Һиссә 4
Аллаһ бизә Өз нијјәтләри һаггында мә’лумат верир
1, 2. Биз һарадан билирик ки, Аллаһ сәмими инсанларын суалларына ҹаваб верир?
СЕВӘН Аллаһ Өз нијјәтләрини Ону ахтаран сәмими гәлбли инсанлара һәгигәтән дә ашкар едир. О, һәр шеји билмәк истәјән инсанларын, “Аллаһ изтираблара нә үчүн јол верир?” кими суалларына ҹаваб верир.
2 Мүгәддәс Китаб дејир: “Әҝәр ону [Аллаһы] арасан, сәнә өзүнү тапдырар”. “Ҝөјләрдә сирләри ачан бир Аллаһ вардыр”. “Рәбб Јеһова пејғәмбәр гулларына сиррини ачмајынҹа бир шеј етмәз” (1 Тарихләр 28:9; Даниел 2:28; Амос 3:7).
Ҹаваблары һарадан тапмаг олар?
3. “Аллаһ изтираблара нә үчүн јол верир” суалына ҹавабы һарадан тапа биләрик?
3 “Аллаһ изтираблара нә үчүн јол верир?” вә “О, бу изтираблары арадан галдырмаг үчүн нә етмәк нијјәтиндәдир?” суалларына ҹаваб, Онун мүгәддәс руһунун рәһбәрлији алтында бизим хејримиз үчүн јазылмыш бир сәнәддә јерләшир. Бу сәнәд, Онун Кәламы олан Мүгәддәс Китабдыр. “Һәр Мүгәддәс Јазы Аллаһдан илһам алмыш вә тә’лим, тәкзиб, ислаһ, салеһлик тәрбијәси үчүн фајдалыдыр ки, Аллаһ бәндәси камил олуб, һәр ҹүр хејирли иш үчүн тәҹһиз едилсин” (2 Тимотејә 3:16, 17).
4, 5. Мүгәддәс Китабы надир китаб едән нәдир?
4 Мүгәддәс Китаб доғрудан да надир китабдыр. Бу китабда бәшәр тарихи һагда ән дәгиг мә’лумат јерләшир вә һәтта инсанын јарадылмасындан әввәлки вахта аид олан һадисәләр дә тәсвир едилир. Һәмчинин бу китаб мүасирдир, чүнки онун пејғәмбәрликләри һәм бизим зәманәмиздә, һәм дә јахын ҝәләҹәкдә олаҹаг һадисәләрлә бағлыдыр.
5 Тарихи дәгиглији бахымындан бу дәрәҹәдә е’тибар газанмыш башга бир китаб јохдур. Мәсәлән, гәдим классикләрин јалныз бир нечә әлјазмалары мөвҹуддур. Амма Мүгәддәс Китабын там вә ја бә’зи һиссәләринин чохлу әлјазмалары мөвҹуддур. Бунлар, Ибраниҹә Мүгәддәс Јазыларын (“Әһди Әтиг”ин 39 китабы) 6 000-ә јахын вә Јунанҹа Мүгәддәс Јазыларын (“Әһди Ҹәдид”ин 27 китабы) 13 000-ә јахын әлјазмасыдыр.
6. Биз нә үчүн әмин ола биләрик ки, әлимиздәки Мүгәддәс Китаб маһијјәтҹә Аллаһын илһам верәрәк јаздырдығы илә ејнидир?
6 Мүгәддәс Китаба илһам верән Гадир Аллаһ бу әлјазмаларын сурәтләриндәки мәтнин дәјишмәз олараг сахланылмасынын гејдинә галмышдыр. Буна ҝөрә дә, бу ҝүн әлимиздә олан Мүгәддәс Китаб маһијјәтҹә Аллаһдан илһам алмыш Мүгәддәс Јазыларын орижиналы илә ејнидир. Буну баша дүшмәкдә бизә көмәк едән диҝәр сүбут исә, Јунанҹа Мүгәддәс Јазыларын әлјазмаларынын бә’зи сурәтләринин, орижиналын јазылдығы јүзиллијә аид олмасыдыр. Гәдим дүнја јазычыларынын һәлә дә мөвҹуд олан азсајлы әлјазмаларынын сурәтләри, надир һалларда онларын мүәллиф тәрәфиндән јазылдығы вахтдан бир нечә јүз ил сонраја тәсадүф едир.
Аллаһын һәдијјәси
7. Мүгәддәс Китаб нә дәрәҹәдә ҝениш јајылмышдыр?
7 Мүгәддәс Китаб тарихдә ән чох јајылмыш китабдыр. Үч милјарда јахын нүсхәси чап олунуб. Бу сајда нәшр олунан башга һеч бир китаб јохдур. Мүгәддәс Китаб там вә ја гисмән тәхминән 2 000 дилә тәрҹүмә едилиб. Беләликлә, тәхмин едилдијинә ҝөрә, Мүгәддәс Китаб планетимиздәки әһалинин 98 фаизи үчүн әлчатандыр.
8-10. Мүгәддәс Китаб һансы сәбәбләрә ҝөрә бизим тәрәфимиздән тәдгиг едилмәјә лајигдир?
8 Ајдындыр ки, Аллаһдан олдуғуну тәсдигләјән вә доғрулуғуна һәм хариҹи, һәм дә дахили сүбутлары олан китаб бизим тәрәфимиздән тәдгиг едилмәјә лајигдирa. Бу китаб һәјатын мә’насыны, дүнја һадисәләринин мәғзини вә ҝәләҹәјин нә ҝәтирәҹәјини изаһ едир. Башга һеч бир китаб буну едә билмир.
9 Бәли, Мүгәддәс Китаб — Аллаһын бәшәр аиләси илә гурдуғу үнсијјәт васитәсидир. Аллаһ өзүнүн фәал гүввәси, јә’ни руһу илә тәхминән 40 нәфәрдән истифадә едәрәк, бу китабын јазылмасына рәһбәрлик етмишдир. Беләликлә, Аллаһ өз Кәламынын, Мүгәддәс Китабын васитәсилә бизимлә данышыр. Һәвари Павел јазырды: “Сиз, Аллаһын биздән ешитдијиниз кәламыны гәбул етдикдә, ону бәшәри сөз олараг дејил, әслиндә олдуғу кими, Аллаһын кәламы олараг гәбул етдиниз” (1 Салониклиләрә 2:13).
10 Америка Бирләшмиш Штатларынын 16-ҹы президенти Авраам Линколн Мүгәддәс Китабы “Аллаһын инсана вердији ән јахшы һәдијјә” адландырмыш вә белә сөзләр әлавә етмишдир: “Биз онсуз јахшыны писдән ајырд едә билмәздик”. Белә исә, бу ән бөјүк һәдијјә, изтирабларын неҹә башландығыны, Аллаһын буна нә үчүн јол вердијини вә бунунла әлагәдар едәҹәји иш һагда бизә нә дејир?
[Һашијәләр]
a Мүгәддәс Китабын дәгиглији һаггында даһа әтрафлы мә’лумат үчүн, Јеһованын Шаһидләри тәрәфиндән 2002-ҹи илдә нәшр олунан “Һамы үчүн олан китаб” брошүрасына бахын.
[10-ҹу сәһифәдә олан шәкил]
Аллаһ тәрәфиндән илһамланмыш Мүгәддәс Китаб, Онун бәшәр аиләси илә гурдуғу үнсијјәт васитәсидир.