Фәсил 133
Иса Мәсиһ Аллаһын нијјәтини һәјата кечирир
ДҮНЈА севинҹә гәрг олуб! Ҹәнҝавәр-Падшаһ Иса Мәсиһ Шејтаны вә онун һагсыз дүнјасыны јох едир! Иса Мәсиһин әмин-аманлыг долу Миниллик Падшаһлығы башланыр!
Һар-Маҝедондан сағ чыханлар Иса Мәсиһ вә онунла падшаһлыг едәнләрин рәһбәрлији алтында бу әдаләтли мүһарибәдән галмыш дағынтылары тәмизләјәҹәкләр. Еһтимал ки, Һар-Маҝедондан сағ чыханлар бир мүддәт дүнјаја өвлад ҝәтирәҹәкләр вә бу ушаглар валидејнләри илә бирликдә јер үзүнү ҝөзәл Ҹәннәт бағына чевирәҹәкләр. Бу иш онлара һәзз верәҹәк.
Тәдриҹән Иса милјонларла инсаны дирилдәҹәк вә онлар да бу ҝөзәл Ҹәннәтдә фираван һәјат сүрәҹәкләр. Иса о заман: «Елә бир саат ҝәлир ки, гәбирләрдә оланларын һамысы... дириләҹәк», — вәдини јеринә јетирәҹәк.
Дириләнләр арасында Иса илә бирҝә ишҝәнҹә дирәјиндә едам олунмуш ҹинајәткар да олаҹаг. Јәгин, хатырлајырсыныз ки, Иса она сөз вермишди: «Буну бил: сән мәнимлә Ҹәннәтдә олаҹагсан!» Амма нә һәмин адам ҝөјдә Иса илә падшаһлыг сүрәҹәк, нә дә Иса јенидән инсан кими јер үзүнә ҝәлиб онунла бирликдә Ҹәннәтдә јашајаҹаг. Иса бу кечмиш ҹинајәткарла о мәнада бир јердә олаҹаг ки, ону јер үзүндә јашамаг үчүн дирилдәҹәк вә нөвбәти сәһифәдә тәсвир едилдији кими онун һәм физики, һәм дә руһани фираванлығынын гајғысына галаҹаг.
Бир тәсәввүр един: Һар-Маҝедонда сағ галмыш адамлар, онларын ушаглары вә Исанын дирилтдији милјардларла итаәткар инсанлардан ибарәт бәшәр аиләси онун гајғысы сајәсиндә тәдриҹән камиллијә јетишәҹәк! Јеһова Аллаһ падшаһлыг едән Иса Мәсиһ васитәсилә руһани мәнада инсанларла олаҹаг. Һәвари Јәһја ҝөјдән ҝәлән сәсин бу сөзләрини ешидир: «Аллаһ инсанларын ҝөзләриндән бүтүн јашлары силәҹәк. Артыг нә өлүм, нә дәрд, нә фәрјад, нә дә ағры олаҹаг». Бәли, јер үзүнүн һеч бир сакини нә ағры-аҹы, нә дә хәстәлик ҝөрәҹәк.
Иса Мәсиһин Миниллик һакимијјәтинин сонунда һәр шеј Аллаһын әзәлдән нијјәт етдији кими олаҹаг. Аллаһ Адәмлә Һәвваја төрәјиб чохалмаг вә бүтүн јер үзүнү долдурмаг тапшырығы вермишди. Бүтүн јер үзү камил вә салеһ адамларла долаҹаг. Исанын фидјә гурбанлығы һәр бир адама фајда ҝәтирәҹәк. Адәмин ҝүнаһындан төрәнән өлүм артыг олмајаҹаг!
Беләҹә, Иса Аллаһын нијјәтини бүтөвлүклә јеринә јетирәҹәк. Буна ҝөрә дә мин ил тамам оланда Иса Падшаһлығы вә камиллијә јетишмиш бәшәр аиләсини Атасына тәһвил верәҹәк. О вахт Аллаһ Шејтаны вә онун ҹинләрини үммандан азад едәҹәк. Һансы мәгсәдлә?
Миниллијин сонунда Ҹәннәтдә јашајанларын әксәријјәтини дирилмиш адамлар тәшкил едәҹәк. Һәмин адамлар өләндә Аллаһын вәдләриндән хәбәрләри јох иди вә онлар бу вәдләрә иман етдикләрини ҝөстәрә билмәјибләр. Бу сәбәбдән онларын иманы һеч вахт сынанмајыб. Дириләндән вә Мүгәддәс Китаб һәгигәтләрини өјрәнәндән сонра Ҹәннәтдә һеч бир чәтинлијә раст ҝәлмәдикләри үчүн асанлыгла Аллаһа хидмәт едибләр. Бәс Шејтана онлары Аллаһа хидмәтдән јајындырмаг үчүн фүрсәт верилсә, онлар садиг галаҹаглар? Бу мәсәләни һәлл етмәк үчүн Шејтан азад едиләҹәк.
Һәвари Јәһјаја верилмиш вәһј ҝөстәрир ки, Исанын Миниллик һакимијјәти баша чатандан сонра Шејтан гејри-мүәјјән сајда инсанлары Аллаһа хидмәтдән чәкиндирә биләҹәк. Лакин ахырынҹы сынаг гуртарандан сонра Шејтан, онун ҹинләри вә өз тәрәфинә чәкә билдији адамлар бирдәфәлик мәһв едиләҹәкләр. Сынагдан алныачыг чыхан Аллаһа садиг инсанлар исә Јараданларындан хејир-дуа алараг әбәди јашајаҹаглар.
Һеч шүбһәсиз, Аллаһын мөһтәшәм нијјәтиндә Иса Мәсиһин бундан сонра да ваҹиб ролу олаҹаг. Аллаһын тәјин етдији әзәмәтли Падшаһ Исанын һакимијјәти алтында бизи ҝөзәл бир ҝәләҹәк ҝөзләјир. Лакин онун јердә инсан оларкән етдикләрини дә һеч вахт унутмамалыјыг.
Иса өз хошу илә јер үзүнә ҝәлиб инсанлара Улу Јарадан һаггында данышырды. Бундан әлавә, о, Аллаһын еҹазкар кејфијјәтләрини нүмајиш етдирирди. Иса шүҹаәтли рәһбәр вә устад мүәллим иди. Онун ҹәсарәти, мәрдлији, мисилсиз һикмәти вә бол мәрһәмәти үрәјимизи риггәтә ҝәтирир. Әбәди јашамағымыз үчүн јеҝанә гуртулуш јолу олан фидјә гурбанлығыны верәркән Исанын нә гәдәр зүлмә, ишҝәнҹәјә гатлашдығыны дүшүнәндә, шүбһәсиз ки, гәлбимиз она гаршы миннәтдарлыгла долуб-дашыр!
Исанын һәјаты барәдә өјрәндикҹә ҝөзүмүзүн өнүндә, доғрудан да, гејри-ади бир инсан ҹанланыр. О, бүтүн әзәмәти илә гаршымызда дурур вә биз дә Рома валиси Понти Пилат кими бәјан етмәк истәјирик: «Будур о адам!» Бәли, о адам тарихдә ән даһи инсандыр!
Исанын вердији фидјә гурбанлығыны гәбул етдијимиз тәгдирдә, Адәмдән мирас алдығымыз ҝүнаһ вә өлүмүн пәнҹәсиндән гуртулаҹағыг вә Иса бизә әбәди һәјат верәҹәк. Ким әбәди јашамаг истәјирсә, һәм Аллаһ, һәм дә Онун Оғлу Иса Мәсиһ һаггында өјрәнмәлидир. Арзу едирик ки, бу китаб әбәди һәјата апаран билији газанмагда сизә көмәк етсин! 1 Јәһја 2:17; 1:7; Јәһја 5:28, 29; 3:16; 17:3; 19:5; Лука 23:43; Јарадылыш 1:28; 1 Коринфлиләрә 15:24—28; Вәһј 20:1—3, 6—10; 21:3, 4; Јешаја 9:6.
▪ Һар-Маҝедондан сағ чыханлар вә онларын ушаглары һансы ҝөзәл ишлә мәшғул олаҹаглар?
▪ Ҹәннәтдә онлардан башга даһа кимләр јашајаҹаг вә Иса һансы мәнада онларла олаҹаг?
▪ Миниллијин сонунда јер үзүндә вәзијјәт неҹә олаҹаг вә онда Иса нә едәҹәк?
▪ Шејтан үммандан нә үчүн азад едиләҹәк? Ону вә онун ардынҹа ҝедәнләри ахырда нә ҝөзләјир?
▪ Иса Мәсиһ бизә неҹә әбәди һәјат верә биләҹәк?