра исә тез ҝедин, шаҝирдләрә онун дирилдијини сөјләјин». Буну ешидән кими гадынлар горху вә бөјүк севинҹ ичиндә гачырлар.

Бу арада Мәҹдәлли Мәрјәм Петерлә Јәһјаны тапыб дејир: «Ағаны сәрдабәдән ҝөтүрүбләр вә билмирик апарыб һара гојублар». Буну ешитҹәк һәвариләрин икиси дә гачыр. Ҝөрүнүр, Јәһја нисбәтән ҹаван олдуғундан тез гачыр вә сәрдабәјә биринҹи чатыр. Гадынлар артыг ҝедибләр, јан-јөрәдә һеч кәс јохдур. Јәһја ичәри бојланыр вә орада кәфәни ҝөрүр, амма ичәри ҝирмир.

Петер дә ҝәлиб чатыр вә тәрәддүд етмәдән дәрһал ичәри ҝирир. О, јердәки кәфәни вә Исанын башыны өртмүш јајлығы ҝөрүр. Јајлыг бир кәнарда бүрмәләниб галмышды. Јәһја да ичәри ҝирир вә Мәрјәмин сөзләринин доғрулуғуна әмин олур. Амма нә Петер, нә дә Јәһја баша дүшмүр ки, Иса дирилиб. Һәрчәнд Иса дириләҹәјини дәфәләрлә онлара демишди. Бу һәвариләр чашбаш һалда евә гајыдырлар. Тәкрар сәрдабәјә ҝәлмиш Мәҹдәлли Мәрјәм исә орада галыр.

Бу арада о бири гадынлар мәләкләрин тапшырдығы кими, Исанын дирилдијини шаҝирдләрә данышмаға тәләсирләр. Јолда Иса гаршыларына чыхыб онлары саламлајыр. Гадынлар онун ајагларына јыхылыб тәзим едирләр. Иса онлара дејир: «Горхмајын, ҝедин гардашларыма дејин ки, Галилејаја ҝетсинләр. Орада мәни ҝөрәҹәкләр».

Бундан әввәл зәлзәлә башлајанда вә мәләкләр ҝөрүнәндә сәрдабәни горујан кешикчиләрин горхудан аз гала бағры чатламышды. Онлар өзләринә ҝәләндә шәһәрә ҝедиб нә баш вердијини бөјүк каһинләрә данышырлар. Бөјүк каһинләр буну өрт-басдыр етмәк үчүн јәһуди ағсаггаллары илә мәсләһәтләшиб әсҝәрләрә рүшвәт вермәк гәрарына ҝәлирләр. Сонра әсҝәрләрә тапшырырлар: «Белә дејәрсиниз: “Ҝеҹә биз јатанда онун шаҝирдләри ҝәлиб ҹәсәди оғурладылар”».

Рома әсҝәри нөвбә башында јатардыса, ону едам едә биләрдиләр. Буна ҝөрә дә каһинләр онлара сөз верирләр: «Архајын олун, әҝәр бу [сизин јатмағыныз], валинин гулағына чатса, биз ону јола верәрик, сизә һеч нә олмаз». Рүшвәтин мәбләғи бөјүк олдуғундан әсҝәрләр һәр шеји онларын дедији кими едирләр. Бунун нәтиҹәсиндә јәһудиләр арасында шајиә јајылыр ки, Исанын ҹәсәдини оғурлајыблар.

Сәрдабәнин јанында галан Мәҹдәлли Мәрјәм гәм-гүссә ичиндәдир. Ҝөрәсән, Иса һарада ола биләр? О, әјилиб сәрдабәнин ичинә бојлананда ҝөрүр ки, ағ либаслы ики мәләк јенидән пејда олуб. Мәләкләрдән бири Исанын ҹәсәди гојулдуғу јерин баш тәрәфиндә, о бириси ајаг тәрәфиндә отуруб. Онлар сорушурлар: «Нијә ағлајырсан?»

Мәрјәм ҹаваб верир: «Ағамы апарыблар вә билмирәм һара гојублар». О, ҝеријә чевриләндә бир адам ҝөрүр. Һәмин адам ондан сорушур: «Баҹым, нијә ағлајырсан? Кими ахтарырсан?»

Мәрјәм елә билир ки, бу адам бағбандыр вә ондан сорушур: «Аға, әҝәр ону сән апармысанса, де һара гојмусан, мән ҝедим ону ҝөтүрүм».

«Мәрјәм!» — дејә бу адам мүраҹиәт едир. Мәрјәм бу сәмими мүраҹиәтдән һәмин адамын Иса олдуғуну баша дүшүр. «Раббуни!» — дејә о чығырыр («Раббуни» мүәллим демәкдир) вә һәдсиз севиндијиндән ондан бәрк-бәрк тутур. Лакин Иса ону сахлајыр: «Тутма мәни. Мән ки һәлә Атамын јанына галхмырам. Гардашларымын јанына ҝет вә онлара де: “Мән өз Атамын вә сизин Атанызын, өз Аллаһымын вә сизин Аллаһынызын јанына ҝедирәм”».

Мәрјәм һәвариләрлә диҝәр шаҝирдләрин топлашдыглары јерә гачыр. О, башына ҝәләнләри данышараг диҝәр гадынларын Исанын дирилмәси илә бағлы сөјләдикләринә әлавә едир. Амма, ҝөрүнүр, бу кишиләр әввәл ҝәлмиш гадынлара инанмадыглары кими, Мәрјәмә дә инанмырлар. Матта 28:3—15; Марк 16:5—8; Лука 24:4—12; Јәһја 20:2—18.

▪ Мәҹдәлли Мәрјәм сәрдабәни бош ҝөрәндә нә едир? О бири гадынларла нә баш верир?

▪ Сәрдабәнин бош олдуғуну ҝөрәндә Петерлә Јәһја нә едир?

▪ О бири гадынлар Исанын дирилмәси хәбәрини шаҝирдләрә данышмаг үчүн ҝедәндә кимә раст ҝәлирләр?

▪ Әсҝәрләрлә нә баш вериб вә каһинләр буну ешидәндә нә едирләр?

▪ Мәҹдәлли Мәрјәм сәрдабәнин јанында тәк галанда нә баш верир? Шаҝирдләр гадынларын ҝәтирдији хәбәрләрә неҹә јанашырлар?