Фәсил 129

Иса шаҝирдләрә ҝөрүнүр

ШАҜИРДЛӘР һәлә дә үзүнтү ичиндәдирләр. Онлар сәрдабәнин нәјә ҝөрә бош галдығыны баша дүшмәмиш вә гадынларын ҝәтирдикләри хәбәрә инанмамышдылар. Һәфтәнин илк ҝүнү Клеопа вә башга бир шаҝирд Јерусәлимдән тәгрибән 11 километр узаглыгда јерләшән Еммаус кәндинә јола дүшүрләр.

Онлар ҝедә-ҝедә баш верәнләр барәдә араларында сөһбәт едирләр. Јолда танымадыглары бир адам онлара гошулур вә сорушур: «Нә барәдә данышырсыныз?»

Шаҝирдләр дајанырлар. Онларын бәнизи кәдәрлидир. Клеопа дејир: «Сән, дејәсән, гәрибсән вә Јерусәлимдә тәк-тәнһа галырсан. Мәҝәр бу ҝүнләрдә шәһәрдә баш вермиш һадисәләрдән хәбәрин јохдур?» Һәмин адам сорушур: «Һансы һадисәләрдән?»

Онлар ҹаваб верирләр: «Назаретли Иса илә бағлы һадисәләри дејирик... Бизим бөјүк каһинләр вә рәһбәрләр исә она өлүм һөкмү кәсиб дирәјә мыхладылар. Еһ, биз исә үмид едирдик ки, о, Исраили азад едәҹәк».

Клеопа вә онун јол јолдашы ҝүнүн әламәтдар һадисәләри — мәләкләрин пејда олмасы, сәрдабәнин бош галмасы барәдә данышыр вә бу хәбәрләрин онлары чашбаш салдығыны етираф едирләр. Бу адам исә онлары мәзәммәт едир: «Еј ағылсызлар вә пејғәмбәрләрин дедикләринә инанмајан үрәји һиссијјатсызлар! Мәҝәр Мәсиһ бу әзаблара гатлашмалы вә сонра шөһрәтә јетишмәли дејилди?» Сонра Мүгәддәс Јазыларда Мәсиһлә бағлы дејиләнләри онлара изаһ едир.

Нәһајәт, онлар кәндә чатырлар. Амма бу гәриб өзүнү елә апарыр ки, ҝуја јолуна давам едир. Шаҝирдләр ондан даһа чох шеј ешитмәк арзусу илә тәкид едирләр: «Артыг ахшам дүшүр, гаш гаралыр. Бизимлә гал». О, онларла шам јемәјинә галыр. О дуа едир вә чөрәји бөлүб онлара верир. Шаҝирдләр бундан баша дүшүрләр ки, бу адам Исадыр. Һәмин андаҹа Иса гејб олур.

Инди онлар гәриб адамын бу гәдәр шеји һарадан билдијини јахшы анлајырлар. Онлар дејирләр: «Мәҝәр о, јолда бизимлә данышанда, Мүгәддәс Јазылары бизә изаһ едәндә үрәјимиз алышыб јанмырды?» Онлар вахт итирмәдән галхыб Јерусәлимә јола дүшүрләр. Орада һәвариләри вә онларла бирликдә олан башга адамлары ҝөрүрләр. Клеопа илә јолдашы ағызларыны ачмамыш онлар севинҹәк дејирләр: «Аға, доғрудан да, дирилиб вә Шимона ҝөрүнүб!» Сонра Клеопаҝил дә Исанын онлара ҝөрүндүјүнү данышырлар. Беләликлә, һәмин ҝүн Иса ајры-ајрылыгда шаҝирдләринә дөрд дәфә ҝөрүнүр.

Бу ан ҝөзләнилмәдән Иса бешинҹи дәфә пејда олур. Шаҝирдләр јәһудиләрдән горхдуглары үчүн гапыны ичәридән гыфылламышдылар. Буна бахмајараг, Иса отағын ортасында дуруб онлара дејир: «Саламәлејкүм». Онлар кабус ҝөрдүкләрини саныб дәһшәтә дүшүрләр. Амма Иса онлара дејир: «Нијә горхурсунуз вә нә үчүн үрәјиниздә шүбһә ојаныр? Әлләримә вә ајагларыма бахын, бу мәнәм. Мәнә тохунун вә бахын, ахы руһун әти вә сүмүјү олмур, мәндә исә вар». Шаҝирдләр исә һәлә дә инанмырлар.

Иса өзүнү танытмаг үчүн шаҝирдләрдән сорушур: «Јемәјә бир шејиниз вар?» Гызардылмыш балыгдан бир аз једикдән сонра о дејир: «Һәлә сизинлә оланда [өлүмүмдән әввәл] сизә мәһз бу һагда данышмышдым ки, Мусанын ганунунда, Пејғәмбәрләрин китабларында вә Мәзмурларда мәним һаггымда јазыланлар јеринә јетмәлидир».

Иса онларла бир нөв Мүгәддәс Китабы арашдырыр: «Мүгәддәс Јазылар дејир ки, Мәсиһ әзаб чәкәҹәк, өлүб үчүнҹү ҝүн дириләҹәк, Јерусәлимдән башлајараг бүтүн милләтләрә онун ады илә ҝүнаһларын бағышланмасы үчүн төвбә хәбәри тәблиғ олунаҹаг. Сиз бунларын шаһиди олаҹагсыныз».

Томас нәдәнсә бу ваҹиб ҝөрүшдә (һәфтәнин илк ҝүнү ахшамүстү) иштирак етмәмишди. Бу сәбәбдән шаҝирдләр сонракы ҝүнләр әрзиндә севинә-севинә она дејирләр: «Биз Ағаны ҝөрдүк!»

Томас исә дејир: «Әҝәр онун әлләриндә мых изләрини ҝөрмәсәм, бу јаралара бармағымла тохунмасам, әлими онун бөјрүнә гојмасам, өмрүмдә инанмарам».

Бу һадисәдән сәккиз ҝүн сонра шаҝирдләр јенидән бир јерә топлашырлар. Томас да онларладыр. Гапылар гыфыллы олса да, Иса јенә дә отағын ортасында пејда олуб дејир: «Саламәлејкүм!» Сонра Томаса мүраҹиәт едир: «Бармағыны бура гој вә әлләримә бах. Әлини узат, бөјрүмә гој вә даһа шүбһә етмә, инамлы ол!»

Томас нида едир: «Ағам, аллаһым!»

Иса сорушур: «Мәни ҝөрдүјүн үчүн инандын?» Сонра әлавә едир: «Ҝөрмәјиб иман едәнләр нә хошбәхтдирләр!» Лука 24:11, 13—48; Јәһја 20:19—29.

▪ Исанын ики шаҝирди Еммауса ҝедәркән бир гәриб онлардан нә сорушур?

▪ Гәриб адамын һансы сөзләриндән шаҝирдләрин үрәји алышыб јаныр?

▪ Шаҝирдләр гәриб адамын ким олдуғуну нәдән билирләр?

▪ Клеопа илә јолдашы Јерусәлимә гајыданда һансы шад хәбәри ешидирләр?

▪ Иса бешинҹи дәфә шаҝирдләринә һарада ҝөрүнүр вә о, нә едир?

▪ Бундан сәккиз ҝүн сонра нә олур? Томас Исанын сағ олдуғуна неҹә әмин олур?