ФӘСИЛ 13
Аллаһа мәгбул һәјат тәрзи нәјә ҝөрә хошбәхтлик ҝәтирир?
1. Нәјә ҝөрә дејә биләрик ки, Јеһованын јоллары хошбәхтлик ҝәтирир?
ЈЕҺОВА “хошбәхт Аллаһ”дыр вә О истәјир ки, сиз дә һәјатдан севинҹ дујасыныз (1 Тимотејә 1:11, ЈД). Онун јолу илә јеријәрәк, сиз өзүнүз үчүн фајда әлдә едәҹәк вә сонсуз ахан чај кими дәрин вә узунсүрән сакитлијә наил олаҹагсыныз. Аллаһын јолу илә јеримәк инсаны бир-биринин ардынҹа ҝәлән “дәниз далғалары кими” дүзҝүн әмәлләр етмәјә тәшвиг едир. Бу исә һәгиги хошбәхтлик ҝәтирир (Ишаја 48:17, 18).
2. Мәсиһчиләрлә һәрдән пис давранмаларына бахмајараг, онлар нәјә ҝөрә хошбәхт ола биләрләр?
2 Бә’зиләри е’тираз едә биләрләр ки, һәрдән инсанлар јахшы әмәлләринә ҝөрә дә әзаб чәкирләр. Бу доғрудан да беләдир. Ејни шеј Исанын һәвариләринин дә башына ҝәлирди. Тә’гиб олунсалар да, онлар јенә дә өз севинҹләрини итирмир вә ‘Исанын Мәсиһ олдуғуну мүждәләмәјә’ давам едирдиләр (Һәвариләрин ишләри 5:40-42). Бурадан биз ваҹиб ибрәт дәрсләри ҝөтүрә биләрик. Бунлардан бири одур ки, бизим Аллаһа мәгбул һәјат јашамағымыз башгаларынын бизә һәмишә јахшы јанашаҹагларына зәманәт вермир. Һәвари Павел јазмышдыр: “Аллаһ јолунда Мәсиһ Исаја бағлы олараг јашамаг истәјәнләрин һамысы да тә’гибә мә’руз галаҹагдыр” (2 Тимотејә 3:12). Бу, Шејтан вә онун дүнјасынын Аллаһа мәгбул һәјат јашајанлара мүгавимәт ҝөстәрдикләри үчүн баш верир (Јәһја 15:18, 19; 1 Петер 5:8). Лакин әсл хошбәхтлик әтраф шәраитдән асылы дејил. Әслиндә бу, әмәлләримизин дүзҝүнлүјүнә вә Аллаһын бизи буна ҝөрә бәјәндијинә әмин олмағымыздан ирәли ҝәлир (Матта 5:10-12; Јагуб 1:2, 3; 1 Петер 4:13, 14).
3. Јеһоваја ибадәт инсанын һәјатына неҹә тә’сир ҝөстәрмәлидир?
3 Бә’зи инсанлар елә дүшүнүрләр ки, Аллаһын илтифатыны газанмаг үчүн һәрдәнбир Она мәгбул олан ишләри ҝөрмәк кифајәтдир, галан вахтларда исә Ону һеч јада салмамаг да олар. Лакин Јеһова Аллаһа едилән һәгиги ибадәт белә дејил. Бу ибадәт, инсанын давраныш тәрзинә ојаг олдуғу бүтүн саатларда — ҝүндән-ҝүнә, илдән-илә тә’сир едир. Буна ҝөрә дә бу ҹүр ибадәт һәмчинин “јол” адланыр (Һәвариләрин ишләри 19:9; Ишаја 30:21). Аллаһын Кәламына мүвафиг данышмаг вә давранмаг мәс’улијјәтини үзәримизә гојан да мәһз Аллаһа мәгбул һәјат тәрзидир.
4. Нәјә ҝөрә Аллаһын јолларына мүвафиг јашамаг үчүн дәјишикликләр етмәк фајдалыдыр?
4 Мүгәддәс Китабы өјрәнмәјә башлајан инсанлар Јеһованын онлардан мүәјјән дәјишикликләр ҝөзләдијини ҝөрдүкдә өзләриндән соруша биләрләр: “Доғруданмы Аллаһа мәгбул һәјат тәрзи сүрмәјә дәјәр?” Шүбһәсиз ки, дәјәр. Нә үчүн? Чүнки “Аллаһ мәһәббәтдир” вә Онун јоллары бизим рифаһымыза хидмәт едир (1 Јәһја 4:8). Аллаһ һәмчинин мүдрикдир вә бизим үчүн нәјин даһа јахшы олдуғуну билир. Јеһова һәр шејә Гадир Аллаһ олдуғундан, О, бизә пис вәрдишләримизи тәрҝитмәк вә Ону мәмнун етмәк истәјимизи һәјата кечирмәкдә ҝүҹ верә биләр (Филипилиләрә 4:13). Ҝәлин, Аллаһа мәгбул һәјат тәрзи илә бағлы олан бә’зи принсипләри мүзакирә едәк вә онлары һәјата кечирмәјин неҹә хошбәхтлик ҝәтирдијини нәзәрдән кечирәк.
ДҮЗҜҮНЛҮК ХОШБӘХТЛИК ҜӘТИРИР
5. Мүгәддәс Китабда јалан вә оғурлуг һаггында нә дејилир?
5 Јеһова “һәгигәт Аллаһы”дыр (Мәзмур 31:5). Сиз, јәгин ки, Онун нүмунәсини тәглид етмәк вә доғру инсанларын сырасында олмаг истәјәрдиниз. Дүзҝүнлүк инсана шәхси ләјагәт һисси вә әмин-аманлыг бәхш едир. Бунунла белә, бу ҝүнаһлы дүнјада сахтакарлыг чох ҝениш јајылдығындан, мәсиһчиләр нөвбәти хәбәрдарлыға диггәт јетирмәлидирләр: “Һәр бириниз өз гоншусуна һәгигәти сөјләсин... Оғурлуг едән артыг оғурламасын; әксинә, өз әлләринин әмәји илә јахшы иш ҝөрсүн ки, еһтијаҹы оланларла бөлүшдүрмәјә бир шеји олсун” (Ефеслиләрә 4:25, 28). Мәсиһчиләр ҝүндәлик ишләрини виҹданла јеринә јетирирләр. Онлар мүдирин иҹазәси олмадан она мәхсус олан шејләри ҝөтүрмүрләр. Јеһованын хидмәтчиси өзүнү истәр ишдә, истәр мәктәбдә, истәрсә дә евдә ‘һәр ҹәһәтҹә јахшы апармалыдыр’ (Ибраниләрә 13:18). Јалан данышан вә ја оғурлуг едән инсан исә Аллаһын ондан разы галаҹағына үмид едә билмәз (Тәснијә 5:19; Вәһј 21:8).
6. Инсанларын Аллаһа мәгбул дүзҝүнлүјү Јеһоваја неҹә иззәт ҝәтирә биләр?
6 Дүзҝүнлүк чохлу хејир-дуалар ҝәтирир. Африкада јашајан Селина адлы јохсул дул гадын Јеһова Аллаһы вә Онун әдаләтли принсипләрини севир. Бир дәфә һәмин гадын ичиндә әманәт китабчасы вә бөјүк мәбләғдә пул олан чанта тапды. О, телефон китабчасы васитәсилә чантанын саһибини ахтарыб тапды. Бу адам јениҹә јарылмыш мағазанын саһиби иди. Селина чох хәстә олмасына бахмајараг, һәр шеји олдуғу кими ҝәтириб ҝери гајтаранда, һәмин адам ҝөзләринә инанмады. “Бу ҹүр дүзҝүнлүјү мүкафатландырмаг лазымдыр” дејәрәк, она мүәјјән мигдарда пул верди. Ән ваҹиби исә, о, Селинанын динини тә’рифләди. Бәли, дүзҝүнлүк Мүгәддәс Китаб тә’лимләринин бәзәјидир, Јеһова Аллаһы иззәтләндирир вә Онун дүзҝүн давранан хидмәтчиләринә хошбәхтлик ҝәтирир (Титуса 2:10; 1 Петер 2:12).
ӘЛИАЧЫГЛЫГ ХОШБӘХТЛИК ҜӘТИРИР
7. Гумар ојунларында пис олан нәдир?
7 Әлиачыглыг инсана хошбәхтлик ҝәтирдији һалда, тамаһкарлар “Аллаһын Падшаһлығыны мирас алмајаҹаглар” (1 Коринфлиләрә 6:10, И–93). Тамаһкарлығын ҝениш јајылмыш формаларындан бири — башгаларынын удузмасындан газанҹ әлдә едилән гумар ојунларыдыр. Јеһова “биабырчы газанҹа һәрис” олан инсанлары бәјәнмир (1 Тимотејә 3:8). Гумар ојунларынын һәтта гануни сајылдығы вә инсанларын әјләнҹә хатиринә ојнадыглары јерләрдә белә, инсан өзүндә, чохларынын һәјатыны тәләф едән һәвәс инкишаф етдирә биләр. Гумар ојунлары чох вахт ојунчунун аиләсинә бир сыра чәтинликләр ҝәтирир, белә ки, аиләнин ән зәрури шејләрә — әрзаг вә палтара пулу олмаја биләр (1 Тимотејә 6:10).
8. Иса әлиачыглығын һансы ҝөзәл нүмунәсини верди вә биз неҹә әлиачыг ола биләрик?
8 Мәһәббәтә әсасланан әлиачыглығын сајәсиндә, мәсиһчиләр башгаларына, хүсусилә дә еһтијаҹ ичиндә олан руһани баҹы-гардашларына көмәк етмәкдән севинҹ дујурлар (Јагуб 2:15, 16). Иса јер үзүнә ҝәлмәздән әввәл Аллаһын инсанлара нә гәдәр әлиачыглыг ҝөстәрдијини мүшаһидә етмишдир (Һәвариләрин ишләри 14:16, 17). Иса өзү дә бәшәријјәт уғрунда нәинки вахтыны вә баҹарығыны, һәтта һәјатыны белә гурбан вермишдир. Буна ҝөрә дә, о, бу ҹүр әминликлә дејирди ки: “Вермәк алмагдан даһа бөјүк бәхтијарлыг ҝәтирир” (Һәвариләрин ишләри 20:35). Иса һәмчинин мә’бәдин хәзинәсинә сәмими гәлбдән ики сиккәни атан касыб дул гадыны тә’рифләди, чүнки һәмин гадын “доланмаг үчүн әлиндә олан бүтүн пулуну” верди (Марк 12:41-44). Гәдим исраиллиләр вә биринҹи әсрин мәсиһчиләри, јығынҹағы вә Аллаһын Падшаһлыг ишини әлиачыглыгла вә севинҹлә дәстәкләмәјә даир ҝөзәл нүмунәдирләр (1 Тарихләр 29:9; 2 Коринфлиләрә 9:11-14). Буҝүнкү мәсиһчиләр Аллаһы јалныз мадди ианәләрлә дејил, һәм дә һәјатларыны Она хидмәтә һәср етмәклә дә севинҹлә иззәтләндирирләр (Ромалылара 12:1; Ибраниләрә 13:15). Онлар һәгиги ибадәти вә Падшаһлыг һаггындакы хош хәбәрин үмумдүнја тәблиғ ишини дәстәкләмәк үчүн өз вахтларыны, гүввәләрини вә һәр ҹүр вәсаитләрини сәрф етдикләринә ҝөрә Јеһова онлара хејир-дуа верир (Сүлејманын мәсәлләри 3:9, 10).
ХОШБӘХТЛИК ҜӘТИРӘН ДИҜӘР АМИЛЛӘР
9. Спиртли ичкиләрдән суи-истифадә етмәкдә пис олан нәдир?
9 Хошбәхтлијә наил олмаг үчүн мәсиһчиләр ‘дәрракәјә бағланмалыдырлар’ (Сүлејманын мәсәлләри 5:1, 2, МКШ). Бунун үчүн онлар Аллаһын Кәламыны вә она әсасланан фајдалы әдәбијјатлары охумалы вә онларын үзәриндә дәриндән дүшүнмәлидирләр. Лакин гачынмалы олдуғумуз шејләр дә вар. Мәсәлән, һәддиндән артыг спиртли ички гәбул етмәк, инсанын өз дүшүнҹәсини идарә етмәсинә мане ола биләр. Белә һалларда бир чохлары әхлагсызлыға гапылыр, зоракылыг едир вә һәтта киминсә өлүмүнә баис олурлар. Тәәҹҹүблү дејил ки, Мүгәддәс Китабда сәрхошларын Аллаһын Падшаһлығыны мирас алмајаҹаглары дејилир! (1 Коринфлиләрә 6:10). Мәсиһчиләр “тәмкинли”, јә’ни сағлам дүшүнҹәли олмаға ҹан атараг, сәрхошлугдан гачынырлар, бу исә онларын арасында һөкм сүрән хошбәхтлијә ҝәтириб чыхарыр (Титуса 2:2-6).
10. а) Мәсиһчиләр нәјә ҝөрә түтүндән истифадә етмирләр? б) Натәмиз вәрдишләрә сон гојмагла һансы фајданы әлдә етмәк олар?
10 Бәдәнин тәмизлији дә хошбәхтлик ҝәтирир. Бунунла белә, чохларында зәрәрли маддәләрә мејл ојаныр. Мисал үчүн түтүнү ҝөтүрәк. Үмумдүнја Сәһијјә Тәшкилатынын вердији хәбәрә ҝөрә, сигарет чәкмәк “һәр ил үч милјон инсанын һәјатыны тәләф едир”. Бу вәрдиши тәрк етмәк тәрҝитмәнин мүвәггәти симптомларына ҝөрә чәтин ола биләр. Лакин әввәлләр сигарет чәкәнләрин бир чоху ҝөрүрләр ки, онларын сағламлығы јахшылашыр вә аиләләри үчүн даһа чох пул галыр. Бәли, түтүн вә диҝәр зәрәрли маддәләри гәбул етмәк вәрдишини вә ја мејлини арадан галдырмагла, инсан өз организмини тәмизләјир, виҹданыны сакитләшдирир вә һәгиги хошбәхтлик әлдә едир (2 Коринфлиләрә 7:1).
НИКАҺДА ХОШБӘХТЛИК
11. Никаһын гануни, мөһкәм вә һөрмәт ичиндә олмасы үчүн нә тәләб олунур?
11 Әр-арвад кими јашајан гадын вә киши никаһларынын дөвләт тәрәфиндән рәсми гејдијјата алынмасынын гајғысына галмалыдырлар (Марк 12:17). Онлар һәмчинин никаһа олдугҹа мәс’улијјәтлә јанашмалыдырлар. Дүздүр, әҝәр мәсәлә аиләнин гејдинә галмагдан имтина етмәјә, олдугҹа кобуд рәфтара вә руһани сағламлыға там тәҹавүз едилмәсинә ҝәлиб чыхырса, онда әр вә арвадын ајры јашамасы зәрури ола биләр (1 Тимотејә 5:8; Галатијалылара 5:19-21). Лакин һәвари Павелин 1 Коринфлиләрә 7:10-17 ајәләриндәки сөзләри әрлә арвады бирҝә јашамаға тәшвиг едир. Вә әлбәттә ки, һәгиги хошбәхтлик үчүн онлар бир-бирләринә олан сәдагәтләрини горумалыдырлар. Павел јазырды: “Гој һәр кәс никаһа һөрмәт етсин вә кәбин јатағы ләкәсиз олсун; чүнки Аллаһ, әхлагсызлары вә зинакарлары мәһкум едәҹәкдир” (Ибраниләрә 13:4). “Кәбин јатағы” сөзү гануни никаһда олан гадынла киши арасындакы ҹинси әлагәни нәзәрдә тутур. Башга һеч бир ҹинси әлагә, мәсәлән, никаһда бир вә ја даһа чох гадынла әлагәдә олмаг “никаһа һөрмәт” сајыла билмәз. Бундан әлавә, Мүгәддәс Китаб никаһагәдәрки ҹинси әлагәни вә һомосексуализми мүһакимә едир (Ромалылара 1:26, 27; 1 Коринфлиләрә 6:18).
12. Әхлагсызлыг һансы аҹынаҹаглы нәтиҹәләрә ҝәтириб чыхарыр?
12 Әхлагсызлыг бир нечә дәгигәлик физики һәзз верә биләр, лакин әсл хошбәхтлик ҝәтирә билмәз. Бу, Аллаһын наразылығына сәбәб олур, сонра исә белә адамы виҹдан әзабы нараһат едә биләр (1 Салониклиләрә 4:3-5). Никаһдан кәнар ҹинси әлагәнин пис нәтиҹәләриндән бири ГИЧС вә ҹинси јолла өтүрүлән диҝәр хәстәликләр ола биләр. Бир тибби мә’луматда дејилир: “Һәр ил бүтүн дүнјада 250 милјондан артыг инсанын сүзәнәк вә 50 милјона јахын инсанын исә сифилис хәстәлијинә тутулдуғу ҝүман едилир”. Һәмчинин арзуедилмәз һамиләлик проблеми дә ортаја чыхыр. Валидејнлик лајиһәси үзрә бејнәлхалг федерасијанын мә’луматына ҝөрә, бүтүн дүнјада һәр ил 15 јашындан 19 јашынадәк 15 милјондан артыг гыз һамилә галыр вә онларын үчдә бир һиссәси аборт етдирир. Апарылан тәдгигатлар ҝөстәрир ки, Африка өлкәләринин бириндә өлән јенијетмә гызларын 72 фаизи абортдан јаранан ағырлашма нәтиҹәсиндә өлүр. Әхлагсызлыгла мәшғул оланларын һамысы хәстәләниб вә ја һамилә галмасалар да, онлар мә’нәви сарсынтыдан гачына билмирләр. Чохлары өзүнәһөрмәт һиссини итирир вә һәтта өзләринә нифрәт едирләр.
13. Зина даһа һансы проблемләрә ҝәтириб чыхарыр вә зинакар вә әхлагсыз олараг галан инсанлары нә ҝөзләјир?
13 Зинаны бағышламаг мүмкүн олса да, ҝүнаһсыз олан әр вә ја арвад Мүгәддәс Китаба әсасланан бошанмаг һүгугуна маликдир. (Матта 5:32; Һошеа 3:1-5 ајәләри илә мүгајисә един.) Әҝәр бу ҹүр әхлагсызлыг уҹбатындан аилә дағыларса, ҝүнаһсыз әрин вә ја арвадын, еләҹә дә ушагларын гәлбиндә дәрин емосионал јара гала биләр. Аиләнин гајғысына галараг Аллаһын Кәламында дејилир ки, төвбә етмәјән әхлагсызлар вә зинакарлар сәрт һөкмә мә’руз галаҹаглар. Бундан әлавә, Мүгәддәс Китаб ајдын шәкилдә ҝөстәрир ки, әхлаги ҹәһәтдән натәмиз инсанлар “Аллаһын Падшаһлығыны мирас алмајаҹаглар” (Галатијалылара 5:19, 21, И–93).
“ДҮНЈАДАН ДЕЈИЛЛӘР”
14. а) Аллаһдан горхан кәсин гачындығы бүтпәрәстлијин бә’зи нөвләри һансылардыр? б) Јәһја 17:14 вә Ишаја 2:4 ајәләриндә бизә һансы рәһбәрлик верилир?
14 Јеһованы разы салмаг вә Падшаһлығын хејир-дуаларындан фајдаланмаг истәјәнләр бүтпәрәстлијин һәр ҹүр нөвүндән гачынырлар. Мүгәддәс Китаб ҝөстәрир ки, Иса Мәсиһин вә ја онун анасы Мәрјәмин шәкли дә дахил олмагла, сурәтләр дүзәлтмәк вә онлара ибадәт етмәк дүзҝүн дејил (Чыхыш 20:4, 5; 1 Јәһја 5:21). Буна ҝөрә дә, мәсиһчиләр бүтләрә, хача вә иконалара ситајиш етмирләр. Онлар һәмчинин бүтпәрәстлијин ҝизли формаларындан — бајраға тә’зим етмәкдән вә һансыса бир халгы иззәтләндирән нәғмәләри охумагдан гачынырлар. Онлары бу ҹүр ишләрә мәҹбур етдикдә, Исанын Шејтана дедији сөзләри хатырлајырлар: “Аллаһын олан Рәббә сәҹдә гыл вә јалныз Она гуллуг ет” (Матта 4:8-10). Иса демишдир ки, онун давамчылары “дүнјадан дејилләр” (Јәһја 17:14). Бу о демәкдир ки, онлар сијаси ишләрә гарышмыр вә Ишаја 2:4 ајәсиндәки сөзләрә риајәт едәрәк сүлһ ичиндә јашајырлар. Орада дејилир: “[Јеһова Аллаһ] милләтләр арасында һөкм едәҹәк вә чох халглар һаггында гәрар верәҹәк вә гылынҹларыны котан дәмирләри вә мизрагларыны бағча бычаглары едәҹәкләр; милләт милләтә гаршы гылынҹ галдырмајаҹаг вә артыг ҹәнҝ етмәји өјрәнмәјәҹәкләр”.
15. Бөјүк Бабил нәдир вә Мүгәддәс Китабы јени өјрәнмәјә башлајанларын бир чоху ону тәрк етмәк үчүн нә едирләр?
15 ‘Дүнјадан олмамаг’, һәмчинин јалан динләрин дүнја империјасы олан “Бөјүк Бабил” илә бүтүн әлагәләри кәсмәк демәкдир. Натәмиз ибадәтин пис руһани тә’сири гәдим Бабилдән башлајараг, дүнја халглары үзәриндә индијәдәк һөкмранлыг едир. “Бөјүк Бабилә” — тә’лим вә әмәлләри Аллаһ һаггындакы билијә зидд ҝедән бүтүн динләр дахилдир (Вәһј 17:1, 5, 15). Јеһованын һеч бир садиг хидмәтчиси, мүхтәлиф динләрлә бирләшәрәк вә ја Бөјүк Бабилин һәр һансы һиссәси илә достлуг едәрәк динләрарасы фәалијјәтлә мәшғул олмајаҹаг (Сајлар 25:1-9; 2 Коринфлиләрә 6:14). Бу сәбәбдән, Мүгәддәс Китабы өјрәнмәјә башлајанларын әксәријјәти мәхсус олдуглары дини тәшкилатдан чыхдыглары барәдә әризә јазырлар. Бу онлары, нөвбәти вә’ди верән һәгиги Аллаһла јахынлашдырыр: “[Онларын] арасындан чыхын вә онлардан ајрылын; мурдар бир шејә тохунмајын, Мән дә сизи гәбул едәҹәјәм” (2 Коринфлиләрә 6:17; Вәһј 18:4, 5). Мәҝәр сиз сәмави Атамызын сизи гәбул етмәсини бүтүн үрәкдән арзу етмирсинизми?
ИЛЛИК БАЈРАМЛАРА НЕҸӘ ЈАНАШМАЛЫ?
16. Исанын һәгиги давамчылары нәјә ҝөрә Милад ҝүнүнү гејд етмирләр?
16 Аллаһа мәгбул һәјат тәрзи бизи, чох вахт әлавә јүк олан дүнјәви бајрамлардан азад едир. Мисал үчүн, Мүгәддәс Китабда Исанын доғулдуғу ҝүн дәгиг дејилмир. Бә’зиләри дејә биләрләр: “Мән елә фикирләширдим ки, Иса декабрын 25-дә анадан олуб!” Лакин бу мүмкүн дејил, чүнки Иса б. е. 33-ҹү илинин јазында, 33 јаш јарымында өлмүшдүр. Бундан әлавә, о доғулан заман “өлкәдә чобанлар вар иди. Онлар ҝеҹә чөлдә өз сүрүләринин кешијини чәкирдиләр” (Лука 2:8). Исраилдә декабрын сону — сојуг, илин јағышлы вахтыдыр вә гојунлары гышын сојуғундан горумаг үчүн адәтән ҝеҹәләр онлары ағыла салырдылар. Әслиндә исә декабрын 25-дә ромалылар ҝүнәш илаһисинин ад ҝүнүнү гејд едирдиләр. Исанын јер үзүндә јашадығы вахтдан әсрләр өтдү вә дөнүк мәсиһчиләр бу тарихи Мәсиһин доғум ҝүнү кими гәбул етдиләр. Бу сәбәбдән Исанын һәгиги давамчылары Милад бајрамыны вә ја јалан дини тәсәввүрләрә әсасланан диҝәр бајрамлары гејд етмирләр. Онлар Јеһоваја там сәдагәтли олдугларына ҝөрә, гејри-камил инсанлары вә халглары илаһиләшдирән бајрамлары да гејд етмирләр.
17. Аллаһ горхусуна малик олан инсанлар ад ҝүнләрини нәјә ҝөрә гејд етмирләр вә бунунла белә онларын ушаглары нә үчүн хошбәхтдирләр?
17 Мүгәддәс Китабын өзүндә ад ҝүнүнүн гејд едилмәси ҹәми ики дәфә хатырланыр вә һәр ики һалда да Аллаһа хидмәт етмәјән кәсләр иштирак етмишдир (Тәквин 40:20-22; Матта 14:6-11). Мүгәддәс Јазылар камил инсан олан Иса Мәсиһин ад ҝүнүнү ҝөстәрмирсә, онда гејри-камил инсанларын ад ҝүнләринә хүсуси диггәт јетирмәјә дәјәрми? (Ваиз 7:1). Сөзсүз ки, Аллаһ горхусуна малик олан валидејнләр өз өвладларына мәһәббәт ҝөстәрмәк үчүн һансыса хүсуси бир ҝүнү ҝөзләмирләр. 13 јашлы мәсиһчи бир гыз гејд етмишдир: “Бизим аиләмиз чох шән аиләдир... мән валидејнләримлә чох јахынам вә башга ушаглар мүхтәлиф бајрамлары гејд етмәмәјимин сәбәбини сорушанда, мәним үчүн һәр ҝүнүн бајрам олдуғуну дејирәм”. 17 јашлы башга бир мәсиһчи оғлан исә белә дејир: “Биз аиләдә бир-биримизә ил боју һәдијјәләр бағышлајырыг”. Ҝөзләнилмәз һәдијјәләр даһа чох севинҹ ҝәтирир.
18. Иса өз давамчыларына һансы иллик бајрамы гејд етмәји бујурду вә бу бајрам бизә нәји хатырладыр?
18 Аллаһа мәгбул һәјат сүрән кәсләрин һәр ил гејд етмәли олдуглары јалныз бир ҝүн мөвҹуддур. Бу, чох вахт Мәсиһин өлүмүнүн Хатирә Ҝеҹәси адландырылан, Рәббин Ахшам јемәјидир. Бу бајрамы тә’сис едәркән Иса давамчыларына бујурду: “Буну Мәни анмаг үчүн един” (Лука 22:19, 20; 1 Коринфлиләрә 11:23-25). Иса бу бајрамы б. е. 33-ҹү илинин 14 нисан ахшамында тә’сис едәркән, онун ҝүнаһсыз инсан бәдәнини вә камил ганыны тәмсил едән мајасыз чөрәкдән вә гырмызы шәрабдан истифадә етмишдир (Матта 26:26-29). Бу символлардан Аллаһын мүгәддәс руһу илә мәсһ едилмиш мәсиһчиләр гәбул едирләр. Онлар јени әһдә вә Падшаһлыг әһдинә дахил олдуглары үчүн сәмави үмидә маликдирләр (Лука 12:32; 22:20, 28-30; Ромалылара 8:16, 17; Вәһј 14:1-5). Бунунла белә, гәдим јәһуди тәгвиминә әсасән 14 нисана дүшән бу ҝеҹәдә иштирак едәнләрин һамысы фајда әлдә едир. Бу бајрам, Аллаһын илтифат ҝөстәрдији кәсләрә әбәди јашамаг үмидини верән, ҝүнаһлар үчүн ҝәтирилән фидијә гурбанлығынын васитәсилә Јеһова Аллаһын вә Иса Мәсиһин ҝөстәрдији мәһәббәти хатырладыр (Матта 20:28; Јәһја 3:16).
ИШ ВӘ ӘЈЛӘНҸӘ
19. Мәсиһчиләр чөрәк пулу газанаркән һансы чәтинликләрлә гаршылашырлар?
19 Мәсиһчиләр виҹданла ишләмәјә вә өзләрини тә’мин етмәјә борҹлудурлар. Бу, аиләнин башчысына мәмнунлуг ҝәтирир (1 Салониклиләрә 4:11, 12). Демәли, әҝәр мәсиһчинин иши Мүгәддәс Китаба зидд ҝедирсә, о, хошбәхт ола билмәз. Лакин һәрдән мәсиһчијә, Мүгәддәс Китабын нормаларына мүвафиг иш тапмаг чәтин олур. Мисал үчүн, бә’зи ишчиләрдән алыҹылары алдатмаг тәләб олунур. Ејни заманда да бир чох мүдирләр е’тибарлы ишчини итирмәмәк хатиринә, онун виҹданыны нәзәрә алараг ҝүзәштә ҝедирләр. Һәр неҹә олса да, сиз әмин ола биләрсиниз ки, Аллаһ тәмиз виҹданла јеринә јетирә биләҹәјиниз иши тапмаг сә’јинизә хејир-дуа верәҹәкдир (2 Коринфлиләрә 4:2).
20. Әјләнҹә нөвләрини сечәркән нәјә ҝөрә диггәтли олмалыјыг?
20 Аллаһ Өз хидмәтчиләринин хошбәхт олмаларыны истәјир, буна ҝөрә дә, биз ағыр иши тәравәтләндириҹи истираһәт вә әјләнҹә илә таразлашдырмалыјыг (Марк 6:31; Ваиз 3:12, 13). Шејтанын дүнјасы Аллаһа хош ҝәлмәјән әјләнҹәләрә тәшвиг едир. Амма Аллаһы разы салмаг үчүн биз китаблар, радио програмлары, мусиги, һәмчинин консертләр, филмләр, пјесләр, телевизија верилишләри вә видео филмләри сечәркән диггәтли олмалыјыг. Әҝәр әввәлләр сечдијимиз әјләнҹәләр Тәснијә 18:10-12, Мәзмур 11:5 вә Ефеслиләрә 5:3-5 ајәләриндә јазылмыш хәбәрдарлыглара зидд ҝедирсә, дәјишиклик етмәклә Јеһованы разы салар вә хошбәхт оларыг.
ҺӘЈАТА ВӘ ГАНА ҺӨРМӘТ
21. Һәјата һөрмәт бизим аборта, һәмчинин адәт вә давранышларымыза неҹә тә’сир ҝөстәрмәлидир?
21 Һәгиги хошбәхтлијә малик олмаг истәјириксә, Јеһова кими, биз дә инсан һәјатына мүгәддәс бир шеј кими бахмалыјыг. Онун Кәламы өлдүрмәји гадаған едир (Матта 19:16-18). Әслиндә Исраил халгына верилмиш ганун ҝөстәрир ки, һәтта доғулмамыш көрпәнин һәјаты да Аллаһын ҝөзүндә дәјәрлидир вә ону мәһв етмәк олмаз (Чыхыш 21:22, 23). Бу сәбәбдән, биз организмимизи түтүнлә, наркотик маддәләрлә вә спиртли ичкиләрлә зәһәрләјәрәк, јахуд лазымсыз рискләрә ҝедәрәк һәјата әһәмијјәтсиз бир шеј кими бахмалы дејилик. Һәмчинин биз һәјатымыз үчүн тәһлүкә јарадан ишләрә баш гошмамалы вә ја тәһлүкәсизлик гајдаларына е’тинасыз јанашмамалыјыг, чүнки бу кими һәрәкәтләр ган төкүлмәсиндә тәгсиркар олмамыза ҝәтириб чыхара биләр (Тәснијә 22:8).
22. а) Гана вә онун истифадә едилмәсинә даир Аллаһа мәгбул нөгтеји-нәзәр нәдә әкс олунур? б) Јалныз кимин ганы һәгигәтән һәјаты хилас едә биләр?
22 Јеһова Нуһа вә онун аиләсинә демишдир ки, ган ҹаны, јә’ни һәјаты тәмсил едир. Буна ҝөрә дә, Аллаһ онлара гадаған етмишдир ки, үмумијјәтлә һеч бир гандан гида кими истифадә етмәсинләр (Тәквин 9:3, 4). Биз онларын нәсли олдуғумуз үчүн бу ганун бизә дә аиддир. Јеһова исраиллиләрә ганы торпаға ахытмағы вә шәхси мәгсәдләрдә истифадә етмәмәји бујурмушду (Тәснијә 12:15, 16). Вә биринҹи әсрин мәсиһчиләринә “гандан... чәкинин” дејилән заман, ган һаггындакы ганун јенидән тәкрар едилмиш олду (Һәвариләрин ишләри 15:28, 29). Башгалары ганкөчүрмәнин һәјаты хилас едәҹәјини иддиа етсәләр дә, Аллаһ горхусуна малик олан инсанлар һәјатын мүгәддәслијинә һөрмәт етдикләри үчүн, бу үсулдан имтина едирләр. Јеһованын Шаһидләри үчүн мүнасиб олан бир чох мүалиҹә үсуллары даһа еффектлидир вә инсанын һәјатыны ганкөчүрмә заманы јаранан тәһлүкә алтына атмыр. Мәсиһчиләр билирләр ки, һәгиги хиласы анҹаг Исанын төкүлән ганы верә биләр. Она иман етмәк ҝүнаһларын бағышланмасыны тә’мин едир вә әбәди һәјата үмид верир (Ефеслиләрә 1:7).
23. Аллаһа мәгбул һәјат тәрзинин ҝәтирдији бә’зи мүкафатлар һансылардыр?
23 Тамамилә ајдындыр ки, Аллаһа мәгбул һәјат тәрзи сә’ј тәләб едир. Бу ҹүр һәјат тәрзи доғмаларын вә танышларын истеһзасына сәбәб ола биләр (Матта 10:32-39; 1 Петер 4:4). Лакин мүкафат һәр ҹүр сынаглардан үстүндүр. Аллаһа мәгбул һәјат тәрзи тәмиз виҹдан вә Јеһованын диҝәр хидмәтчиләри илә ҝөзәл үнсијјәт бәхш едир (Матта 19:27, 29). Бундан башга, Аллаһын әдаләтли јени дүнјасында әбәди һәјаты да тәсәввүр един (Ишаја 65:17, 18). Бәс Мүгәддәс Китабын мәсләһәтләрини һәјата кечирмәк, бунунла да Јеһованын үрәјини севиндирмәк нә гәдәр хошдур! (Сүлејманын мәсәлләри 27:11). Тәәҹҹүблү дејил ки, Аллаһа мәгбул һәјат тәрзи хошбәхтлик ҝәтирир! (Мәзмур 128:1, 2).
БИЛИЈИНИЗИ ЈОХЛАЈЫН
• Аллаһа мәгбул һәјат тәрзи һансы сәбәбләрә ҝөрә хошбәхтлик ҝәтирир?
• Аллаһа мәгбул һәјат тәрзи һансы дәјишикликләри тәләб едә биләр?
• Сиз нәјә ҝөрә Аллаһа мәгбул һәјат сүрмәк истәјирсиниз?
[124-125-ҹи сәһифәләрдәки шәкил]
Истираһәтлә таразлашдырылмыш руһани ишләр Аллаһа мәгбул һәјат тәрзи сүрән кәсләрин хошбәхтлијинә сәбәб олур.