Фәсил 14
Јеһова Өз тәшкилатыны неҹә идарә едир?
1. Мүгәддәс Китабда Јеһованын тәшкилаты һаггында нә дејилир вә бу мәлумат нә үчүн ваҹибдир?
ҜӨРӘСӘН Аллаһын тәшкилаты вармы? Мүгәддәс Јазыларда дејилир ки, вар. Аллаһ Өз Кәламы васитәсилә тәшкилатынын һејрәтамиз сәмави һиссәси һаггында бизә мүәјјән мәлумат верир (Језекел 1:1, 4-14; Даниел 7:9, 10, 13, 14). Һәрчәнд биз тәшкилатын ҝөрүнмәјән һиссәсини ҝөрмәсәк дә о, Аллаһын мүасир хидмәтчиләринә ҝүҹлү тәсир ҝөстәрир (2 Падшаһлар 6:15-17). Јеһованын тәшкилатынын ҝөрүнән һиссәси исә јердәдир. Мүгәддәс Китаб һәм тәшкилатын өзү барәдә, һәм дә Јеһованын ону неҹә идарә етмәси барәсиндә бизә мәлумат верир.
Тәшкилатын ҝөрүнән һиссәси
2. Аллаһ һансы јени јығынҹағы јаратды?
2 Исраил халгы 1545 ил әрзиндә Аллаһын «ҹамааты», башга сөзлә јығынҹағы олмушдур (Һәвариләрин ишләри 7:38). Лакин бу халг Аллаһын ганунларыны позду вә Онун Оғлуну рәдд етди. Она ҝөрә дә Јеһова о јығынҹагдан үз дөндәриб ону тәрк етди. Иса јәһудиләрә демишди: «Будур, евиниз бош галыр» (Матта 23:38). Бундан сонра Јеһова јени јығынҹаг јарадыб онунла әһд бағлады. Бу јығынҹаг ҝөјдә Оғул илә һакимијјәт сүрмәк үчүн Аллаһын сечдији 144 000 нәфәрдән ибарәт олмалы иди (Вәһј 14:1-4).
3. Ерамызын 33-ҹү илинин Пентикост ҝүнүндә баш вермиш һансы һадисә Аллаһын јени јығынҹагдан истифадә етдијини ачыг-ајдын билдирди?
3 Јени јығынҹағын илк үзвләри ерамызын 33-ҹү илинин Пентикост ҝүнүндә Јеһованын мүгәддәс руһу илә мәсһ едилдиләр. Мүгәддәс Китабда о мөһтәшәм һадисә илә әлагәдар ашағыдакылар јазылыб: «Пентикост ҝүнү ҝәлдикдә, онларын һамысы бир јердә топлашды. Гәфләтән, ҝүҹлү бир күләк әсирмиш кими, ҝөјдән бир сәс ҝәлди вә отурдуглары евин һәр тәрәфинә јајылды. Аловун дилләринә бәнзәјән бир шеј онлара ҝөрүнүб, парчаланараг һәр биринин үзәринә гонду. Һамысы Мүгәддәс Руһла долду» (Һәвариләрин ишләри 2:1-4). Беләликлә, Аллаһын руһу ачыг-ајдын шәһадәт етди ки, бундан белә Аллаһ өз нијјәтини һәјата кечирмәк үчүн Иса Мәсиһин ҝөјдән рәһбәрлик етдији бу групдан истифадә едәҹәк.
4. Јеһованын ҝөрүнән тәшкилаты бу ҝүн кимләрдән ибарәтдир?
4 Бу ҝүн јердә 144 000 нәфәрин «галығы» — кичик бир һиссәси галыб. Мүгәддәс Китаб пејғәмбәрлији јеринә јетсин дејә, башга гојунлардан ибарәт бөјүк издиһамын милјонларла үзвү мәсһ едилмиш галыгла әмәкдашлыг едир. Јахшы Чобан Иса Мәсиһ бу гојунлары галыгла бирләшдирәрәк бир Чобанын һимајәси алтында бир сүрү јарадыб (Вәһј 7:9; Јәһја 10:11, 16). Онлар бирликдә бирләшмиш јығынҹағы — Јеһованын ҝөрүнән тәшкилатыны тәшкил едирләр.
Теократик гурулушлу тәшкилат
5. Аллаһын тәшкилатына ким вә неҹә рәһбәрлик едир?
5 «Јашајан Аллаһын ҹәмијјәти» ифадәси бу јығынҹағын ким тәрәфиндән идарә олундуғуну ајдын ҝөстәрир. Бу тәшкилат гурулушҹа теократикдир, јәни Аллаһ тәрәфиндән идарә олунур. Јеһова Өз халгына јығынҹағын ҝөзәҝөрүнмәз Башчысы тәјин етдији Иса Мәсиһ вә Өзүнүн илһамландырдығы Кәламы васитәсилә рәһбәрлик едир (1 Тимотејә 3:14, 15; Ефеслиләрә 1:22, 23; 2 Тимотејә 3:16, 17).
6. а) Биринҹи әсрдә јығынҹаға ҝөјдән рәһбәрлик едилдији нәдән ҝөрүнүр? б) Кечмишдә олдуғу кими инди дә Исанын јығынҹаға башчылыг етмәси нәдән мәлумдур?
6 Аллаһын јығынҹаға рәһбәрлик етмәси Пентикост ҝүнүндә ајдын бәлли олду (Һәвариләрин ишләри 2:14-18, 32, 33). Бу рәһбәрлик Јеһованын мәләји хош хәбәрин Африкаја јајылмасы ҝөстәришини верәндә, Тарсуслу Шаул имана дөнән заман Исанын ҝөјдән вердији ҝөстәришләрдә вә Петер гејри-јәһудиләр арасында тәблиғ ишинә башлајанда даһа ашкар ҝөрүндү (Һәвариләрин ишләри 8:26, 27; 9:3-7; 10:9-16, 19-22). Заман кечдикҹә артыг ҝөјдән сәсләр ешидилмир, мәләкләр ҝөрүнмүр вә руһун мөҹүзәви әнамлары һеч кимә верилмирди. Бунунла белә Иса вәд етмишди: «Будур, Мән, дөврүн сонуна гәдәр һәр ҝүн сизинләјәм» (Матта 28:20; 1 Коринфлиләрә 13:8). Јеһованын Шаһидләри Исанын рәһбәрлијини гәбул едирләр. Бу рәһбәрлик олмасајды, шиддәтли әдавәт шәраитиндә Падшаһлыг һаггында хош хәбәри елан етмәк мүмкүн олмазды.
7. а) «Садиг вә ағыллы гул» кимдир вә биз буну һарадан билирик? б) ‘Гула’ нә тапшырылмышдыр?
7 Өлүмүндән бир гәдәр әввәл Иса шаҝирдләринә «садиг вә ағыллы гул» барәдә сөз ачды. Бу гул Ағасындан, јәни Исадан хүсуси тапшырыг алаҹагды. Аға ҝөјә ҝедәндә «гул» артыг мөвҹуд олмалы вә Мәсиһ, Падшаһ сәлаһијјәтиндә ҝөрүнмәдән гајытдыгда һәлә дә сәјлә чалышмалы иди. Бурадан ајдын ҝөрүнүр ки, «гул» дедикдә сөһбәт бир адамдан ҝетмир. Бу тәсвир мәсһ олунмушларын јығынҹағына аиддир. Јығынҹағы ганы илә сатын алдығы үчүн Иса ону өз ‘гулу’ адландырды. О, јығынҹағын үзвләринә шаҝирд һазырламағы вә онлара «вахтлы-вахтында... [руһани] јемәк» вермәји тапшырды (Матта 24:45-47; 28:19; Јешаја 43:10; Лука 12:42; 1 Петер 4:10).
8. а) Гул синфи бизим зәманәдә һансы тапшырығы јеринә јетирир? б) Аллаһын бу мәнбә васитәси илә вердији рәһбәрлијә һај вермәјимиз нә үчүн ваҹибдир?
8 Аға 1914-ҹү илдә ҝөзәҝөрүнмәз тәрздә гајыданда гул синфи онун тапшырығыны сәдагәтлә иҹра едирди. Буна ҝөрә дә 1919-ҹу илдә һәмин синфин үзәринә даһа бөјүк мәсулијјәт гојулду вә бу, фактларла сүбут олунур. О вахтдан бәри Падшаһлыг хәбәри бүтүн јер үзүндә ҝениш тәблиғ едилир. Бизим дөврдә Јеһоваја ибадәт едән вә бөјүк мәшәггәтдән сағ чыхаҹаг бөјүк издиһамын јығымы давам едир (Матта 24:14, 21, 22; Вәһј 7:9, 10). Һәмин адамларын да руһани гидаја еһтијаҹы вар вә гул синфи онлары белә гида илә тәмин едир. Беләликлә, әҝәр Јеһованы разы салмаг истәјириксә, Онун бу мәнбә васитәсилә вердији рәһбәрлији гәбул едиб бу рәһбәрлијә мүвафиг һәрәкәт етмәлијик.
9, 10. а) Тәлимләрлә бағлы мәсәләләри һәлл етмәк вә хош хәбәрин јајылмасына нәзарәт етмәк үчүн биринҹи әсрдә һансы гурум фәалијјәт ҝөстәрирди? б) Бу ҝүн Јеһованын халгынын тәблиғ фәалијјәти неҹә низамланыр?
9 Вахташыры ортаја тәлим вә тәшкилати мәсәләләрлә бағлы суаллар чыхыр. Белә һалда нә етмәли? «Һәвариләрин ишләри» китабынын 15-ҹи фәслиндә имана ҝәлмиш гејри-јәһудиләрлә бағлы бир мәсәләнин неҹә һәлл олунмасындан бәһс едилир. Бу мәсәлә Јерусәлимдә рәһбәрлик шурасыны тәшкил едән һәвариләр вә ағсаггаллар гаршысында галдырылды. Һәмин кишиләр гејри-камил олсалар да, Аллаһ онлардан истифадә едирди. Онлар һәмин мәсәлә илә бағлы Мүгәддәс Китабда нә дејилдијини арашдырыб, Аллаһын руһунун тәсири алтында гејри-јәһудиләр арасында тәблиғ саһәси ачылдығыны тәсдиг едән фактлары нәзәрә алдылар. Бундан сонра онлар гәрар гәбул етдиләр. Аллаһ һәмин гурума Өз хејир-дуасыны верирди (Һәвариләрин ишләри 15:1-29; 16:4, 5). О вахткы рәһбәрлик шурасы Падшаһлыг һаггында тәблиғ етмәк үчүн иманлылары мүхтәлиф јерләрә ҝөндәрирди.
10 Бизим ҝүнләрдә Јеһованын ҝөрүнән тәшкилатынын Рәһбәрлик Шурасыны мүхтәлиф халгларын нүмајәндәләриндән ибарәт мәсһ едилмиш гардашлар тәшкил едир. Рәһбәрлик Шурасы Јеһованын Шаһидләринин үмумдүнја мәркәзи идарәсиндә јерләшир. Бу Шура Иса Мәсиһин башчылығы алтында бүтүн өлкәләрдә һәгиги ибадәтин јајылмасына јардым едир, Јеһованын Шаһидләринин он минләрлә јығынҹағынын тәблиғ фәалијјәтини низамлајыр. Рәһбәрлик Шурасынын үзвләри һәмиманлыларына мүнасибәтдә һәвари Павелдән нүмунә ҝөтүрүрләр: «Бу о демәк дејилдир ки, ҝуја биз сизин иманыныз үзәриндә һакимик, лакин биз сизин севинмәниз үчүн сизинлә чалышырыг. Чүнки иманда [“иманыныз сајәсиндә”, ЈД] сабит дурурсунуз» (2 Коринфлиләрә 1:24).
11. а) Ағсаггаллар вә хидмәти көмәкчиләр неҹә тәјин едилирләр? б) Тәјин едилмиш гардашларла нә үчүн јахындан әмәкдашлыг етмәлијик?
11 Јеһованын Шаһидләри ҝөзләјирләр ки, Рәһбәрлик Шурасы јығынҹаглара гајғы ҝөстәрән ағсаггал вә хидмәти көмәкчиләр тәјин етмәк сәлаһијјәти олан тәҹрүбәли гардашлар сечәҹәк. Јығынҹаглара гајғы ҝөстәрмәјә тәјин олунанлар үчүн тәләбләр Мүгәддәс Китабда јазылмышдыр. Бу тәләбләрдә онларын гејри-камил, сәһвләрә мејлли олдуглары нәзәрә алыныр. Намизәдләр һаггында рәј вә тәјинат верән ағсаггаллар Аллаһ гаршысында ҹидди мәсулијјәт дашыјырлар (1 Тимотејә 3:1-10, 12, 13; Титуса 1:5-9). Бу сәбәбдән онлар дуада Аллаһдан мүгәддәс руһун көмәјини диләјир вә Аллаһын Кәламында рәһбәрлик ахтарырлар (Һәвариләрин ишләри 6:2-4, 6; 14:23). Ҝәлин ‘иманда бирлијә чатмаға’ көмәк едән ‘инсанлар тимсалындакы һәдијјәләрә’ ҝөрә миннәтдар олаг (Ефеслиләрә 4:8 ЈД, 11-16).
12. Јеһованын теократик тәшкилатында гадынлара һансы јер ајрылыб?
12 Мүгәддәс Јазылара әсасән јығынҹагларда нәзарәт ишинә кишиләр бахмалыдыр. Бу һеч дә гадынлары алчалтмыр, белә ки, онлардан бәзиләри сәмави Падшаһлығын варисләридир. Һәмчинин, тәблиғ ишинин чохуну мәһз гадынлар ҝөрүр (Мәзмур 68:11). Гадынлар һәм дә сәдагәтлә аиләләринин гејдинә галыр вә бунунла јығынҹағын адына шәрәф ҝәтирирләр (Титуса 2:3-5). Јығынҹаға тәлим вермәк сәлаһијјәти исә јалныз тәјин олунмуш кишиләрә мәхсусдур (1 Тимотејә 2:12, 13, И–93).
13. а) Мүгәддәс Китаба әсасән ағсаггаллар өз тәјинатларына неҹә јанашмалыдырлар? б) Бизим һәр биримиз һансы шәрәфә лајиг ҝөрүлмүшүк?
13 Бу дүнјада вәзифәли адамлара бөјүк һөрмәт ҝөстәрилир. Лакин Аллаһын тәшкилатында белә дејил. Иса демишди: «Аранызда ән бөјүк олан ән кичик кими олсун» (Лука 9:46-48; 22:24-26). Мүгәддәс Јазыларда ағсаггаллара Аллаһын мирасына ағалыг етмәк јох, сүрүјә нүмунә олмаг төвсијә едилир (1 Петер 5:2, 3). Каинатын Һөкмдарыны тәмсил етмәк, тәвазөкарҹасына Онун адындан данышмаг вә һәр јердә Онун Падшаһлығы һаггында инсанларла сөһбәт етмәк шәрәфинә јалныз аз сајда сечилмиш адамлар дејил, Јеһованын Шаһидләринин һамысы, һәм кишиләр, һәм дә гадынлар лајиг ҝөрүлмүшләр.
14. Ҝәтирилмиш ајәләрин көмәји илә абзасын сонундакы суаллары арашдырын.
14 Биз өзүмүздән сорушмалыјыг: Јеһованын Өз ҝөрүнән тәшкилатыны неҹә идарә етдијини һәгигәтән гијмәтләндирирәмми? Бу мәним әһвал-руһијјәмдән, данышығымдан, давранышымдан ҝөрүнүр? Нөвбәти фикирләр үзәриндә дәриндән дүшүнмәклә өзүмүзү јохлаја биләрик.
Јығынҹағын Башчысы Мәсиһә һәгигәтән дә табе олурамса, бу ајәләрә әсасән нә едәҹәјәм? (Матта 24:14; 28:19, 20; Јәһја 13:34, 35).
Гул синфи вә онун Рәһбәрлик Шурасы васитәсилә верилән руһани әнамлары миннәтдарлыгла гәбул едәндә кимә һөрмәт ҝөстәрирәм? (Лука 10:16).
Јығынҹағын үзвләри, хүсусән дә ағсаггаллар бир-бири илә неҹә рәфтар етмәлидирләр? (Ромалылара 12:10).
15. а) Јеһованын ҝөрүнән тәшкилатына мүнасибәтимизлә нәји ҝөстәририк? б) Иблисин јаланчы олдуғуну сүбут етмәк вә Јеһованын үрәјини севиндирмәк үчүн әлимиздә һансы имканлар вар?
15 Јеһова, Мәсиһин рәһбәрлик етдији ҝөрүнән тәшкилаты васитәсилә бизә јол ҝөстәрир. Бу тәшкилата мүнасибәтимиздән һөкмранлыгла бағлы мүбаһисәли мәсәләдә кимин тәрәфини тутдуғумуз ҝөрүнүр (Ибраниләрә 13:17). Шејтан иддиа едир ки, бизи өзүмүздән башга һеч нә марагландырмыр. Лакин әҝәр биз хидмәтдә әлимиздән ҝәләни едир вә диггәти өзүмүзә јөнәлтмириксә, Иблисин јаланчы олдуғуну сүбут едирик. Әҝәр арамызда рәһбәрлији үзәринә ҝөтүрән гардашлары севиб онлара һөрмәт едириксә, ејни заманда мәнфәәт хатиринә башгаларына ‘јалтагланмырыгса’, Јеһованын үрәјини севиндиририк (Јәһуда 16; Ибраниләрә 13:7). Јеһованын тәшкилатына садиг галмагла исә ҝөстәририк ки, Аллаһымыз Јеһовадыр вә Она ибадәтдә јекдилик (1 Коринфлиләрә 15:58).
Тәкрар үчүн суаллар
• Бизим ҝүнләрдә Јеһованын ҝөрүнән тәшкилаты кимләрдән ибарәтдир? Онун мәгсәди нәдир?
• Јығынҹағын Башчысы кимдир вә о һансы гурум васитәсилә бизә мәһәббәтлә рәһбәрлик едир?
• Јеһованын тәшкилатынын үзвләринә һансы дүзҝүн мүнасибәти бәсләмәлијик?
[133-ҹү сәһифәдәки шәкилләр]
Јеһова Мәсиһин рәһбәрлик етдији ҝөрүнән тәшкилаты васитәсилә бизә јол ҝөстәрир