Һиссә 8
Аллаһын нијјәти јеринә јетмәк үзрәдир
1, 2. Аллаһ инсанлары изтираблардан гуртармаг тәдбирини неҹә һазырлајырды?
ӘСРЛӘР боју үсјанкар инсанларын вә ҹинләрин һөкмранлығы бәшәр аиләсинин вәзијјәтини ҝет-ҝедә даһа да писләшдирмишдир. Лакин Аллаһ чәкдијимиз изтираблара е’тинасыз галмамышдыр. Әксинә, бүтүн әсрләр боју инсанлары пислик вә изтирабын әсарәтиндән азад етмәк үчүн тәдбирләр ҝөрмүшдүр.
2 Еден бағында үсјанын баш вердији вахтдан е’тибарән, Аллаһ јер үзүнү инсанлар үчүн Ҹәннәт мәканына чевирәҹәк бир һөкумәт јаратмаг нијјәтини ачыгламаға башлады (Тәквин 3:15). Сонрадан Иса Аллаһын баш нүмајәндәси кими, Онун ҝәләҹәк һөкумәтини өз тә’лиминин әсас мөвзусу етди. О билдирди ки, бу һөкумәт бәшәријјәтин јеҝанә үмид јери олаҹагдыр (Даниел 2:44; Матта 6:9, 10; 12:21).
3. Иса Јер күрәси үчүн гурулаҹаг һөкумәти неҹә адландырмышдыр вә нә үчүн?
3 Иса Аллаһын ҝәләҹәк бу һөкумәтини “Ҝөјләрин Падшаһлығы” адландырмышдыр, чүнки Падшаһлыг ҝөјләрдән идарә едәҹәкдир (Матта 4:17 И–93). Јараданы Аллаһ олдуғундан, Иса бу Падшаһлығы һәмчинин “Аллаһын Падшаһлығы” адландырды (Лука 17:20, И–93). Аллаһ јүзилликләр әрзиндә бу һөкумәтин тәркибинә дахил олаҹаг инсанлар вә һөкумәтин һәјата кечирәҹәји ишләр һаггында пејғәмбәрликләрин јазылмасы үчүн катибләрини илһамландырмышдыр.
Јер күрәсинин јени падшаһы
4, 5. Аллаһ неҹә ҝөстәрди ки, Иса Онун бәјәндији Падшаһдыр?
4 Тәхминән ики мин ил бундан әввәл, Аллаһын Падшаһлығынын Падшаһы олаҹаг шәхс һаггында јазылан бир чох пејғәмбәрликләр Исанын үзәриндә јеринә јетди. Бәшәријјәт үзәриндә һөкм сүрәҹәк сәмави һакимијјәти үчүн Аллаһын сечдији Һөкмдар Иса олду. Иса өлдүкдән сонра Аллаһ ону гүдрәтли, өлмәз руһани бир варлыг кими ҝөјдә јашамаг үчүн дирилтди. Онун дирилмәсинин чохлу шаһиди олмушдур (Һәвариләрин ишләри 4:10; 9:1-9; Ромалылара 1:1-4; 1 Коринфлиләрә 15:3-8).
5 Сонра Иса “Аллаһын сағында отурду” (Ибраниләрә 10:12). Орада о, ҝөјләр Падшаһлығынын Падшаһы кими фәалијјәт ҝөстәрмәк үчүн Аллаһын она сәлаһијјәт верәҹәји бир вахты ҝөзләјирди. Бунунла да Аллаһын Мәзмур 110:1 ајәсиндә она: “Мән дүшмәнләрини сәнин ајагларын алтына кәтил олараг гојунҹаја гәдәр, сағымда отур”, дедији пејғәмбәрлик јеринә јетди.
6. Иса Аллаһын Падшаһлығынын Падшаһына гаршы ирәли сүрүлән тәләбләрә мүвафиг олдуғуну неҹә ҝөстәрди?
6 Иса јер үзүндә оларкән, белә бир вәзифәјә лајиг олдуғуну ҝөстәрди. Тә’гибләрә бахмајараг, о, Аллаһ гаршысында нөгсансызлығыны горумағы үстүн тутду. Иса белә етмәклә, Шејтанын, һеч бир инсан сынаглар заманы Аллаһа садиг галмајаҹаг иддиасынын јалан олдуғуну ҝөстәрди. Камил инсан, “сонунҹу Адәм” олан Иса ҝөстәрди ки, Аллаһ камил инсанлары јарадаркән сәһв етмәмишдир (1 Коринфлиләрә 15:22, 45; Матта 4:1-11).
7, 8. Јер үзүндә оларкән Иса һансы јахшы ишләри ҝөрдү вә бунунла нәји ҝөстәрмиш олду?
7 Һансы рәһбәр Исанын бир нечә иллик хидмәти әрзиндә етдији гәдәр јахшы ишләр ҝөрүб? Аллаһын мүгәддәс руһунун васитәсилә Иса хәстәләрә, шикәстләрә, корлара, карлара вә лаллара шәфа верирди. О, һәтта өлүләри дә дирилдирди! Иса, падшаһлыг иззәтиндә ҝәләҹәји заман бәшәријјәт үчүн дүнја мигјасында едәҹәји ишләри кичик өлчүдә ҝөстәрди (Матта 15:30, 31; Лука 7:11-16).
8 Иса јер үзүндә оларкән о гәдәр јахшы ишләр ҝөрмүшдүр ки, шаҝирди Јәһја демишдир: “Исанын етдији башга чох шејләр һәлә вардыр вә әҝәр бирәр-бирәр јазылмыш олсалар, санырам ки, јазылан китаблар дүнјаја белә сығмазды” (Јәһја 21:25)a.
9. Сәмими гәлбли инсанлар нәјә ҝөрә Исанын әтрафына топлашырдылар?
9 Инсанлара бөјүк мәһәббәти олан Иса хејирхаһ вә шәфгәтли иди. О, касыблара вә сыхынты ичиндә оланлара көмәк едирди, ејни заманда зәнҝин вә адлы-санлы инсанларын да әлејһинә дејилди. Сәмими гәлбли инсанлар, Исанын мәһәббәтлә долу дә’вәтинә һај верирдиләр. О дејирди: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам; вә ҹаныныза раһатлыг тапарсыныз. Чүнки бојундуруғум асан вә јүкүм јүнҝүлдүр” (Матта 11:28-30). Аллаһдан горхан инсанлар Исанын әтрафына топлашыр вә үмидлә онун рәһбәрлијини ҝөзләјирдиләр (Јәһја 12:19).
Онун һакимијјәт шәрикләри
10, 11. Јер үзүнү идарә етмәкдә Иса илә бәрабәр кимләр иштирак едәҹәкләр?
10 Инсан һөкумәтләриндә бирҝә фәалијјәт ҝөстәрән вәзифәли шәхсләр олдуғу кими, Аллаһын ҝөјләр Падшаһлығында да беләдир. Исадан башга, јер үзүнә рәһбәрлик етмәкдә диҝәрләри дә иштирак едәҹәкләр, чүнки Иса онунла сых мүнасибәтдә оланлара вә’д етди ки, бәшәријјәт үзәриндә онунла бирликдә падшаһлар кими һөкмранлыг едәҹәкләр (Јәһја 14:2, 3; Вәһј 5:10; 20:6).
11 Беләликлә, Иса илә бирликдә ҝөјдә јашамаг үчүн мәһдуд сајда инсанлар да дирилдилир. Онлар Аллаһын бәшәријјәтә әбәди хејир-дуалар ҝәтирәҹәк Падшаһлығынын тәркибинә дахилдирләр (2 Коринфлиләрә 4:14; Вәһј 14:1-3). Бунунла да Јеһова, әсрләр әрзиндә бәшәр аиләсинә әбәди хејир-дуалар ҝәтирәҹәк бир рәһбәрлијин тәмәлини гојмушдур.
Аллаһдан асылы олмајан рәһбәрлијин сону
12, 13. Аллаһын Падшаһлығы һазырда һансы ишләрә һазырдыр?
12 Өтән јүзилликдә Аллаһ дүнјанын ишләринә билаваситә мүдахилә етди. Бу брошүранын 9-ҹу һиссәсиндә мүзакирә олунаҹағы кими, Мүгәддәс Китаб пејғәмбәрлији Аллаһын Падшаһлығынын 1914-ҹү илдә Мәсиһин рәһбәрлији алтында гурулдуғуну, инди исә бу Падшаһлығын Шејтанын бүтүн системини мәһв етмәк үчүн һазыр бир вәзијјәтдә олдуғуну ҝөстәрир. Бу Падшаһлыг, Мәсиһин “дүшмәнләринин арасында һөкмранлыг” етмәјә һазырдыр (Мәзмур 110:2).
13 Бу һагда Даниел 2:44 ајәсиндәки пејғәмбәрликдә дејилир: “О [инди мөвҹуд олан] падшаһларын ҝүнләриндә ҝөјләрин Аллаһы [ҝөјдә] әбәдијјән дағылмајаҹаг бир падшаһлыг гураҹаг вә онун һакимијјәти башга бир халга верилмәјәҹәк [инсан рәһбәрлијинә артыг һеч бир вахт јол верилмәјәҹәк]; анҹаг бу падшаһлыгларын һамысыны о [Аллаһын Падшаһлығы] парчалајаҹаг вә мәһв едәҹәк, өзү исә әбәдијјән дураҹаг”.
14. Инсан рәһбәрлијинин арадан галдырылмасы нәтиҹәсиндә һансы фајдалар әлдә едиләҹәкдир?
14 Аллаһдан асылы олмајан бүтүн һакимијјәтләр арадан ҝөтүрүлдүкдә, Аллаһын Падшаһлығынын рәһбәрлији јер үзәриндә там мә’нада һөкм сүрәҹәкдир. Бу Падшаһлыг ҝөјдән идарә етдијинә ҝөрә, инсанлар тәрәфиндән бир даһа позулмајаҹагдыр. Рәһбәрлик сәлаһијјәти башланғыҹда олдуғу кими ҝөјдә Аллаһын әлиндә олаҹагдыр. Аллаһын һөкмранлығынын бүтүн јер үзүнә нәзарәт едәҹәјинә ҝөрә, артыг һеч ким бир даһа јалан динләр вә ја гәнаәтбәхш олмајан инсан фәлсәфәләри вә сијаси нәзәријјәләрлә алдадылмајаҹаг. Бунлардан һеч биринин мөвҹуд олмасына јол верилмәјәҹәк (Матта 7:15-23; Вәһј 17-19-ҹу фәсилләр).
[Һашијәләр]
a Исанын һәјаты барәдә там мә’лумат алмаг үчүн, Јеһованын Шаһидләри тәрәфиндән 1991-ҹи илдә нәшр олунмуш “Дүнјада јашамыш ән бөјүк инсан” китабына бахын (түрк.)
[18-ҹи сәһифәдә олан шәкилләр]
Иса јер үзүндә оларкән хәстәләрә шәфа вермәклә вә өлүләри дирилтмәклә, јени дүнјада едәҹәји ишләри ҝөстәрирди.
[19-ҹу сәһифәдә олан шәкил]
Аллаһын сәмави Падшаһлығы, Аллаһдан асылы олмајан бүтүн һакимијјәт формаларына сон гојаҹагдыр.